យ៉ាងណាមិញ នៅថ្ងៃទី ៩ខែសីហានេះ តៃវ៉ាន់ក៏បានធ្វើសមយុទ្ធផងដែរ ដើម្បីបង្ហាញពីការប្រឆាំង និងត្រៀមខ្លួនទប់ទល់ជាមួយការវាយប្រហារណាមួយកើតឡើងផងដែរ។
យោងតាមទីបញ្ជាការកងទ័ពរំដោះប្រជាជនចិនភាគខាងកើតបាននិយាយនៅថ្ងៃទី៨ សីហានេះថា ខ្លួននឹងបន្តធ្វើសមយុទ្ធឡោមព័ទ្ធកោះតៃវ៉ាន់បន្តទៀត ដោយរួមមានសមយុទ្ធប្រឆាំងនាវាមុជទឹក និងការហ្វឹកហាត់ប្រយុទ្ធតាមផ្លូវសមុទ្រផ្សេងៗទៀត ដោយមិនបានបញ្ជាក់ថា នឹងបិទបញ្ជប់នៅពេលណានោះទេ។
ទន្ទឹមនឹងគ្នានេះដែរ កោះតៃវ៉ាន់ឯណោះវិញ នៅថ្ងៃទី៩ សីហានេះក៏បានធ្វើសមយុទ្ធកាំភ្លើងធំរបស់ខ្លួនផងដែរ ក្នុងគោលបំណងការពារប្រឆាំងនឹងការវាយប្រហារណាមួយជាយថាហេតុពីសំណាក់ចិនដីគោក។
បើតាមលោកលូ វ៉ូអីចាយ (Lou Woei-jye) អ្នកនាំពាក្យនៃយោធាជើងទឹកទីប្រាំបីរបស់តៃវ៉ាន់បាននិយាយថា សមយុទ្ធរបស់ទីក្រុងតៃប៉ិបានធ្វើឡើងនៅក្នុងស្រុកភីងទុង (Pingtung) ភាគខាងត្បូងនៃកោះតៃវ៉ាន់ នៅម៉ោង ៧:៤០ នាទីព្រឹក (កម្ពុជា) និងបានបិទបញ្ចប់ទៅវិញរយៈពេលមួយម៉ោង។
លោកលូ បានបន្ថែមថា សមយុទ្ធគ្រាប់ពិតនេះ គឺមានការបាញ់គ្រាប់ផ្លោង ជាមួយនឹងកាំភ្លើងធំប្រហែល ៤០ ដើម ព្រមទាំងគ្រោងដាក់ពង្រាយទាហានរាប់រយនាក់នៅតាមតំបន់ឆ្នេរកេនទីង (Kenting) ផងដែរ ដោយនឹងធ្វើឡើងនៅថ្ងៃព្រហស្បតិ៍ម្តងទៀត។
អត្ថបទគួរអាន
មួយវិញទៀត តាមលោកលោក Joseph Wu ដែលមន្ត្រីជាន់ខ្ពស់កោះតៃវ៉ាន់បាននិយាយថា «សមយុទ្ធទ្រង់ទ្រាយធំរបស់ទីក្រុងប៉េកាំងរួមមានការបាញ់មីស៊ីល ក៏ដូចជាការវាយប្រហារតាមប្រព័ន្ធអ៊ីនធឺណិត យុទ្ធនាការផ្សព្វផ្សាយព័ត៌មាន និងការដាក់បន្ទុកផ្នែកសេដ្ឋកិច្ច ដើម្បីធ្វើឲ្យប្រជាជនតៃវ៉ាន់ចុះញ៉មនឹងប្រទេសចិនតែម្តង។
ជុំវិញបញ្ហាភាពតានតឹងដ៏ក្ដៅគគុកនៅកោះតៃវ៉ាន់នេះដែរ លោកចូ ដៃដិន ប្រធានាធិបតីអាមេរិកបាននិយាយប្រាប់អ្នកយកព័ត៌មាននៅទីក្រុងដេលាវ៉ា (Delaware) ជាសាធារណៈលើកដំបូងចាប់តាំងដំណើរទស្សនកិច្ចរបស់លោកស្រី ផេឡូស៊ី ទៅកោះតៃវ៉ាន់ថា «លោកមានការព្រួយបារម្ភណាស់អំពីបញ្ហាតៃវ៉ាន់ តែលោកព្រួយចិត្តពីសកម្មភាពរបស់ចិនច្រើនជាង ក៏ប៉ុន្តែលោកបៃឌិនយល់ថា ចិនហាក់មិនហ៊ានធ្វើអ្វីឲ្យលើសពីនេះទេ»។
រីឯ នាយករដ្ឋមន្ត្រីសិង្ហបុរីលោក Lee Hsien Loong កាលពីថ្ងៃចន្ទ ទី ៨ សីហាក៏បានព្រមានអំពីការគិតខុសផ្នែកយោធាណាមួយ នៅច្រកសមុទ្រតៃវ៉ាន់ដែរ ដោយលោកសង្កត់ធ្ងន់ថាស្ថានការណ៍ទំនងជាមិនធូរស្រាលក្នុងពេលឆាប់ៗនេះនោះទេ ដោយលោកមើលឃើញថា សហរដ្ឋអាមេរិក និងចិនកំពុងមានការសង្ស័យនិងមិនត្រូវរូវគ្នាកាន់តែខ្លាំងឡើង។
ទោះបីបែបនេះក្តី អនុប្រធានរដ្ឋមន្ត្រីការពារជាតិទទួលបន្ទុកគោលនយោបាយ លោកខូលីន ខាល (Colin Kahl) បាននិយាយផងដែរថា យោធាជើងទឹករបស់សហរដ្ឋអាមេរិកនឹងបន្តធ្វើនាវាចរណ៍ឆ្លងកាត់ច្រកសមុទ្រតៃវ៉ាន់ក្នុងប៉ុន្មានសប្តាហ៍ខាងមុខនេះជាធម្មតា។
គួរជម្រាបថា អ្នកនាំពាក្យក្រសួងការបរទេសចិន លោកវ៉ាង វេនប៊ីន (Wang Wenbin) បានប្រាប់សន្និសីទសារព័ត៌មានរដ្ឋចិនថា «ចិននឹងតាមកម្ទេចក្ដីសុបិនរបស់អាជ្ញាធរតៃវ៉ាន់ ដែលចង់ទាមទារឯករាជ្យ និងផ្តាច់ខ្លួនពីប្រទេសចិនតាមរយៈសហរដ្ឋអាមេរិកនោះឲ្យបាន៕
