ជុំវិញការប្រមូលចំណូលពន្ធឆ្នាំ២០២២នេះ ត្រូវបានថ្នាក់ដឹកនាំអគ្គនាយកដ្ឋានពន្ធដារ អះអាងថា ជាការបង្ហាញឲ្យឃើញនូវភាពជោគជ័យដ៏ធំធេងសម្រាប់កម្ពុជា ក្នុងការស្ដារសេដ្ឋកិច្ចកម្ពុជាឲ្យងើបឡើងវិញពីវិបត្តិជំងឺកូវីដ១៩។
ថ្លែងក្នុងកម្មវិធីពិសេសស្ដីពីសវនកម្ម និងការតវ៉ាលើការកំណត់ពន្ធឡើងវិញ នៅថ្ងៃទី២៤ ខែវិច្ឆិកា ឆ្នាំ២០២២ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ថា នៅរយៈពេល ១០ខែ ក្នុងឆ្នាំ២០២២ លទ្ធផលនៃការគ្រប់គ្រងប្រមូលចំណូលពន្ធ និងអាករគ្រប់ប្រភេទមានចំនួនប្រមាណ ៣ពាន់លានដុល្លារ ពោលគឺសម្រេចបានចំនួន ១០៤% នៃផែនការច្បាប់ដែលបានកំណត់។ ដោយឡែក បើគិតត្រឹមថ្ងៃទី២៤ ខែវិច្ឆិកា ឆ្នាំ២០២២ ការប្រមូលចំណូលពន្ធផ្ទៃក្នុង ដែលប្រមូលដោយអគ្គនាយកដ្ឋានពន្ធដារ សម្រេចបាន ១១០% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។
អត្ថបទគួរអាន
ដ្បិតថា ការប្រមូលចំណូលពន្ធ-អាករ របស់អគ្គនាយកដ្ឋានពន្ធដារ បានបន្តកើនឡើងជាលំដាប់ អគ្គនាយកនៃអគ្គនាយកដ្ឋានពន្ធដារ ឯកឧត្តម គង់ វិបុល នៅតែបន្តខិតខំប្រឹងប្រែក្នុងការអនុវត្តកំណែទម្រង់ និងទំនើបកម្មពន្ធដារ ដោយមានអភិបាលកិច្ចល្អ គឺជាគោលការណ៍ស្នូលនៃកំណែទម្រង់ និងទំនើបកម្មនៃអគ្គនាយកដ្ឋានពន្ធដារ ដើម្បីឈានទៅបង្កើតប្រព័ន្ធពន្ធដារ ដ៏រឹងមាំ បង្កភាពងាយស្រួលដល់អ្នកជាប់ពន្ធក្នុងការបង់ពន្ធ ប៉ុន្តែពិបាកក្នុងការគេចវេះពន្ធ ផងដែរ។
កាលពីឆ្នាំ២០២១ អគ្គនាយកដ្ឋានពន្ធដារបានប្រមូលចំណូលពន្ធអាករសរុបក្នុងចំនួនប្រមាណជាង ២ពាន់៧រយលានដុល្លារ កើនលើសផែនការជាង២៤%៕
