ទីភ្នាក់ងារជំរុញសេដ្ឋកិច្ចឌីជីថលរបស់ប្រទេសថៃ បានធ្វើការស្ទង់មតិអំពី វិស័យឌីជីថលរបស់ប្រទេសថៃ និងធ្វើការព្យាករចំនួន ៣ឆ្នាំ គិតចាប់ពីឆ្នាំ ២០២០នេះទៅ ដោយផ្នែកទៅលើ គន្លឹះស្នូលសំខាន់ៗ ដូចជា Software Hardware ឧបករណ៍វៃឆ្លាត សេវាកម្មឌីជីថល និងទិន្នន័យឌីជីថលជាដើម។
បើតាមអ្នកជំនាញបានអះអាងថា វិស័យសេវាកម្មឌីជីថល ទំនងជាអាចលូតលាស់ខ្លាំងជាងគេ ក្នុងឆ្នាំនេះ កើនដល់ទៅ ២០% ឯណោះ ដោយសារ វិធានការទប់ស្កាត់ការឆ្លងមេរោគកូវីដ១៩ បានធ្វើឲ្យ ប្រជាពលរដ្ឋថៃ និងអាជីវកម្មជាច្រើន បែរត្រលប់ទៅរក ប្រព័ន្ធបច្ចេកវិទ្យាតាមអនឡាញ។
វិស័យសេវាកម្មឌីជីថលទាំងអស់នោះ រាប់បញ្ចូលទាំង ពាណិជ្ជកម្មតាមប្រព័ន្ធអនឡាញ បច្ចេកវិទ្យាហិរញ្ញវត្ថុ ការផ្សព្វផ្សាយបែបឌីជីថល និងការទូទាត់ប្រាក់ជាដើម។
អត្ថបទទាក់ទង!
អ្នកជំនាញបន្តថា អាជីវកម្មបែបប្រពៃណីជាច្រើន កំពុងតែផ្លាស់ប្តូរទៅកាន់ បណ្តាញអនឡាញ ដែលជាការប្រែប្រួលដ៏ធំធេង ជាពិសេសក្នុង វិស័យលក់រាយ ហើយគ្រាន់តែ ការផ្តល់សេវាកម្មឌីជីថល នឹងកើនដល់ ៨ពាន់លានដុល្លារអាមេរិក ក្នុងឆ្នាំ ២០២២។
គួររម្លឹកបន្តិចដែរថា ដោយសារតែ វិស័យប្រព័ន្ធពាណិជ្ជកម្មតាមអនឡាញ នៅក្នុងប្រទេសថៃ កាន់តែមានភាពរស់រវើក និងទាក់ទាញ ប្រទេសថៃ ប្រកាសហាមឃាត់ការលក់ ភេសជ្ជៈដែលមានជាតិអាល់កុល ឬគ្រឿងស្រវឹង នៅតាមប្រព័ន្ធអនឡាញនានាទាំងអស់ ដែលសេចក្តីប្រកាសនេះ ត្រូវបានចុះហត្ថលេខាដោយ នាយករដ្ឋមន្ត្រី ថៃ ប្រាយុទ្ធ ច័ន្ទអូចា កាលពីពេលថ្មីៗនេះ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
