មន្ត្រីជាន់ខ្ពស់មួយចំនួនរបស់ថៃ និសហភាពអឺរ៉ុប នឹងចាប់ផ្តើមការចរចាលើកិច្ចព្រមព្រៀងពាណិជ្ជកម្មសេរីទ្វេភាគីរួមគ្នានៅក្នុងខែកក្កដាក្នុងប្រទេសថៃ។ ការចរចានេះនឹងគ្របដណ្តប់លើពាណិជ្ជកម្មទំនិញ និងសេវាកម្មក៏ដូចជា ការវិនិយោគនៅក្នុងឧស្សាហកម្មសំខាន់ៗរបស់ប្រទេសថៃដែលសហភាពអឺរ៉ុបចង់បង្កើនចំណែកទីផ្សាររបស់ខ្លួនដូចជាថាមពលកកើតឡើងវិញ យានយន្តអគ្គិសនី និងការផលិតបន្ទះឈីបផងដែរ។
ប្រសិនបើកិច្ចចរចានេះជោគជ័យមែននោះ វានឹងក្លាយជាកិច្ចព្រមព្រៀងពាណិជ្ជកម្មសេរីទ្វេភាគីទី៣របស់សហភាពអឺរ៉ុបនៅក្នុងតំបន់អាស៊ីអាគ្នេយ៍បន្ទាប់ពីមានធ្វើជាមួយនឹងប្រទេសសិង្ហបុរីនៅក្នុងឆ្នាំ២០១៩ និងវៀតណាមនៅក្នុងឆ្នាំ២០២០។
លោក វ៉ល់ឌីស ដូមប្រូស្គីស (Valdis Dombrovskis) អនុប្រធានប្រតិបត្តិ និងជាស្នងការទទួលបន្ទុកពាណិជ្ជកម្មនៃគណៈកម្មការអឺរ៉ុបបាននិយាយនៅក្នុងសេចក្តីថ្លែងការណ៍ចេញផ្សាយកាលពីថ្ងៃពុធទី១៥មីនាថា កិច្ចព្រមព្រៀងពាណិជ្ជកម្មសេរី (FTA) ដ៏ទំនើបនិងមានថាមពលនេះ នឹងនាំទៅរកផលប្រយោជន៍សម្រាប់ភាគីទាំង២ និងពង្រឹងទំនាក់ទំនងពាណិជ្ជកម្មរបស់សហភាពអឺរ៉ុបជាមួយតំបន់ឥណ្ឌូប៉ាស៊ីហ្វិកផងដែរ។
ការប្រកាសនេះបានធ្វើឡើងបន្ទាប់ពីលោក Dombrovskis បាននិយាយជាមួយរដ្ឋមន្ត្រីក្រសួងពាណិជ្ជកម្មថៃលោក ជូរីន ឡាក់សាណាវីស៊ីត (Jurin Laksanawisit) កាលពីថ្ងៃទី១៥មីនា តាមរយៈប្រព័ន្ធវីដេអូពីចម្ងាយ។ ការពិភាក្សា ក្នុងការជំរុញឲ្យមានការចរចាពាណិជ្ជកម្មឡើងវិញនេះ បានចាប់ផ្តើមតាំងពីខែមករាមកម្ល៉េះ ដែលពេលនោះលោក Jurin បានដឹកនាំគណៈប្រតិភូទៅជួបលោក Dombrovskis នៅទីក្រុង Brussels ប្រទេសបែលហ្ស៊ិក ហើយគណៈរដ្ឋមន្ត្រីថៃកាលពីខែកុម្ភៈក៏បានអនុម័តពីផែនការរបស់លោក Jurin ដើម្បីបន្តការចរចានេះនៅខែក្នុងកក្កដាផងដែរ។
អត្ថបទគួរអាន
លោក Jurin បាននិយាយថា នេះគឺជាថ្ងៃប្រវត្តិសាស្ត្រសម្រាប់ភាគីទាំង២គឺប្រទេសថៃ និងសមាជិកសហភាពអឺរ៉ុបទាំង២៧ប្រទេស ដែលបានចាប់ផ្តើមជាផ្លូវការនូវជំហានដំបូងនៃការចរចាសម្រាប់កិច្ចព្រមព្រៀងពាណិជ្ជកម្មសេរីបន្ទាប់ពីបានព្យាយាមបែបនេះអស់រយៈពេលជិត ១០ ឆ្នាំមកហើយ ហើយមានបំណងបញ្ចប់កិច្ចចរចាឲ្យបានរួចរាល់ក្នុងរយៈពេល ២ ឆ្នាំគឺនៅត្រឹមឆ្នាំ២០២៥។
សហភាពអឺរ៉ុបគឺជាគោលដៅដ៏ធំទី២សម្រាប់មូលធនចេញក្រៅប្រទេសរបស់ប្រទេសថៃ ពោលគឺក្រុមហ៊ុនថៃបានផ្ទាល់នៅអឺរ៉ុបមានចំណែកដល់ទៅ១៤% នៃការវិនិយោគផ្ទាល់នៅក្រៅប្រទេសសរុបរបស់ថៃ។ ក្រុមហ៊ុនធំៗនៅក្នុងសហគមន៍ធុរកិច្ចថៃដូចជាក្រុមហ៊ុនអភិវឌ្ឍន៍អចលនទ្រព្យលក់រាយ Central Group បានប្តេជ្ញាបង្កើតមូលធននៅតំបន់អឺរ៉ុប ព្រោះប្លុកនេះគឺជាទីផ្សារនាំចេញដ៏ធំជាងគេទី៤របស់ប្រទេសថៃ សម្រាប់ផលិតផល អាហារ វត្ថុធាតុដើម និងគ្រឿងបន្លាស់អេឡិចត្រូនិចជាដើម។
ជាមួយគ្នានេះ ក្រុមហ៊ុនពីសហភាពអឺរ៉ុបដែលមានវិនិយោគផ្ទាល់មកកាន់ប្រទេសថៃវិញមានចំណែក ១០%។ ប្រទេសថៃបានជាប់ចំណាត់ថ្នាក់ទី ៤ ក្នុងចំណោមដៃគូពាណិជ្ជកម្មរបស់សហភាពអឺរ៉ុបនៅក្នុងតំបន់នេះ។ ការធ្វើពាណិជ្ជកម្មទ្វេភាគីរវាងសហភាពអឺរ៉ុប និងថៃសម្រាប់ទំនិញមានទំហំទឹកប្រាក់ចំនួន ៥៣ ពាន់លានដុល្លារនៅឆ្នាំ២០២២ ចំណែកពាណិជ្ជកម្មទ្វេភាគីលើសេវាកម្មវិញគឺមានចំនួនសរុបប្រមាណ១០ ពាន់លានដុល្លារក្នុងឆ្នាំ២០២០ ហើយអតិរេកពាណិជ្ជកម្មរបស់ប្រទេសថៃមានចំនួន ៤ពាន់៣រយលានដុល្លារ៕
អត្ថបទ ៖ សុខ ជា
