កោះតៃវ៉ាន់បានបង្វែរការយកចិត្តទុកដាក់ទៅលើមហិច្ឆតារបស់ចិន ដើម្បីជំរុញឧស្សាហកម្មបន្ទះឈីបរបស់ខ្លួន និងកំពុងរឹតបន្តឹងច្បាប់ដើម្បីការពារនូវអ្វីដែលតៃវ៉ាន់បាននិយាយថា ចិនកំពុងលួចបច្ចេកវិទ្យាបន្ទះឈីបរបស់ខ្លួនផងដែរ។
ក្រុមហ៊ុន Foxconn ដែលជាក្រុមហ៊ុនផ្គត់ផ្គង់ដ៏ធំរបស់ក្រុមហ៊ុន Apple និងជាក្រុមហ៊ុនផលិត iPhone ផងនោះ បានបង្ហាញពីខែកក្កដាថា ក្រុមហ៊ុននេះ គឺជាម្ចាស់ភាគហ៊ុននៃក្រុមហ៊ុនផលិតបន្ទះឈីបរបស់ចិន Tsinghua Unigroup។
កាលពីថ្ងៃសុក្រ ទី១៦ ខែធ្នូ ក្រុមហ៊ុន Foxconn បាននិយាយនៅក្នុងឯកសារមួយទៅកាន់ផ្សារហ៊ុនទីក្រុងតៃប៉ិថា ក្រុមហ៊ុនបុត្រសម្ព័ន្ធរបស់ខ្លួននៅក្នុងប្រទេសចិនបានយល់ព្រមលក់ភាគហ៊ុនរបស់ខ្លួនទាំងស្រុងនៅក្នុងក្រុមហ៊ុន Tsinghua Unigroup។
ទោះយ៉ាងណា អាជ្ញាធរតៃវ៉ាន់បាននិយាយឆ្លើយតបវិញថា គណៈកម្មការវិនិយោគ ដែលត្រូវអនុម័តលើការវិនិយោគបរទេសទាំងអស់នោះ នឹងស្នើសុំឱ្យក្រុមហ៊ុន Foxconn នៅថ្ងៃទី ១៩ខែធ្នូ ធ្វើការ«ពន្យល់ក្បោះក្បាយ»ពីការវិនិយោគនៅក្នុងប្រទេសចិនដីគោកនេះ។
អត្ថបទគួរអាន
អ្នកដែលដឹងពីបញ្ហានេះបានប្រាប់ព័ត៌មានរ៉យទ័រថា ក្រុមហ៊ុន Foxconn មិនបានសុំការយល់ព្រមពីអាជ្ញាធរតៃវ៉ាន់នៅមុនពេលធ្វើការវិនិយោគរបស់ក្រុមហ៊ុននេះទេ ហើយអាជ្ញាធរជឿថា ទង្វើនេះបានបំពានច្បាប់គ្រប់គ្រងទំនាក់ទំនងរបស់តៃវ៉ាន់ជាមួយប្រទេសចិនដីគោក។
ក្រុមហ៊ុន Foxconn បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ដែលបានចេញនៅមុនពេលសេចក្ដីថ្លែងការណ៍របស់អាជ្ញាធរកោះតៃវ៉ាន់ថា ខណៈអំឡុងពេលចុងឆ្នាំខិតជិតមកដល់នោះការបណ្តាក់ទុនដើមដំបូងនៅតែមិនទាន់បញ្ចប់នៅឡើយទេ។
ក្រុមហ៊ុន Foxconn បាននិយាយថា ក្រុមហ៊ុន Xingwei ដែលមានភាគហ៊ុន ៩៩% ត្រូវបានគ្រប់គ្រងដោយក្រុមហ៊ុន Foxconn Industrial Internet (FII) ដែលចុះបញ្ជីនៅប្រទេសចិននោះបានយល់ព្រមលក់ភាគហ៊ុនរបស់ខ្លួនយ៉ាងហោចណាស់ក្នុងតម្លៃ ៧៧២ លានដុល្លារទៅឱ្យក្រុមហ៊ុនចិនមួយឈ្មោះ Yantai Haixiu៕
