វាជាលើកទីមួយហើយ ដែលកងកម្លាំងនៃកោះប្រជាធិបតេយ្យមួយនេះ បានបាញ់ព្រមានបែបនេះទៅលើយន្តហោះចិន ស្របពេលដែលភាពតានតឹងរវាងកោះតៃវ៉ាន់ និងមហាយក្សចិនស្ទើរតែផ្ទុះបែកម្តងៗទៅហើយនោះ។
អ្នកនាំពាក្យយោធាតៃវ៉ាន់បាននិយាយថា យន្តហោះគ្មានមនុស្សបើក ឬហៅថាដ្រូន ដែលហោះក្រវែលឆ្នេរសមុទ្ររបស់ខ្លួននោះ បានត្រឡប់ទៅប្រទេសចិនវិញ បន្ទាប់ពីកងទ័ពយាមការរបស់តៃវ៉ាន់បានព្យាយាមបាញ់ទម្លាក់។
មែនទែនទៅ វាមិនមែនជារឿងថ្មីនោះឡើយសម្រាប់កោះតៃវ៉ាន់ចំពោះទង្វើរបស់ទីក្រុងប៉េកាំងបែបនេះ ព្រោះខ្លួនតែតែងតែត្អូញត្អែរ និងព្រមានម្តងហើយម្តងទៀត ចំពោះយន្តហោះគ្មានមនុស្សបើករបស់យោធាចិនដែលតែងតែហោះចូលក្នុងប្រជុំកោះរបស់តៃវ៉ាន់ ជាពិសេសនៅពេលថ្មីៗនេះ គឺនៅកោះគីនមិន (Kinmen)។
អ្នកនាំពាក្យខាងយោធានៅកោះ Kinmenរបស់តៃវ៉ាន់ លោក Chang Jung-shun បាននិយាយថា៖ គ្រាប់ពិតត្រូវបានបាញ់ទៅលើយន្តហោះគ្មានមនុស្សបើករបស់ចិនដីគោក ដែលបានហោះរំលោភចូលក្នុងកោះអីដែន (Erdan) នៅវេលាម៉ោង ៦ ល្ងាច។ ហើយលោកបន្ថែមថា យន្តហោះនោះបានហោះត្រឡប់ទៅប្រទេសចិនវិញ ក្រោយពីរងការបាញ់ព្រមានផងដែរ។
អត្ថបទគួរអាន
ទន្ទឹមនឹងនេះដែរ គេនៅមិនទាន់ឃើញមានការឆ្លើយតបណាមួយពីសំណាក់ប្រទេសចិននៅឡើយទេ មកទល់នឹងពេលនេះ។ ប៉ុន្តែកាលពីថ្ងៃទី២៩សីហា មុននឹងការបាញ់ទៅលើយន្ដហោះដ្រូនរបស់ចិននេះ ក្រសួងការពារបរទេសចិនបានច្រានចោលការលើកឡើង របស់តៃវ៉ាន់អំពីយន្តហោះគ្មានមនុស្សបើកនាពេលកន្លងទៅនោះថា «វាគ្មានអ្វីធំដុំនោះទេ»។
នាពេលថ្មីនេះដែរ មានការផ្សព្វផ្សាយយ៉ាងទូលំទូលាយនៅលើប្រព័ន្ធផ្សព្វផ្សាយសង្គមចិន ដែលបង្ហាញពីយន្តហោះគ្មានមនុស្សបើកចំនួនពីរ ត្រូវបានទាហានតៃវ៉ាន់នៅលើកោះគីមមិន បានគប់ដុំថ្មទៅលើយន្តហោះទាំងពីរនោះផងដែរ។
គួរជម្រាបថា កោះ Kinmen របស់តៃវ៉ាន់គឺស្ថិតនៅតែពីរទៅបីរយម៉ែត្រប៉ុណ្ណោះពីទឹកដីចិន ដែលទល់មុខនឹងទីក្រុង Xiamen និង Quanzhou របស់ប្រទេសចិនតែម្តង។
ជាមួយគ្នានេះ លោកស្រី Tsai Ing-wen បាននិយាយទៅកាន់កងទ័ពជើងទឹករបស់ខ្លួននៅកោះ ផេងហ៊ូ (Penghu) កាលថ្ងៃអង្គារនេះថា «សត្រូវកាន់តែញុះញង់ យើងត្រូវតែស្ងប់ស្ងាត់ ដោយមិនត្រូវបង្កជម្លោះនោះទេ តែយើងក៏ត្រូវធ្វើការប្រឆាំងឲ្យបានសមស្របផងដែរ»។
មួយវិញទៀត បើតាមមន្ត្រីនៅទីនោះបានប្រាប់អ្នកយកព័ត៌មានថា ចាប់តាំងពីប្រទេសចិនចាប់ផ្តើមធ្វើសមយុទ្ធទ្រង់ទ្រាយធំរបស់ខ្លួនមក នាវាចម្បាំង និងយន្តហោះចម្បាំងជាច្រើនរបស់តៃវ៉ាន់ ដែលស្ថិតនៅកោះ (Penghu) បានប្រើគ្រាប់ពិតត្រៀមជើងការរួចបាត់ទៅហើយ បើទោះបីជាពួកគេមិនបើកការបាញ់តបតជាមួយចិនដីគោកក្នុងអំឡុងសមយុទ្ធនោះក៏ដោយ៕
