ក្រុមហ៊ុន Foxconn របស់តៃវ៉ាន់បានចុះហត្ថលេខាលើអនុស្សរណៈនៃការយោគយល់ជាមួយក្រុមហ៊ុន Dagang NeXchange Berhad (DNex) របស់ម៉ាឡេស៊ី តាមរយៈក្រុមហ៊ុនបុត្រសម្ព័ន្ធដើម្បីបង្កើតក្រុមហ៊ុនបណ្តាក់ទុនរួមគ្នាដែលនឹងបង្កើរោងចក្រផលិតបន្ទះឈីប ប្រភេទទំហំ១២ អ៊ីញ នៅក្នុងប្រទេសម៉ាឡេស៊ី។ នេះបើតាមការសេចក្តីថ្លែងការណ៍របស់ក្រុមហ៊ុនទាំងពីរ កាលពីថ្ងៃអង្គារ។
ប្រសិនបើផែនការបង្កើតក្រុមហ៊ុនផលិតបន្ទះឈីបសម្រេចជោគជ័យ នោះនឹងស្របតាមការជំរុញថ្នាក់ជាតិរបស់រដ្ឋាភិបាលម៉ាឡេស៊ីក្នុងការកសាងឧស្សាហកម្មបន្ទះឈីបរបស់ខ្លួន ហើយវាក៏ជាការបោះជំហានដ៏ធំមួយទៀតសម្រាប់ក្រុមហ៊ុន Foxconn ដើម្បីពង្រីកវត្តមានរបស់ខ្លួននៅក្នុងវិស័យផលិតបន្ទះឈីប ដែលជាការផ្លាស់ប្តូរដ៏សំខាន់ក្នុងការបន្តមហិច្ឆតាផលិតរថយន្តអគ្គិសនីដោយខ្លួនឯងនាពេលខាងមុខផងដែរ។
ទន្ទឹមនឹងនោះ សម្រាប់ទីតាំងរោងចក្ររបស់ក្រុមហ៊ុន Foxconn ដែលបានគ្រោងទុកនៅក្នុងប្រទេសម៉ាឡេស៊ី ត្រូវបានគេរំពឹងថានឹងផលិតបានបន្ទះឈីបប្រហែល ៤ ម៉ឺន បន្ទះក្នុងមួយខែ។
អត្ថបទគួរអាន
បើទោះបីជា ទីតាំងពិតប្រាកដនៃរោងចក្រ និង ទំហំនៃការវិនិយោគមិនទាន់ត្រូវបានប្រកាសនៅឡើយក៏ដោយចុះ ប៉ុន្តែ ដោយផ្អែកលើសមត្ថភាព និង បច្ចេកវិទ្យាដែលបានគ្រោងទុក តាមការប៉ាន់ស្មានរបស់ក្រុមអ្នកជំនាញក្នុងឧស្សាហកម្មនេះបានឲ្យដឹងថា ការចំណាយដើមទុនសម្រាប់គម្រោងនេះ អាចមានចន្លោះពី ៣ ពាន់លានដុល្លារ ទៅ ៥ ពាន់លានដុល្លារ។
គួរំឭកដែរថា អនុស្សរណៈនៃការចុះកិច្ចព្រមព្រៀងវិនិយោគរវាងក្រុមហ៊ុន Foxconn ជាមួយនឹងក្រុមហ៊ុនក្នុងស្រុកម៉ាឡេស៊ីនេះ បានកើតឡើងបន្ទាប់ពីក្រុមហ៊ុនយក្សរបស់តៃវ៉ាន់មួយនេះ កាលពីខែកុម្ភៈបានប្រកាសពីគម្រោងសាងសង់រោងចក្រផលិតបន្ទះឈីបនៅប្រទេសឥណ្ឌា ជាមួយនឹងក្រុមហ៊ុនក្នុងស្រុកឥណ្ឌា Vedantaផងដែរ។ បន្ថែមពីនេះ ក្រុមហ៊ុន Foxconn ក៏បានទិញរោងចក្រផលិតបន្ទះសៀគ្វីមួយនៅទីក្រុង Hsinchu ភាគខាងជើងនៃកោះតៃវ៉ាន់ ដែលជាបេះដូងនៃបណ្ដុំការផលិតបន្ទះសៀគ្វីរបស់តៃវ៉ាន់ក្នុងឆ្នាំ ២០២១ ដើម្បីអភិវឌ្ឍបន្ទះឈីប សម្រាប់ការប្រើប្រាស់ផលិតរថយន្តអគ្គិសនី។
គួរជម្រាបថា តំបន់អាស៊ីអាគ្នេយ៍គឺជាគោលដៅដ៏ពេញនិយមសម្រាប់វិនិយោគលើការផលិតបន្ទះឈីបដើម្បីផ្គត់ផ្គង់តម្រូវការសកល។ ក្រៅពីប្រទេសដែលមានសេដ្ឋកិច្ចធំៗ ដូចជាសហរដ្ឋអាមេរិក អឺរ៉ុប និងជប៉ុន ដែលផ្តោតខ្លាំងទៅលើការផលិតបន្ទះឈីប ប្រទេសផ្សេងទៀតដូចជា ឥណ្ឌា ថៃ និង ម៉ាឡេស៊ី ក៏សង្ឃឹមក្នុងការអភិវឌ្ឍឧស្សាហកម្មផលិតបន្ទះឈីបផ្ទាល់ខ្លួនរបស់ពួកគេផងដែរ ដោយសារតែមានការព្រួយបារម្ភលើភាពចុះខ្សោយនៃខ្សែសង្វាក់ផ្គត់ផ្គង់សកល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
