កាហ្វេ Starbucks ត្រូវបាន គេដឹងថា គឺជាយីហោកាហ្វេអន្តរជាតិល្បីមួយ ដែលបានឈរជើងក្នុងទីផ្សារប្រទេសថៃ២១ឆ្នាំមកហើយ។
តាមសារព័ត៌មានក្នុងស្រុកថៃ អះអាងថា កាលពីខែមុននេះ ក្រុមហ៊ុនដ៏ធំមួយរបស់ថៃ គឺ Thai Charoen Corporation Group បានចំណាយទុន ៥០០ លានដុល្លារអាមេរិកឯណោះ ដើម្បីទទួលបានសិទ្ធិគ្រប់គ្រងហាងកាហ្វេ៣៧២ សាខានៅទូទាំងប្រទេសថៃ។ ក្រុមហ៊ុននេះ ត្រូវបានគេដឹងថា គឺជារបស់មហាសេដ្ឋីលំដាប់កំពូលរបស់ថៃមួយរូប គឺលោក Charoen Sirivadhanabhakdi ដែលត្រូវបានគេស្គាល់ថាជា មហាសេដ្ឋីដ៏លេចធ្លោ ក្នុងការរកស៊ីលើវិស័យម្ហូបអាហារ និងភេសជ្ជៈ រួមទាំងអចលនទ្រព្យផងដែរ។
អត្ថបទទាក់ទង!
ការទិញសិទ្ធិប្រតិបត្តិការហាងកាហ្វេ Starbucks របស់លោក Charoen គឺធ្វើឡើងស្របពេលដែល ក្រុមហ៊ុនថៃ PTT ដែលជាក្រុមហ៊ុនមេរបស់កាហ្វេ Amazon បានបង្ហាញពីផែនការវិនិយោគ ១,៣ ពាន់លានដុល្លារអាមេរិក ពង្រីកអាជីវកម្មហាងកាហ្វេរបស់ខ្លួន ទាំងនៅក្នុងប្រទេសថៃ និងក្រៅប្រទេសផងដែរ ដែលវាត្រូវបានគេមើលឃើញថា កំពុងប្រជែងខ្លាំងជាមួយ Starbucks សម្រាប់ទីផ្សារអាស៊ី។
តាមការវិភាគរបស់ សារព័ត៌មាន Nikkei Asian Review ឲ្យដឹងថា កិច្ចព្រៀមព្រៀងទិញសិទ្ធិគ្រប់គ្រងពីហាងកាហ្វេ Starbucks របស់ក្រុមហ៊ុន Thai Charoen Corporation Group នេះ ត្រូវបានគេមើលឃើញថា នឹងបង្កើតកម្ដៅប្រកួតប្រជែងក្នុងទីផ្សារកាហ្វេរបស់ថៃកាន់តែខ្លាំងក្លាឡើង ខណៈដែលទីផ្សារនេះ មានទំហំប្រមាណ ៣០ពាន់លានបាត ឬស្មើនឹងប្រមាណ ១ពាន់លានដុល្លារអាមេរិក ក្នុងមួយឆ្នាំ។ មិនតែប៉ុណ្ណោះ កិច្ចព្រមព្រៀងនេះ ក៏ជាការបោះជំហានថ្មីចុងក្រោយមួយទៀតរបស់លោក Sirivadhanabhakdi ចូលក្នុងទីផ្សារកាហ្វេ បន្ទាប់ពីក្រុមហ៊ុនរបស់លោកមួយទៀត គឺBerli Jucker Group បានទិញប្រតិបត្តិការហាងកាហ្វេ Wawee កាលពីឆ្នាំមុនរួចហើយ។
ទីផ្សារកាហ្វេថៃ ត្រូវបានគេដឹងថាមានកំណើនប្រមាណ ១៥ភាគរយក្នុងមួយឆ្នាំ។
តាមការវិភាគរបស់សារព័ត៌មានជប៉ុន ដដែលនេះ បានឲ្យដឹងថា ដៃគូប្រជែងធំបំផុតរបស់ Starbucks គឺហាងកាហ្វេ Amazon របស់ក្រុមហ៊ុន PTT។ ទោះបីជា Amazon ជាយីហោក្នុងស្រុករបស់ថៃ ដែលមានអ្នកស្គាល់មិនច្រើនដូច Starbucks ដែលជាយីហោអន្តរជាតិក៏ពិតមែន តែកាហ្វេ Amazon ក៏អាចចាត់ទុកបានថា ជាអ្នកដឹកមុខក្នុងទីផ្សារមួយផងដែរ ដែលមានសាខាប្រមាណ ២ពាន់កន្លែងនៅទូទាំងប្រទេសថៃ។ ក្រុមហ៊ុន PTT ក៏បានមានផែនការពង្រីកឲ្យបាន ៣.៥០០ សាខា នៅក្នុងរយៈពេល ៥ឆ្នាំខាងមុខ។
«យើងមិនអាចបដិសេធបានទេថា ក្រុមហ៊ុន TCC (Thai Charoen Corporation) បានក្លាយជាដៃគូប្រជែងថ្មីនៅក្នុងទីផ្សារ។ ទោះយ៉ាងណា យើងស្វាគមន៍ ហើយយើងនឹងនឹងបន្តគម្រោងពង្រីកខ្លួនរបស់កាហ្វេ Amazon ដដែល»។ នេះជាប្រសាសន៍របស់ លោក Suchat Ramarch អនុប្រធានប្រតិបត្តិក្រុមហ៊ុន PTT ដែលត្រូវបានស្ដង់ដោយ សារព័ត៌មាន Nikkei Asian Review។
អ្នកវិភាគខ្លះនិយាយថា ក្រុមហ៊ុន PTT មានគុណសម្បត្តិច្រើនក្នុងការប្រកួតប្រជែងទីផ្សារ ព្រោះកាហ្វេ Amazon អាចនឹងពង្រីកហាងនៅតាមតាមស្ថានីយប្រេងឥន្ធនៈPTT ប្រមាណ ១.៥០០ កន្លែងក្នុងប្រទេសថៃ។ រីឯ ក្រុមហ៊ុន TCC វិញ ក៏មានអាជីវកម្មអភិវឌ្ឍន៍អចលនទ្រព្យ ដូចជាប្រតិបត្តិការលើ អគារការិយាល័យ និងមានលទ្ធភាពការច្របាច់បញ្ចូលគ្នានូវទីតាំងអចលនទ្រព្យដែលមានសក្ដានុពលខ្លាំង ក្នុងទីក្រុងបាងកក។ ដូច្នេះ ក្រុមហ៊ុននេះ អាចពង្រីកសាខា កាហ្វេ Starbucks បានកាន់តែងាយស្រួល។
តើអ្នកបានអានអត្ថបទនេះ ហើយឬនៅ?
អ្នកជំនាញខ្លះទៀត បានលើកឡើងដែរថា ការពង្រីកខ្លួនរបស់ហាងកាហ្វេធំៗនៅក្នុងប្រទេសថៃនេះ វាអាចនឹងជំរុញឲ្យមានការប្រកួតប្រជែងខ្លាំងទៅលើកត្តាតម្លៃ។
តែយ៉ាងណា អ្នកជំនាញ បានគូសបញ្ជាក់ថា កាហ្វេ Starbucks នឹងនៅតែទទួលបានប្រយោជន៍ ពីការបន្តរក្សានូវកេរ្ដិ៍ឈ្មោះ យីហោរបស់ខ្លួន ខណៈដែល Amazon វិញ ផ្ដោតលើការពង្រីកខ្លួនយ៉ាងលឿន តាមរយៈបណ្ដាញស្ថានីយ៍ប្រេងឥន្ធនៈរបស់ខ្លួន។
កាហ្វេ Starbucks បានចូលក្នុងទីផ្សារប្រទេសថៃ តាំងពីឆ្នាំ ១៩៩៨ មកម្ល៉េះ ជាមួយនឹងដំណើរការអាជីវកម្មយ៉ាងរលូន។ តួយ៉ាង កាលពីឆ្នាំមុននេះ ប្រាក់ចំណេញសុទ្ធរបស់ Starbucks នៅថៃ បានកើនឡើង ២៥% គឺមានប្រមាណ ៣៥ លានដុល្លារអាមេរិក ពោល គឺបានកើនឡើង ពី ២៨ លានដុល្លារអាមេរិក កាលពីឆ្នាំ ២០១៧។
ការស្រាវជ្រាវ របស់ ស្ថាប័នអន្តរជាតិ Euromonitor បានប៉ាន់ប្រមាណថា កាលពីឆ្នាំ ២០១៨ ហាងកាហ្វេនៅប្រទេសថៃ មានចំនួន ៨.០២៥ ហាង ដែលបានកើនឡើង ៤,៦% កាលពីឆ្នាំ២០១៧៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
