មិនតែប៉ុណ្ណោះ កសិករដែលទិញកូនទាកាប៉ាយកទៅចិញ្ចឹមបន្ដ នាពេលបច្ចុប្បន្ន ក៏មានការយល់ដឹងច្រើនពីអត្ថប្រយោជន៍នៃការទិញកូនទាក្នុងស្រុកទៅចិញ្ចឹមដែរ ពីព្រោះថាកូនទាក្នុងស្រុកមានគុណភាពល្អជាងកូនទានាំចូល។
ទាកាប៉ា ជាប្រភេទទា ដែលគេចិញ្ចឹមយកសាច់ មានវាក៏មានតម្រូវការទីផ្សារខ្ពស់គួរសមដែរ នាពេលបច្ចុប្បន្ននេះ។
លោក ស៊ុន សាក់ ម្ចាស់កសិដ្ឋានភ្ញាស់កូនទាកាប៉ាSP ស្ថិតនៅ ឃុំពានី ស្រុកកំពង់ត្រឡាច ខេត្តកំពង់ឆ្នាំង បានបញ្ជាក់ប្រាប់ខេមបូណូមីសថា លោកបានបើកកសិដ្ឋាននេះ រយៈពេល៥ឆ្នាំមកហើយ ប៉ុន្ដែ នៅអំឡុងពេលកូវីដ១៩រាតត្បាត អាជីវកម្មលោកក៏បានប្រឈមនឹងបញ្ហាជាច្រើនដែរ។ ក៏ប៉ុន្ដែ នៅពេល ពេលបច្ចុប្បន្ន ក្រោយពេលដែលប្រទេសបើកសេដ្ឋកិច្ចសង្គមឡើងវិញ អាជីវកម្មភ្ញាស់កូនទាកាប៉ារបស់លោក ស៊ុន សាក់ ហាក់មានភាពល្អប្រសើរជាងមុន បើទោះបីមាន កំពុងប្រឈមផលប៉ះពាល់តិចតួចពីការឡើងថ្លៃនៃចំណីទា និងការប្រកួតប្រជែងពីសំណាក់កូនទានាំចូលពីប្រទេសជិតខាងក៏ដោយ។ ម្ចាស់កសិដ្ឋានចិញ្ចឹមទាកាប៉ារាប់ពាន់ក្បាលរូបនេះ អះអាងថា ទោះបីពេលបច្ចុប្បន្នមានការនាំចូលកូនទាពីបណ្តាប្រទេសជិតខាងមានការប្រកួតប្រជែងច្រើន គួបផ្សំមានតម្លៃថោកជាងទាក្នុងស្រុកក៏ពិតមែន ប៉ុន្តែខាងកសិដ្ឋានរបស់លោកអាចទប់ទល់បញ្ហានេះបាន ដោយហេតុថា អតិថិជនរបស់លោកដែលជាកសិករបានងាកមកទិញកូនទាក្នុងស្រុកវិញច្រើន ដោយពួកគាត់មានការយល់ដឹងច្រើនពីគុណភាពកូនទាក្នុងស្រុក ដែលមានការចញ្ចឹមតាមស្តង់ដារ មានការចាក់វ៉ាក់សាំងបង្ការការពារជំងឺផ្សេងៗជាដើម ខណៈកូនទាដែលនាំចូលពីក្រៅ មានគុណភាពមិនសូវល្អ មានការងាប់ច្រើនស្ទើតែពាក់កណ្តាលឯណោះ ក្នុងការបញ្ជាទិញម្តងៗ។
អត្ថបទគួរអាន
លោក ស៊ុន សាក់ បន្ថែមទៀតថា កសិដ្ឋានរបស់លោក មានទាំងការលក់កូនទាកាប៉ាពូជ និងលក់ទាកប៉ាសាច់សម្រាប់ទីផ្សារផងដែរ ដោយក្នុងនោះ ចំពោះការទិញកូនទាកប៉ាចាប់ពី ៥០០កូនឡើងទៅ មានតម្លៃ ៤៥០០ រៀលក្នុងមួយក្បាល ហើយបើទិញក្រោម ៥០០កូន មានតម្លៃ ៥០០០ ពាន់រៀលក្នុងមួយក្បាល។ ដោយឡែក ទាកាប៉ាសាច់វិញ កសិដ្ឋានរបស់លោក លក់ចេញក្នុងតម្លៃ ១ម៉ឺន៥រយ រៀលក្នុងមួយគីឡូក្រាម។
បច្ចុប្បន្ននៅក្នុងកសិដ្ឋានភ្ញាស់ទាកាប៉ារបស់លោក ស៊ុន សាក់ មានមេទាកាប៉ាប្រមាណជាង ១ពាន់ក្បាល ដែលអាចទទួលបានកូនទាសម្រាប់លក់ចេញចំនួនប្រមាណ ១ម៉ឺន២ពាន់ក្បាលក្នុងមួយខែ ហើយលោកក៏បានលើកទឹកចិត្តឲ្យកសិករចិញ្ចឹមទាទាំងអស់ ងាកមកគាំទ្រកូនទាដែលចិញ្ចឹមក្នុងស្រុកដែលមានគុណភាពល្អ ជាជាងការចិញ្ចឹមទា ដែលមានប្រភពនាំចូលពីក្រៅប្រទេស មិនសូវមានគុណភាព ដែលនាំឲ្យមានការខាតបង់ច្រើនក្នុងការចិញ្ចឹម៕
