អ្នកនាំពាក្យរដ្ឋាភិបាលថៃ លោក ថាណាកន វ៉ាងប៊ូនគុងឆាណា (Thanakorn Wangboonkongchana) ថ្លែងក្នុងសន្និសីទសារព័ត៌មានមួយថា ទឹកប្រាក់ប្រមាណ១៦ពាន់លានបាត ឬស្មើនឹងជាង ៤៨០លានដុល្លារអាមេរិក នឹងត្រូវរដ្ឋាភិបាលក្រុងបាងកក ឧបត្ថម្ភជាលើកទី២ ទៅឲ្យកម្មករនិងនិយោជិតរស់នៅក្នុងខេត្តចំនួន១៣ ដែលបានរងគ្រោះ និងខ្លះបាត់បង់ការងារដោយសារកូវីដ-១៩។
ជាមួយគ្នានេះ ទឹកប្រាក់ប្រមាណ ៨០០លានបាត ឬស្មើនឹងជិត ២៥លានដុល្លារផ្សេងទៀតនឹងត្រូវបានរដ្ឋាភិបាលថៃផ្តល់ជូនផងដែរ ដល់កម្មករនិងនិយោជិតដែលមិនបានទទួលថវិកាអំឡុងពេលផ្តល់ប្រាក់ឧបត្ថម្ភលើកដំបូង។
បន្ថែមពីលើប្រាក់ឧបត្ថម្ភអំឡុងពេលវិធានការរឹតត្បិត គណៈរដ្ឋមន្ត្រីថៃបានអនុម័តថវិកាសម្រាប់កម្ចីការប្រាក់ទាប ប្រមាណ២០ពាន់លានបាតឬស្មើនឹងជាង ៦០០លានដុល្លារ ដល់កម្មករដែលមានប្រាក់ចំណូលប្រចាំខែទាប សម្រាប់យកទៅបង់ថ្លៃឈ្នួលផ្ទះស្នាក់នៅ។អត្ថបទគួរអាន
កម្ចីខាងលើនេះ នឹងផ្តល់ជូនអត្រាការប្រាក់ ១,៩% ក្នុងរយៈពេល៤ឆ្នាំដំបូង សម្រាប់អ្នកខ្ចីដែលមានប្រាក់ចំណូលប្រចាំខែទាបបំផុត ២៥,០០០បាត ឬស្មើនឹងប្រមាណជាង៧៦០ដុល្លារ និងសម្រាប់កម្ចីបង់ថ្លៃផ្ទះរហូតដល់ប្រមាណជាង ១លានបាត ឬស្មើនឹងប្រមាណ ៣ម៉ឺនដុល្លារអាមេរិក។
សូមជម្រាបថា រហូតមកដល់ពេលនេះ រដ្ឋាភិបាលថៃបានយល់ព្រមផ្តល់ទឹកប្រាក់ចំនួន ៣៤ពាន់លានបាត ឬស្មើនឹងជាង១ពាន់លានដុល្លាររួចហើយ សម្រាប់អ្នកដែលរងផលប៉ះពាល់ដោយសារវិធានការរឹតត្បិត ដែលបានដាក់ចេញជាច្រើនលើកច្រើនសារមកហើយ ដើម្បីទប់ទល់នឹងរលកឆ្លងកូវីដ១៩ក្នុងប្រទេសថៃ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
