តាមការព្យាករចុងក្រោយរបស់ស្ថាប័នខ្លះថា GDP របស់ថៃ នៅឆ្នាំនេះ អាចនឹងធ្លាក់ចុះជាង៨% ខណៈដែលខ្លះទៀតថា អាចនឹងធ្លាក់ដល់ជាង១១%ឯណោះ។ ទោះយ៉ាងណា កាលពីម្សិលមិញ លោកនាយករដ្ឋមន្ត្រីថៃ ប្រយុទ្ធ ចាន់អូចារ បានចេញមុខអះអាងថា សេដ្ឋកិច្ចថៃនៅឆ្នាំ២០២០នេះ អាចនឹងមានក្រោម១០% ប៉ុណ្ណោះ។
លោក បា្រយុទ្ធ អះអាងបែបនេះ ដោយ លោកផ្អែកទៅលើស្ថានភាពប្រទេសថៃនៅមានមូលដ្ឋានសេដ្ឋកិច្ចរឹងមាំ និងមានការគ្រប់គ្រងការឆ្លងរីករាលដាលកូវីដ-១៩ បានយ៉ាងមានប្រសិទ្ធភាព។
លោកប្រយុទ្ធបានអួតសរសើរទៀតថា សេដ្ឋកិច្ចថៃបានកើនឡើង១% កាលពីឆ្នាំ២០១៤ បន្ទាប់ពីលោកបានចូលកាន់តំណែងជានាយករដ្ឋមន្ត្រីនៅក្នុងខែសីហានៅឆ្នាំនោះហើយនៅឆ្នាំ២០១៥ បានកើនឡើង៣,១% និងឆ្នាំ២០១៦ កើន៣,៤%។
អត្ថបទទាក់ទង!
លោកនាយករដ្ឋមន្ត្រីថៃបន្ថែមទៀតថា កំណើនសេដ្ឋកិច្ចមាននិន្នាការបន្តមកជាប់រហូតទើបតែមកទល់នឹងឆ្នាំនេះទេ នៅពេលដែលមានផ្ទុះការីករាលដាលនៃមេរោគធ្វើឲ្យសេដ្ឋកិច្ចជួបនឹងបញ្ហាបែបនេះ។
ទោះយ៉ាងណា រាជរដ្ឋាភិបាលថៃ បានដាក់ចេញនូវការបន្ធូរបន្ថយវិធានការរឹតបន្តឹងជាបន្ដបន្ទាប់ដើម្បីជួយឲ្យអាជីវកម្ម ក៏ដូចជាពលរដ្ឋអាចរស់បាននៅក្នុងអំឡុងពេលមានវិបត្តិនេះ។
គួរបញ្ជាក់ថា នាពេលថ្មីៗនេះ សភាពាណិជ្ជកម្មថៃដែលតំណាងឲ្យវិស័យឯកជនបានធ្វើការកែប្រែការព្យាកររបស់ខ្លួនជាថ្មី ដោយបានព្យាករទម្លាក់GDP របស់ថៃថាអាចនឹងធ្លាក់ចុះរហូតដល់ ៩% នៅឆ្នាំ២០២០នេះ ខណៈដែលការនាំចេញរបស់ថៃ ក៏ត្រូវបានព្យាករដែរថា នឹងធ្លាកចុះ ១២%ផងដែរ នៅឆ្នាំនេះ។
អត្ថបទគួរអាន!
ថ្មីៗនេះដែរ សកលវិទ្យាល័យសភាពាណិជ្ជកម្មថៃ បានទម្លាក់ការព្យាករណ៍ជាថ្មី អំពី GDP របស់ថៃ ថាអាចនឹងធ្លាក់ចុះដល់ទៅ ១១.៤% នៅក្នុងឆ្នាំ ២០២០នេះ ដោយសារតែរងផលប៉ះពាល់ធំបំផុតពី បញ្ហាមេរោគកូវីដ១៩ និងកត្តាជាច្រើនទៀតដូចជា គ្រោះរាំងស្ងួត និងឥទ្ធិពលពី សង្គ្រាមពាណិជ្ជកម្មរវាងមហាអំណាចសេដ្ឋកិច្ចអាមេរិក និងចិន។
បើតាមការព្យាករពី ធនាគារកណ្តាលថៃវិញ GDP ថៃ នៅឆ្នាំនេះ អាចនឹងធ្លាក់ចុះប្រមាណ ៨.១% ដែលតួលេខនេះ អន់ខ្សោយជាងការព្យាករណ៍ជាផ្លូវការរបស់ បណ្តាប្រទេសនានា ក្នុងតំបន់អាស៊ីទៅទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
