តំណាងអគ្គនាយកដ្ឋានពន្ធដាររបស់វៀតណាមបានបញ្ជាក់នៅក្នុងសារព័ត៌មានក្នុងស្រុកថា ដោយសារតែផលប៉ះពាល់នៃវិបត្តិកូវីដ-១៩ កាលពីឆ្នាំមុន មានអាជីវកម្មបែបប្រពៃណីជាច្រើនបានផ្លាស់ប្ដូរមធ្យោបាយប្រតិបត្តិការរបស់ពួកគេ ពិសេសងាកមកធ្វើសកម្មភាពពាណិជ្ជកម្មតាមបែបឌីជីថលវិញ ដែលធ្វើឲ្យវិស័យនេះមានការកំណើនយ៉ាងខ្លាំង ខណៈអ្នកដែលទិញទំនិញ និងកម្សាន្ដតាមប្រព័ន្ធអនឡាញក៏មានកាន់តែច្រើន ហើយការប្រើប្រាស់សេវាទូទាត់ដោយមិនប្រើក្រដាសប្រាក់ ក៏មានកំណើនដូចគ្នាដែរនៅអំឡុងពេលកូវីដ-១៩ រាតត្បាតនេះ។
ទន្ទឹមនឹងនេះ សហគ្រាសក៏មានការផ្លាស់ប្ដូរផលិតកម្ម និងគំរូអាជីវកម្ម ទៅរកការប្រតិបត្តិការបែបឌីជីថលកាន់តែច្រើនដែរ ដែលវានឹងជំរុញឲ្យចំណូលពន្ធដែលបានមកពីសកម្មភាពអាជីវកម្មតាមប្រព័ន្ធឌីជីថលនេះ ក៏នឹងបន្ដកើនឡើងទៀត៕
