ការនាំចេញរបស់ថៃតាមរយៈកិច្ចព្រមព្រៀងពាណិជ្ជកម្មសេរីនិងប្រព័ន្ធអនុគ្រោះពន្ធធ្លាក់ចុះជាង១០%នៅឆ្នាំ២០២០

លោក កៀរ៉ាទី រាស់ឆានូ អគ្គនាយកនៃនាយកដ្ឋានពាណិជ្ជកម្មបរទេស នៃក្រសួងពាណិជ្ជកម្មថៃ បានបញ្ជាក់នៅក្នុងសារព័ត៌មានបាងកកប៉ុស្ដិ៍នាពេលថ្មីៗនេះថា ការនាំចេញរបស់ថៃ តាមរយៈកិច្ចកិច្ចព្រមព្រៀងពាណិជ្ជកម្មសេរី មានទំហំទឹកប្រាក់សរុបជាង៥៨ពាន់លានដុល្លារអាមេរិក ធ្លាក់ចុះជាង១១% ខណៈដែលការនាំចេញក្រោមការអនុគ្រោះពន្ធទូទៅ GSP វិញមានប្រមាណ ជាង៤ពាន់លានដុល្លារ កើនឡើងជាង៥%។

តើថៃ មានកិច្ចព្រមព្រៀងពាណិជ្ជកម្មសេរី និងទទួលភាពអនុគ្រោះពន្ធទូទៅ ពីប្រទេសណាខ្លះ?

ការនាំចេញទៅកាន់ទីផ្សារធំៗចំនួន៥ ដែលថៃមានកិច្ចព្រមព្រៀងពាណិជ្ជកម្មសេរីជាមួយ រួមមាន ទីផ្សារអាស៊ានមានទំហំទឹកប្រាក់ជាង១៩ពាន់លានដុល្លារ, ទីផ្សារចិន១៩ពាន់លានដុល្លារ, អូស្ត្រាលីប្រមាណ ៧ពាន់លានដុល្លារ, ជប៉ុនជាង៦ពាន់លានដុល្លារ និងឥណ្ឌា មានជាង៣ពាន់លានដុល្លារ។

ផលិតផលភាគច្រើនដែលមានការនាំចេញទៅកាន់ទីផ្សារទាំងនោះ រួមមានផលិផលកៅស៊ូ ផ្លែឈើ រថយន្ដដឹកទំនិញ ម៉ាស៊ីនត្រជាក់ និងម្សៅដំឡូងមីជាដើម។

បច្ចុប្បន្នប្រទេសថៃ មានកិច្ចព្រមព្រៀងពាណិជ្ជកម្មសេរីចំនួន១៣ ខណៈដែលប្រព័ន្ធអនុគ្រោះពន្ធវិញ សហរដ្ឋអាមេរិកនៅតែមានផ្ដល់ភាពអនុគ្រោះច្រើនជាងគេបំផុតសម្រាប់ប្រទេសថៃ បន្ទាប់មកគឺប្រទេសស្វីស និងរុស្ស៊ីជាដើម។

នៅឆ្នាំ២០២០ ថៃមានការនាំចេញសរុប ជាង២៣០ពាន់លានដុល្លារ ធ្លាក់ចុះជាង៦% ធៀបនឹងឆ្នាំ២០១៩៕