លោក Jirawuth Suwanna-arj អគ្គទីប្រឹក្សាពាណិជ្ជកម្មនៅស្ថានរាជទូតថៃ ប្រចាំកម្ពុជា បានលើកឡើងនៅក្នុងកិច្ចជំនួបស្វែងរកដៃគូពាណិជ្ជកម្មរវាងពាណិជ្ជករកម្ពុជា និងថៃ កាលពីពេលថ្មីៗនេះថា ក្នុងចំណោមក្រុមហ៊ុនថៃ ដែលបានចូលរួមជាង ៣០ក្រុមហ៊ុននៅក្នុងជំនួបនេះ ក៏មានក្រុមហ៊ុនដឹកជញ្ជូនថៃមួយចំនួនបាននិងកំពុងស្វែងរកដៃគូសហការ ជាមួយនឹងក្រុមហ៊ុនក្នុងស្រុកនៅកម្ពុជាផងដែរ ដើម្បីផ្ដល់សេវាដឹកជញ្ជូនទៅមករវាងប្រទេសទាំងពីរ និងទៅកាន់ពិភពលោកកាន់តែមានភាពទូលំទូលាយ ខណៈដែលរាជរដ្ឋាភិបាលប្រទេសទាំងពីរ បានប្ដេជ្ញានឹងពង្រីកទំហំពាណិជ្ជកម្មទ្វេភាគី កម្ពុជា-ថៃ ឲ្យបានដល់១៥ពាន់លានដុល្លារ នៅត្រឹមឆ្នាំ២០២០ខាងមុខ ជាមួយនឹងការធ្វើឲ្យប្រសើរឡើងនូវអតុល្យភាពពាណិជ្ជកម្មផងដែរ។
លោក ស៊ិន ចន្ធី ប្រធានសមាគមភ្នាក់ងារអ្នកដឹកជញ្ជូនទំនិញកម្ពុជា បានលើកឡើងដែរថា បច្ចុប្បន្នកម្ពុជាមានទំនាក់ទំនងដោះដូរពាណិជ្ជកម្ម យ៉ាងមមាញឹកជាមួយនឹងប្រទេសជិតខាង ពិសេសគឺថៃតែម្ដង ដូច្នេះវិស័យដឹកជញ្ជូនរវាងប្រទេសទាំងពីរក៏ត្រូវតែមានភាពប្រទាក់ក្រឡា និងឆ្លើយតបទៅនឹងតម្រូវការនៃការលូតលាស់ផ្នែកសេដ្ឋកិច្ច ពាណិជ្ជកម្មនេះដែរ ហើយលោក ស្វាគមន៍ជានិច្ចក្នុងការសហការជាមួយនឹងក្រុមហ៊ុនដឹកជញ្ជូនពីប្រទេសថៃ។
លោក ស៊ិន ចន្ធី ប្រធានសមាគមភ្នាក់ងារអ្នកដឹកជញ្ជូនទំនិញកម្ពុជា
យ៉ាងណាក៏ដោយចុះ លោកថា ស៊ិន ចន្ធី បានគូសបញ្ជាក់ថា ភាគីទាំងពីរ គឺក្រុមហ៊ុនដឹកជញ្ជូន ថៃនិងកម្ពុជា និងបន្តជួបពិភាក្សាគ្នាបន្តទៀត មុននឹងសម្រេចចាប់ដៃគ្នាជាដៃគូពេញលេញសម្រាប់ប្រតិបត្តិការ។ ប្រធានសមាគមភ្នាក់ងារអ្នកដឹកជញ្ជូនទំនិញរូបនេះ បានលើកឡើងទៀតថា វិស័យដឹកជញ្ជូនរបស់កម្ពុជាត្រូវការពង្រីកសមត្ថភាពបន្ថែមជាច្រើនទៀត ដើម្បីអាចប្រកួតប្រជែងជាមួយប្រទេសជិតខាង ខណៈដែលបច្ចុប្បន្ន ខាងរាជរដ្ឋាភិបាលកម្ពុជាក៏បាននិងកំពុងខិតខំអភិវឌ្ឍហេដ្ឋារចនាសម្ព័ន្ធជាច្រើនទាំងផ្នែករឹង និងទន់ ដើម្បីគាំទ្រដល់វិស័យដឹកជញ្ជូននេះផងដែរ សំដៅធ្វើយ៉ាងឲ្យតម្លៃដឹកជញ្ជូនកាន់តែមានតម្លៃថោក និងភាពប្រកួតប្រជែង។
សូមជម្រាបដែរថា តាមការអះអាងពីលោក Jirawuth Suwanna-arj អគ្គទីប្រឹក្សាពាណិជ្ជកម្មនៅស្ថានរាជទូតថៃ ប្រចាំកម្ពុជា បានឲ្យដឹងថា គិតត្រឹមឆ្នាំ២០១៧ ទំហំពាណិជ្ជកម្មរវាងកម្ពុជា និងថៃ មានរហូតដល់ប្រមាណជាង ៦ពាន់លានដុល្លារអាមេរិក ដែលក្នុងនោះ ថៃនាំចូលមកកម្ពុជាមានជាង ៥ពាន់លានដុល្លារ ខណៈដែលកម្ពុជានាំចេញទៅថៃមានតែប្រមាណ ៩០០ លានដុល្លារប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
