ក្រុមហ៊ុន Tesla គ្រោងកាត់បន្ថយបុគ្គលិកយ៉ាងច្រើនសម្បើមនៅឆ្នាំក្រោយ

ក្រុមហ៊ុន Tesla បានប្រាប់បុគ្គលិកថា ខ្លួនកំពុងអនុវត្តនូវការផ្អាកជ្រើសរើសបុគ្គលិក និងបញ្ជាក់ទៀតថា រលកថ្មីនៃការកាត់បន្ថយបុគ្គលិកនឹងធ្វើឡើងនៅត្រីមាសក្រោយ ពោលគឺនៅត្រីមាសទីមួយនៃឆ្នាំ២០២៣។

បើតាមប្រភពបានបង្ហាញឱ្យដឹងថា ក្រុមហ៊ុន Tesla បានទាក់ទងទៅកាន់បុគ្គលិកមួយចំនួនហើយដែលក្រុមហ៊ុននឹងត្រូវបញ្ឈប់ពួកគេ។

យ៉ាងណាមិញ ក្រុមហ៊ុន Tesla មិនទាន់បានបញ្ជាក់លម្អិតអ្វីឡើយអំពីព័ត៌មានកាត់បន្ថយបុគ្គលិកនេះ។

សូមរំលឹកថា កាលពីខែមិថុនា លោក Elon Musk បានប្រាប់ទៅដល់ថ្នាក់គ្រប់គ្រងក្រុមហ៊ុន Tesla ឱ្យផ្អាករើសបុគ្គលិក និងកាត់បន្ថយបុគ្គលិក ១០% នៅ៣ខែក្រោយ ដែលវាអាចប៉ះពាល់ដល់បុគ្គលិកប្រមាណ ១ម៉ឺននាក់។

ជុំវិញការកាត់បន្ថយបុគ្គលិកនេះ ត្រូវបានមហាសេដ្ឋីលេខ១ពិភពលោករូបនេះ បានផ្តល់មូលហេតុខុសៗគ្នា ដោយក្នុងនោះ លោកក៏បានលើកឡើងដែរពីការយល់ឃើញអវិជ្ជមានរបស់លោកចំពោះបញ្ហាសេដ្ឋកិច្ច ដែលបាននិងកំពុងកើតឡើង។

សេចក្តីរាយការណ៍ពីការជម្រុះបុគ្គលិករបស់ក្រុមហ៊ុន Tesla ធ្វើឡើងខណៈដែលភាគហ៊ុនរបស់ក្រុមហ៊ុនរថយន្តអគ្គិសនីអាមេរិកនេះ បាននឹងកំពុងធ្លាក់ចុះជាបន្ដបន្ទាប់។ ទន្ទឹមនឹងនេះ កៅអីរបស់លោក Elon Musk នៅ Twitter ក៏កំពុងក្តៅខ្លាំងផងដែរ ដែលលោកអាចនឹងចុះចេញពីតំណែងទៀតផង ធ្វើឱ្យម្ចាស់ភាគហ៊ុន Tesla បានបង្កើនក្តីបារម្ភចំពោះស្មារតីមិនល្អរបស់លោក លោក Elon Musk លើការគ្រប់គ្រងក្រុមហ៊ុនបណ្តាញសង្គមនេះ ដែលលោកបានទិញក្នុងតម្លៃ ៤៤ពាន់លានដុល្លារ កាលពីចុងខែតុលាកន្លងទៅ។

សូមជម្រាបថា ក្នុងករណី ក្រុមហ៊ុន Tesla នឹងអនុវត្តកាត់បន្ថយបុគ្គលិកក្នុងចំនួនដ៏ច្រើននេះមែន នោះវានឹងក្លាយជាក្រុមហ៊ុនយក្សអាមេរិកមួយទៀត ដែលមានផែនការកាត់បន្ថយបុគ្គលិកដ៏ច្រើនសម្បើម បន្ទាប់ពី Amazon, Meta, Twitter, HP, Microsoft និង Snap ជាដើម៕

អត្ថបទ ៖ នៅ សំភី