កញ្ចប់ថវិកាដ៏ច្រើនសម្បើមជាង៤ពាន់៥រយលានដុល្លារនេះ នឹងត្រូវប្រើប្រាស់ក្នុងគោលដៅជាច្រើន ក្នុងនោះមានដូចជា ការផ្តល់សាច់ប្រាក់សុទ្ធដល់ពលរដ្ឋដែលមាន និងមិនមានបណ្ណរបបសន្តិសុខសង្គម ព្រមទាំងក្រុមពលរដ្ឋងាយរងគ្រោះ។ បើតាមអ្នកនាំពាក្យនៃរដ្ឋាភិបាលថៃ បានប្រាប់កាសែតបាងកកបុស្តិ៍ដឹងថា ខ្លួននឹងចាប់ផ្តើមអនុវត្តវិធានការណ៍ទាំងអស់នេះ ចាប់ពីខែកក្កដាឆ្នាំ២០២១តទៅ។
គួរជម្រាបថា នេះជាកញ្ចប់ថវិកាជំរុញសេដ្ឋកិច្ចលើកទី២ហើយ នៅក្នុងឆ្នាំ២០២១នេះ ដែលរដ្ឋាភិបាលថៃបានអនុម័ត ដើម្បីជួយស្រោចស្រង់សេដ្ឋកិច្ចប្រទេសខ្លួន ពីការលិចលង់ខ្លាំង។
គេនៅចាំបានថា កញ្ចប់ថវិកាដំបូងកាលពីខែមុន ដែលគណៈរដ្ឋមន្ត្រីថៃបានអនុម័ត មានចំនួនត្រឹមតែជិត៩០ពាន់លានបាត ឬស្មើនឹងជិត៣ពាន់លានដុល្លារប៉ុណ្ណោះ ប៉ុន្តែដោយហេតុថាមេរោគកូវីដ-១៩ នៅក្នុងប្រទេសថៃមិនបានបង្ហាញពីការថមថយសោះនោះ ទើបរដ្ឋាភិបាលលោកប្រាយុទ្ធ ចាន់អូចារ បានសម្រេចបន្ថែម ថវិកាជាង ៤ពាន់លានដុល្លារបន្ថែមទៀត។
អត្ថបទទាក់ទង
ព្រះមហាក្សត្រថៃ
កាលពីសប្តាហ៍មុន បានយល់ព្រមផ្តល់កម្ចីជាទឹកប្រាក់
១៦ពាន់លានដុល្លារបន្ថែមទៀត ដល់រដ្ឋាភិបាលយកទៅប្រើប្រាស់
នៅពេលដែលកញ្ចប់ថវិកាទាំងពីរលើកនេះបានប្រើប្រាស់អស់។
គួរជម្រាបថា សេដ្ឋកិច្ចរបស់ថៃកំពុងប្រឈមនឹងការដាំក្បាលចុះយ៉ាងខ្លាំង ក្រោយថៃជួបប្រទះនឹងរលកឆ្លងកូវីដ១៩ផ្ទួនៗ ដែលគិតមកទល់ពេលនេះថៃមានអ្នកឆ្លងសរុបប្រមាណ ១៦ម៉ឺននាក់ និង មានអ្នកស្លាប់ជាង១ពាន់១រយនាក់ហើយ។
ធនាគារជាតិរបស់ថៃធ្លាប់បានព្យាករណ៍ឲ្យដឹងថា សេដ្ឋកិច្ចប្រទេសខ្លួន នឹងមិនងាយត្រឡប់ទៅរកកម្រិតដូចមុនពេលដែលមានការរីករាលដាលកូវីដ១៩នោះទេ រហូតដល់ដើមឆ្នាំ២០២៣ ឯណោះ។
សូមបញ្ជាក់ថា សេដ្ឋកិច្ចថៃបានធ្លាក់ចុះ ២,៦% នៅត្រីមាសទី១ឆ្នាំ២០២១នេះ ប៉ុន្តែបើតាមការព្យាករ សេដ្ឋកិច្ចថៃរំពឹងថា ងើបឡើងវិញតិចតួចសម្រាប់ត្រីមាសបន្តបន្ទាប់នៃឆ្នាំនេះ ពោលគឺស្ថិតនៅចន្លោះ១,៥% ទៅ ២,៥%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
