នៅថ្ងៃទី២២ ខែមីនា ឆ្នាំ២០២០នេះ ស្ថានអគ្គកុងស៊ុលប្រចាំខេត្តសាកែវ បានចេញសេចក្តីជូនដំណឹងមួយស្តីពីការបិទច្រកទ្វារព្រំដែនកម្ពុជា-ថៃគ្រប់កម្រិតដែលស្ថិតនៅក្នុងដែនដីខេត្តសាកែវ។ ច្រកដែលត្រូវបិទនោះរួមមាន ច្រកទ្វារអន្តរជាតិចំនួន០២ទីតាំង ទី១ច្រកប៉ោយប៉ែត(ខេត្តបន្ទាយមានជ័យ)-ច្រកខ្លងលឹក (ខេត្តសាកែវ)និងច្រកភ្នំដី(ខេត្តបាត់ដំបង)-បានខៅឌីន (ខេត្តសាកែវ) ដោយការចរាចរណ៍តាមចក្រទាំង២នេះ នឹងត្រូវបិទជាបណ្តោះអាសន្នទាំងស្រុង តែអនុញ្ញាតអ្នកបើកបររថយន្តដឹកទំនិញណា ដែលបានការអនុញ្ញាតពីអាជ្ញាធរ ។ ដោយឡែកច្រកតំបន់០២ទីតាំង ច្រកបឹងត្រកួន(ខេត្តបន្ទាយមានជ័យ)-ច្រកតាប្រាយ៉ា (ខេត្តសាកែវ)និងច្រកម៉ាឡៃ(ខេត្តបាត់ដំបង)-ច្រកបានណងព្រឹ(ខេត្តសាកែវ) គឺត្រូវបិទការចរាចរណ៍ទាំងស្រុងតែម្តង។ ចំណែកឯច្រកទ្វារទេ្វភាគីចំនួន១៤ទីតាំងទៀត រវាងខេត្តបន្ទាយមានជ័យ និងខេត្តបាត់ដំបងជាមួយខេត្តសាកែវ ក៏ត្រូវសម្រេចបបិទទាំងស្រុងផងដែរ។
លោក ក្រៃយ៉ុង នាយករដ្ឋបាលខេត្តបន្ទាយមានជ័យបានប្រាប់អ្នកសារព័ត៌មានខេមបូណូមីសថា«បច្ចុប្បន្ននេះ ក្រោយការចេញសេចក្តីជូនដំណឹងចំពោះការបិទច្រកព្រំដែនកម្ពុជាថៃបណ្តោះអាសន្នហើយ ទាំងណពលរដ្ឋខ្មែរនិងពលរដ្ឋថៃ មិនមានការចេញចូលយ៉ាងគំហុកអ្វីទេ គឺទៅមកជាធម្មតា គ្រាន់តែថា សម្រាប់ពលរដ្ឋខ្មែរ ដែលបានចាកចេញពីថៃមកខ្មែរ គឺមិនអនុញ្ញាតអោយត្រលប់ទៅថៃវិញទេក្នុងអំឡុងពេលនេះហើយពលរដ្ឋថៃដែលចាកចេញពីកម្ពុជាទៅ ក៏មិនអោយវិលត្រលប់មកកម្ពុជាវិញដែរ តែយើងនៅតែស្វាគមន៍ពលរដ្ឋខ្មែរមកវិញជាធម្មតា គ្រាន់តែមិនអាចអោយទៅថៃវិញទេក្នុងអំឡុងពេលនេះ»។
អត្ថបទទាក់ទង
យ៉ាងណាមិញ បើឯកឧត្តម អ៊ុំ រាត្រី អភិបាលខេត្តបន្ទាយមានជ័យបានប្រាប់អ្នកសារព័ត៌មានខេមបូណូមីសតាមប្រព័ន្ធតេឡក្រាមថា« ខាងថៃមិនមានបំណង ឬមិនមានការចាប់បញ្ជូនពលករខ្មែរមកវិញទេ គេបានណែនាំថា បើបងប្អូនធ្វើការកន្លែងណា គឺអោយធ្វើការនៅកន្លែងហ្នឹង គឺមានន័យគេថែទាំបានល្អហើយ កាលណាពេលដែលចេញពីកន្លែងធ្វើការហ្នឹងត្រលប់មកស្រុកខ្មែរ ពេលទៅវិញ ត្រូវតែរក្សារដូចការណែនាំរបស់ក្រសួងសុខាភិបាលចឹង គឺមុនចូលទៅកន្លែងធ្វើការត្រូវសម្រាក១៤ថ្ងៃសិន ហើយត្រូវមានការត្រួតពិនិត្យជាក់លាក់ថា មិនមានបញ្ហាជំងឺឆ្លងនេះទេ ទើបអោយចូលធ្វើការវិញ។ ដូចនេះសម្រេចចិត្តចាកចេញ ឬនៅប្រទេសថៃបន្តទៀត របស់ពលករខ្មែរ គឺសិទ្ធិរបស់ពួកគាត់»។ហើយចំពោះទំនិញវិញត្រូវបានឯកឧត្តម អ៊ុំ រាត្រី លើកឡើងថា ដូចដែលបានបញ្ជាក់នៅក្នុងសេចក្តីជូនដំណឹងរបស់រដ្ឋបាលខេត្តបន្ទាយមានជ័យ អញ្ជឹង គឺក្នុងខេត្តបន្ទាយមាន មានច្រក០៣ ច្រកចំនួន០២គឺបិទទាំងអស់ ដោយច្រកប៉ោយប៉ែត គឺអនុញ្ញាតតែរថយន្តដឹកទំនិញធំៗ និងមនុស្ស២នាក់ប៉ុណ្ណោះ ក្រៅពីនេះបិទទាំងអស់។
សូមជម្រាបថា ការបិទច្រកព្រំដែននានេះ ក្រៅពីខេត្តសាកែវរបស់ថៃ ជាមួយខេត្តបាត់ដំបងនិងខេត្តបន្ទាយមានជ័យរបស់កម្ពុជាហើយ ក៏នៅមានខេត្តរបស់ថៃចំនួន០៥ទៀត ក៏បានសម្រេចបិទច្រកទា្វរបណ្តោះអាសន្នជាមួយកម្ពុជារហូតដល់មានការជូនដំណឹងជាថ្មី រួមមាន ខេត្តឧប៊ុនរាជធានី ខេត្តត្រាត ខេត្តបូរីរ៉ាំ ខេត្តច័ន្ទបុរី ខេត្តត្រាត និងខេត្តស៊ីសាកេត ដោយក្នុងចំណោមខេត្តទាំងនេះ មានខេត្តខ្លះបានបិទតាំងពីថ្ងៃទី១៨ ខែមីនា ឆ្នាំ២០២០មកម្ល៉េះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
