ប្រភពព័ត៌មានក្នុងស្រុកថៃ បានឲ្យដឹងទៀតថា ក្រៅពីប្រទេសថៃ ក៏មានប្រទេសជាដៃគូគម្រោង អាក់មិកស៍ ដទៃទៀត ដូចជា អូស្ត្រាលី ជប៉ុន កូរ៉េខាងត្បូង និងសហរដ្ឋអាមេរិកជាដើម ក៏នឹងផ្ដល់វិភាគទានបន្ថែម ២០០ លានដុល្លារអាមេរិក ដូចគ្នាដែរ ខណៈដែលប្រទេសមីយ៉ាន់ម៉ា ឡាវ កម្ពុជា និងវៀតណាម រួមគ្នានឹងផ្ដល់វិភាគទាន ១០០ លានដុល្លារអាមេរិក។
កិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី ចៅប្រាយ៉ាមេគង្គ ឬហៅកាត់ថា អាក់មិកស៍ (Acmecs) ដែលមានប្រទេសកម្ពុជា ឡាវ មីយ៉ាន់ម៉ា វៀតណាម និងថៃ ចូលរួមនេះ គឺជាក្របខណ្ឌនៃភាពជាដៃគូ ដែលបានបង្កើតឡើង ដើម្បីជំរុញកំណើនសេដ្ឋកិច្ច និងកាត់បន្ថយវិសមភាពចំណូលនៅក្នុងតំបន់។
អត្ថបទទាក់ទង!
មន្ត្រីនាំពាក្យរដ្ឋាភិបាលថៃ បានបញ្ជាក់ឲ្យដឹងថា ថ្មីៗនេះ ក្រសួងសេដ្ឋកិច្ច ត្រូវបានចាត់តាំងឲ្យកំណត់ដកចេញនូវថវិកា៤០លានដុល្លារ ពីកញ្ចប់ថវិកាកណ្ដាល នៅក្នុងឆ្នាំ២០២០ និងដកចេញ ៤០លានដុល្លារ ក្នុងមួយឆ្នាំ ចាប់ពីឆ្នាំ២០២១ ដល់២០២៥ ដើម្បីផ្ដល់វិភាគទានហិរញ្ញប្បទានក្នុងមូលនិធិនេះ។
រដ្ឋាភិបាលថៃ ជឿជាក់ថា មូលនិធិអាក់មិកស៍ នឹងនឹងត្រូវបានពង្រីកទុនបម្រុងកាន់តែធំ ដើម្បីយកថវិកាទាំងនោះ មកប្រើប្រាស់សម្រាប់ជាលទ្ធភាពនៃការសិក្សាសម្រាប់គម្រោងហេដ្ឋារចនាសម្ព័ន្ធ ជាពិសេស គឺការតភ្ជាប់ផ្លូវមធ្យោបាយដឹកជញ្ជូននៅក្នុងតំបន់ដែលកំពុងតែមានការខ្វះខាត។
មិនតែប៉ុណ្ណោះ គម្រោង អាក់មិកស៍នេះ ក៏នឹងក្លាយជាងមជ្ឈមណ្ឌលនៃការអភិវឌ្ឍសេដ្ឋកិច្ច នៅក្នុងតំបន់ ដែលអាចជំរុញសេដ្ឋកិច្ចក្នុងតំបន់អាស៊ានបានផងដែរ។
បើតាមមន្ត្រីរដ្ឋាភិបាលថៃ បានប្រាប់សារព័ត៌មានបាងកកប៉ុស្ដិ៍ទៀតថា នៅមានមូលនិធិពីរទៀត នឹងត្រូវបានបង្កើតឡើងនៅពេលក្រោយទៀត រួមបញ្ចូលទាំងគម្រោងហេដ្ឋារចនាសម្ព័ន្ធហិរញ្ញវត្ថុ អាក់មិកស៍ ដែលវាគឺជាឧបករណ៍មួយដើម្បីប្រមូលទុនពីប្រទេសជាដៃគូ អ្នកវិនិយោគទូទៅ និងស្ថាប័នហិរញ្ញវត្ថុផ្សេងទៀត ដើម្បីអភិវឌ្ឍគម្រោងហេដ្ឋារចនាសម្ព័ន្ធដែលមានសក្ដានុពល។ រីឯ គម្រោងមូលនិធិមួយទៀតនោះ គឺនឹងអនុញ្ញាតឲ្យប្រទេសជាដៃគូ របស់អាក់មិកស៍ អាចបែងចែកមូលនិធិដើម្បីគាំទ្រដល់គម្រោងហេដ្ឋារចនាសម្ព័ន្ធនីមួយៗ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
