ប្រធានក្រុមហ៊ុនអាកាសចរណ៍ Thai Airways លោក ស៊ូម៉េត ដំរ៉ុង ឆៃថាម បានប្រកាសប្រាប់ដល់ នាយកប្រតិបត្តិតាមផ្នែកនីមួយៗ និងបុគ្គលិកជាច្រើនទៀត ឲ្យបានដឹងថា ពួកគេ ត្រូវតែសហការគ្នា ដើម្បីស្តារស្ថានការណ៍ឡើងវិញ និងដោះស្រាយបញ្ហាប្រឈម ឬក៏ ក្រុមហ៊ុន ត្រូវប្រឈមមុខនឹងការបិទទ្វារ។
លោក ស៊ូម៉េត បញ្ជាក់ថា ក្រុមហ៊ុន បានបាត់បង់ទីផ្សារអស់ជាច្រើន នៅពេលដែលដៃគូប្រកួតប្រជែង ចាប់ផ្តើមបើកជើងហោះហើរតម្លៃទាប ហើយអាចចាប់យកភ្ញៀវសឹងតែទាំងអស់។
លើសពីនេះទៅទៀត ក្រុមហ៊ុន Thai Airways ក៏គ្រោងនឹងបិទជើងហោះហើរត្រង់ចំនួន ៦ ដែលមានប្រតិបត្តិការហោះហើរមកកាន់ ប្រទេសកម្ពុជា ថៃ ឡាវ និងមីយ៉ាន់ម៉ា ដោយផ្ទេរទៅឲ្យ ក្រុមហ៊ុនបុត្រសម្ព័ន្ធរបស់ខ្លួនគឺ Thai Smile Airways កាន់កាប់ជើងហោះហើរនេះជំនួសវិញ។
អត្ថបទទាក់ទង!
ក្រៅពីនេះ ក្រុមហ៊ុន ក៏ប្រកាសពន្យារពេលបើកជើងហោះហើរបន្ថែម ដែលបានគ្រោងទុកតាំងពីយូរមកហើយនោះ ពោលគឺ ពន្យារពេល ៦ខែបន្ថែម លើគម្រោងទិញយន្តហោះ ដែលមានតម្លៃជិត ៥០លានដុល្លារអាមេរិក ហើយងាកមកពិចារណារៀបចំបណ្តាញហោះហើរឡើងវិញ ដើម្បីបង្កើនប្រាក់ចំណូល។
បច្ចុប្បន្ន ក្រុមហ៊ុនអាកាសចរណ៍មួយនេះ មានបុគ្គលិកជាង ២ម៉ឺននាក់ ហើយគ្រោងនឹងធ្វើការកាត់បន្ថយចំណាយ ដោយកាត់បន្ថយប្រាក់ខែបុគ្គលិកជាន់ខ្ពស់ និងគ្មានការផ្តល់រង្វាន់លើកទឹកចិត្តដល់បុគ្គលិកទៀតទេ។
គួរបញ្ជាក់ដែរថា គិតត្រឹមឆមាសទី ១ ឆ្នាំ២០១៩នេះ ក្រុមហ៊ុន Thai Airways ខាតបង់ប្រមាណ ២១២លានដុល្លារអាមេរិក ដែលធ្វើឲ្យទឹកប្រាក់ខាតបង់សរុបរបស់ក្រុមហ៊ុន កើនដល់ជាង ៩ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
