លោកស្រី ភីមឆាណុក វុន ករ ផុន មន្ត្រីជាន់ខ្ពស់នៃក្រសួងពាណិជ្ជកម្មថៃ បានគូសបញ្ជាក់ថា អំឡុងពេលនៃវិបត្តិនេះ ដៃគូពាណិជ្ជកម្មសំខាន់ៗរបស់ថៃ បានគ្រប់គ្រងលើការរីករាលនៃមេរោគ ហើយសង្ឃឹមថា វ៉ាក់ស៊ាំងនឹងត្រូវបានរកឃើញក្នុងពេលឆាប់ៗ ដែលអាចគាំទ្រដល់ ជំនួញពាណិជ្ជកម្មអន្តរជាតិឡើងវិញបាន។
លោកស្រី បន្តថា ការនាំចេញទំនិញរបស់ថៃ កើនឡើងវិញបន្តិចហើយ បើសិនជា ការនាំចេញជាមធ្យម នៅក្នុងរយៈពេល ៤ខែចុងឆ្នាំ ២០២០នេះ អាចសម្រេចបាន ២០ពាន់លានដុល្លារអាមេរិក ក្នុងមួយខែ នោះការនាំចេញសរុបប្រចាំឆ្នាំ នឹងសម្រេចបាន ២៣៤ពាន់លានដុល្លារអាមេរិក ធ្លាក់ចុះ ៥% ធៀបនឹងឆ្នាំមុន។ ហើយបើសិនជាសម្រេចបានតែ១៨ពាន់លានដុល្លារ ក្នុងមួយខែ នោះការនាំចេញប្រចាំឆ្នាំ នឹងធ្លាក់ចុះ ៨%។
អត្ថបទទាក់ទង!
មន្ត្រីជាន់ខ្ពស់រូបនេះ បន្ថែមថា ការធ្លាក់ចុះខ្លាំង ទំនងជាមិនអាចកើតឡើងទៀតទេ ក្នុងរយៈពេល ៤ខែចុងក្រោយនេះ ព្រោះថា ផលិតផលចំណីអាហារ និងសម្ភារៈប្រើប្រាស់ក្នុងផ្ទះ កំពុងបង្ហាញពី សក្តានុពលខ្ពស់ ដោយសារតែ ការផ្លាស់ប្តូរទម្លាប់រស់នៅរបស់អ្នកប្រើប្រាស់។
សូមជម្រាបថា គិតត្រឹមរយៈពេល ៨ខែ ឆ្នាំ២០២០នេះ ថៃ សម្រេចការនាំចេញទំនិញជា ១៥៣ពាន់លានដុល្លារអាមេរិក ធ្លាក់ចុះ ៧% ខណៈការនាំចូលមានជាង ១៣៥ពាន់លានដុល្លារអាមេរិក ធា្លក់ចុះ ១៥%ធៀបនឹងពេលដូចគ្នាកាលពីឆ្នាំមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
