បើតាមមន្ត្រីជាន់ខ្ពស់ក្រសួងពាណិជ្ជកម្ម ការគ្រោងចុះបញ្ជីម៉ាកសម្គាល់ភូមិសាស្ត្របង្កងតាកែវនេះ គឺដើម្បីចូលរួមអភិរក្ស និងទប់ស្កាត់ការក្លែងបន្លំផលិតផលបង្កងតាកែវ ក៏ដូចជាផ្សព្វផ្សាយ និងទាក់ទាញភ្ញៀវទេសចរជាដើម។ មន្ត្រីជាន់ខ្ពស់ក្រសួងពាណិជ្ជកម្មអះអាងថា ក្រោយចុះបញ្ជីរួចផលិតផលបង្កងតាកែវ នឹងកាន់តែមានភាពល្បីល្បាញ និងទទួលបានទំនុកចិត្តកាន់តែខ្ពស់ពីអតិថិជន ខណៈការប្រមូលផលបង្កងតាកែវនៅឆ្នាំ២០២០កន្លងទៅ មានជិត៩០តោនសម្រាប់ផ្គត់ផ្គង់ទីផ្សារក្នុងស្រុក និងរំពឹងអាចឈានចូលទីផ្សារអន្តរជាតិនាអនាគតដ៏ខ្លីខាងមុខផងដែរ។
បង្កងទឹកសាបខេត្តតាកែវដែលល្បីល្បាញមានគុណភាព រសជាតិឆ្ងាញ់ និងទទួលបានការគាំទ្រយ៉ាងខ្លាំងពីមហាជនទូទៅ នឹងក្លាយជាផលិតផលសម្គាល់ភូមិសាស្ត្រក្នុងពេលឆាប់ៗខាងមុខនេះ។ បើគ្មានអ្វីប្រែប្រួលទេក្រសួងពាណិជ្ជកម្មគ្រោងចុះបញ្ជីផលិតផលបង្កងតាកែវ ជាម៉ាកសម្គាល់ភូមិសាស្ត្រទំនិញនៅចុងខែមេសា ឆ្នាំ២០២២ នេះ។ នេះបើតាមការបញ្ជាក់របស់ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម។
ឯកឧត្តម បានបញ្ជាក់ពីគោលបំណងដែលក្រសួងសម្រេចជ្រើសរើសយកបង្កងតាកែវ ជាម៉ាកសម្គាល់ភូមិសាស្ត្រទំនិញនេះថា គឺ ដើម្បីទប់ស្កាត់ការក្លែងបន្លំទំនិញសម្គាល់ភូមិសាស្ត្រ “បង្កងតាកែវ” លើទីផ្សារជាតិ, ចូលរួមអភិរក្សចំណេះដឹង-ចំណេះធ្វើរបស់ផលិតករ និងអាជីវករក្នុងខេត្តតាកែវ, បង្កើនខ្សែចង្វាក់តម្លៃ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់ ក៏ដូចជាទាក់ទាញភ្ញៀវទេសចរជាតិ និងអន្តរជាតិ ដើម្បីឲ្យមកទស្សនាខេត្តតាកែវ និងពិសារបង្កងតាកែវ។ ការចូលរួមប្រកួតប្រជែងពិព័រណ៌ចំណីអាហារថ្នាក់ជាតិ និងអន្តរជាតិពិសេសនៅប្រទេសថៃ វៀតណាម និងចិនជាដើម ក៏ជាគោលបំណងមួយផងដែរ។
អត្ថបទគួរអាន
អ្នកនាំពាក្យក្រសួងពាណិជ្ជកម្មរូបនេះ បានគូសបញ្ជាក់បន្ថែមថា ក្រោយបង្កងតាកែវត្រូវបានចុះបញ្ជីម៉ាកសម្គាល់ភូមិសាស្ត្រទំនិញរួចវានឹងផ្តល់អត្ថប្រយោជន៍យ៉ាងច្រើនដល់ប្រតិបត្តិករ អាជីវករ សមាជិកសមាគម និងប្រជាពលរដ្ឋរស់នៅតំបន់នេះ។
បន្ថែមលើនេះ វាជួយលើកកម្ពស់គុណភាពទំនិញសម្គាល់ភូមិសាស្ត្របង្កងតាកែវ ជួយបង្កើនការងារ កាត់បន្ថយការចំណាកស្រុក និងជួយពង្រីកមុខមាត់ និងអភិវឌ្ឍន៍ហេដ្ឋារចនាសម្ព័ន្ធក្នុងស្រុកជាដើម។ លើសពីនេះសមាជិកទាំងអស់អាចកសាងកេរ្តិ៍ឈ្មោះម៉ាកផ្ទាល់ខ្លួនភ្ជាប់នឹងម៉ាកសម្គាល់ភូមិសាស្ត្រទំនិញបង្កងតាកែវផងដែរ។
បើតាមឯកឧត្តម ប៉ែន សុវិជាតិ ការប្រមូលផលបង្កងតាកែវនៅឆ្នាំ២០១៩សម្រេចបានចំនួនជិត១០០តោនក្រាម និងបានធ្លាក់ចុះមកជិត៩០តោនឆ្នាំ២០២០។ ក្រសួងពាណិជ្ជកម្មរំពឹងថា បង្កងតាកែវនឹងអាចបង្ហាញខ្លួនលើទីផ្សារអន្តរជាតិ ក្រោយបានក្លាយជាម៉ាកសម្គាល់ភូមិសាស្ត្រទំនិញ ខណៈបច្ចុប្បន្នផលិតផលនេះផ្គត់ផ្គង់តែទីផ្សារក្នុងស្រុកតែប៉ុណ្ណោះ។
មកដល់បច្ចុប្បន្ននេះ កម្ពុជា បានចុះបញ្ជីម៉ាកផលិតផលសម្គាល់ភូមិសាស្ត្រចំនួន៤រួចមកហើយ ដូចជាម្រេចកំពត ស្ករត្នោតកំពង់ស្ពឺ ក្រូចថ្លុងកោះទ្រង់ ខេត្តក្រចេះ និងចុងក្រោយនេះ គឺទឹកឃ្មុំព្រៃខេត្តមណ្ឌលគិរី។ ក្រៅពីបង្កងតាកែវ និងទឹកត្រីកំពត ដែលក្រសួងពាណិជ្ជកម្ម គ្រោងចុះបញ្ជីម៉ាកសម្គាល់ភូមិសាស្ត្រទំនិញឆាប់ៗនេះ ក្រសួង ក៏បានសិក្សាស្រាវជ្រាវ និងកំណត់យកផលិតផលសក្ដានុពលសម្រាប់ការបញ្ជីម៉ាកសម្គាល់ភូមិសាស្ត្រ សម្រាប់ផលិតផលប្រមាណ ២០មុខផ្សេងទៀតផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
