ថៃដាក់គោលដៅនាំចេញអង្ករ៦លានតោននៅឆ្នាំនេះ

មន្ត្រីជាន់ខ្ពស់ក្រសួងពាណិជ្ជកម្មថៃ បាននិយាយថា ក្នុងចំណោមអង្ករ៦លានតោននោះ ការនាំចេញអង្ករសរំពឹងថានឹងមាន២លានតោន ខណៈដែលអង្ករក្រអូបហំម៉ាលី ១លាន៥សែនតោន និងប្រភេទអង្ករមួយចំនួនទៀត។

ការនាំចេញអង្ករថៃនៅតែប្រឈមនឹងបញ្ហា ដូចជា ការឡើងថ្លៃនៃប្រាក់បាត កង្វះខាតកុងតឺន័រ ឬតម្លៃមានខ្ពស់ជាងដៃគូប្រជែងដទៃទៀត។ លើសពីនេះ ការបញ្ជាទិញចុះអន់ខ្សោយនៃបណ្ដាប្រទេសនាំចូលអង្ករ ដោយសារតែវិបត្តិកូវីដ-១៩ ក៏នឹងមានផលប៉ះពាល់ដល់តម្រូវការបញ្ជាទិញអង្ករផងដែរ។

នៅឆ្នាំ២០២០ ប្រទេសថៃ បាននាំចេញអង្ករប្រមាណជាង៥លាន៧សែនតោន ធ្លាក់ចុះបន្តិចធៀបនឹងឆ្នាំ២០១៩ ខណៈដែលតម្លៃនាំចេញអង្ករនៅឆ្នាំ២០២០ មានជាង៣ពាន៧រយលានដុល្លារ ធ្លាក់ចុះពីជាង ៤ពាន់២រយលានដុល្លារ កាលពីឆ្នាំ២០៩។

កាលពីឆ្នាំ២០២០ កន្លងទៅ ប្រទេសឥណ្ឌាបានឈរក្នុងកំពូលតារាងដែលជាអ្នកនាំចេញអង្ករច្រើនជាងគេក្នុងពិភពលោក ដោយមានបរិមាណនាំចេញ១៤លានតោន តាមពីក្រោយដោយវៀតណាមមានជាង៦លានតោន បន្ទាប់មកថៃមានជាង៥លាន៧សែនតោន, ប៉ាគីស្ថានមាន៤លានតោន និងអាមេរិកមានប្រមាណ៣លានតោន។