នាយកប្រតិបត្តិក្រុមហ៊ុន PTT លោក Auttapol Rekpiboon បាននិយាយថា ក្រុមប្រឹក្សានាយករបស់ក្រុមហ៊ុន PTT បានយល់ព្រមលើការលក់ភាគហ៊ុនទាំងស្រុងរបស់ក្រុមហ៊ុន PTT Mining ជាបុត្រសម្ព័ន្ធរបស់ក្រុមហ៊ុនថៃ PTT International Holdings ទៅឱ្យក្រុមហ៊ុន PT Astrindo Nusantara Infrastruktur ដែលបានចុះបញ្ជីនៅក្នុងប្រទេសឥណ្ឌូនេស៊ី។
កិច្ចព្រមព្រៀងលក់ភាគហ៊ុននេះមានតម្លៃ ៧៤១ លានដុល្លារ ហើយប្រតិបត្តិការក្រុមហ៊ុននេះត្រូវបានរំពឹងថា នឹងបញ្ចប់នៅត្រីមាសទី៤ឆ្នាំនេះ ដែលជាការកត់សម្គាល់ចុងបញ្ចប់នៃប្រតិបត្តិការរុករករ៉ែធ្យូងថ្មរបស់ក្រុមហ៊ុន PTT ដែលក្រុមហ៊ុននេះ បានព្យាយាមលក់អាជីវកម្មនេះអស់ជាច្រើនឆ្នាំមកហើយ។
លោក Auttapol បាននិយាយថា "ប្រតិបត្តិការនេះនឹងបង្វែរការវិនិយោគរបស់ក្រុមហ៊ុន PTT ទៅលើអាជីវកម្មធ្យូងថ្ម ដែលស្របតាមយុទ្ធសាស្រ្តរបស់ក្រុមហ៊ុន PTT ទាំងអស់ ឱ្យឆ្ពោះទៅរកនិរន្តរភាព និងថាមពលស្អាត។
ក្រុមហ៊ុន PTT បានចាប់ផ្ដើមអាជីវកម្មប្រេង និងឧស្ម័ននៅក្នុងឆ្នាំ១៩៧៨បន្ទាប់ពីប្រទេសថៃបានរកឃើញរ៉ែឧស្ម័នធម្មជាតិនៅឈូងសមុទ្រថៃ ដោយក្រុមហ៊ុននេះបានដើរតួនាទីដ៏សំខាន់ធានារុករក និងផលិតប្រេង និងឧស្ម័ន ដើម្បីធានាការផ្គត់ផ្គង់ថាមពលសម្រាប់ប្រទេសថៃ និងជំរុញសេដ្ឋកិច្ចជាតិផងដែរ។
អត្ថបទគួរអាន
ទោះជាយ៉ាងណា ក្រុមហ៊ុន PTT ក្នុងនាមជាសហគ្រាសរដ្ឋត្រូវគោរពតាមការប្តេជ្ញាចិត្តផ្នែកបរិស្ថានរបស់រដ្ឋាភិបាលដើម្បីឈានដល់អព្យាក្រឹតភាពកាបូននៅឆ្នាំ២០៥០ និងគ្មានការបំភាយឧស្ម័នទាំងស្រុងនៅឆ្នាំ២០៦៥។ នាយករដ្ឋមន្ត្រីថៃលោក Prayuth Chan-ocha បានប្រកាសពីគោលដៅនៃការបំភាយឧស្ម័នរបស់ប្រទេសថៃបែបនេះនៅក្នុងកិច្ចប្រជុំ COP26 របស់អង្គការសហប្រជាជាតិនៅខែវិច្ឆិកា ឆ្នាំ២០២១។
បន្ទាប់ពីការប្រកាសនោះមក ក្រុមហ៊ុន PTT បានបង្ហាញផែនការឆ្ពោះទៅរកពណ៌បៃតងក្នុងគោលបំណងកាត់បន្ថយការបំភាយឧស្ម័នផ្ទះកញ្ចក់ឱ្យបាន ៧០% នៅឆ្នាំ២០៣០។
អ្នកវិភាគម្នាក់ប្រចាំក្រុមហ៊ុន Asia Plus Securities បាននិយាយថា "វាជាពេលវេលាដ៏ល្អក្នុងការលក់អាជីវកម្មជីកយករ៉ែធ្យូងថ្មនេះស្របពេលដែលតម្លៃធ្យូងថ្មពិភពលោកកំពុងកើនឡើងដោយសារក្រុមហ៊ុន PTT ក៏នឹងទទួលបានតម្លៃល្អផងដែរ។ អ្នកវិភាគរូបនោះបានបន្ថែមថា ការដកខ្លួនចេញនេះ គឺជាជំហានដ៏សំខាន់មួយនៅក្នុងកិច្ចខិតខំប្រឹងប្រែងរបស់ក្រុមហ៊ុន PTT ដើម្បីចាកចេញពីអាជីវកម្មឥន្ធនៈហ្វូស៊ីល ឆ្ពោះទៅកាន់អាជីវកម្មបៃតងមិនប៉ះពាល់បរិស្ថាន៕
