រដ្ឋាភិបាលថៃបាននិយាយថា ការនាំចេញអង្ករបានកើនឡើងដល់ ២លាន៨សែនតោនចាប់ពីខែមករាដល់ខែមេសា ដោយបរិមាណនៃការនាំចេញសម្រាប់រយៈពេលពេញមួយឆ្នាំ ២០២៣ ត្រូវបានព្យាករណ៍ថានឹងមានលើសពី ៨ លានតោន។
អ្នកនាំពាក្យរដ្ឋាភិបាលថៃ លោក អានុចា ប៊ូរ៉ាប៉ាឆៃស្រ៊ី ( Anucha Burapachaisri) បានថ្លែងថា នាយករដ្ឋមន្ត្រីចាំផ្ទះ លោក ប្រាយុទ្ធ ចាន់អ៊ូចារ មានការភ្ញាក់ផ្អើលចំពោះតួលេខនៃការនាំចេញ ដែលមានតម្លៃជាង ៥១ ពាន់លានបាត ឬ ១,៥ ពាន់លានដុល្លារ ដោយកើនឡើង ២៣% ធៀបនឹងរយៈពេលដូចគ្នាកាលពីឆ្នាំមុន។
អត្ថបទគួរអាន
ជុំវិញអនាគតទីផ្សារអង្ករថៃក្រោយរដ្ឋាភិបាលថ្មីកើតឡើងបន្ទាប់ពីការបោះឆ្នោត, សមាគមអ្នកនាំចេញអង្ករថៃបាននិយាយថា ខ្លួនមិនអាចឃើញភាពច្បាស់លាស់ណាមួយក្នុងវិធានការដោះស្រាយតម្លៃកសិផលដោយគណបក្សឆ្ពោះទៅមុខ ឬគណបក្សភឿថៃ ដែលអាចជាគណបក្សសំខាន់ពីរក្នុងការបង្កើតរដ្ឋាភិបាលថ្មីនាពេលអនាគតនៅឡើយ។ ពួកគេកំពុងដាក់ចេញនូវអនុស្សរណៈនៃការយោគយល់គ្នា ដែលគ្របដណ្តប់លើផ្នែកគោលនយោបាយសំខាន់ៗ ដែលជាផ្នែកមួយនៃកិច្ចព្រមព្រៀង។
អគ្គនាយកដ្ឋានពាណិជ្ជកម្មនៅក្នុងស្រុកថៃបានព្យាករណ៍ថា ការនាំចេញអង្ករនៅឆ្នាំ ២០២៣នឹងឈានដល់ ៨ លានតោន កើនឡើងពី ៧,៦៩ លានតោនក្នុងឆ្នាំ ២០២២។
លោក ឧត្តម ស្រ៊ីសាំសុង ( Udom Srisomsong) អគ្គនាយករងនៃអគ្គនាយកដ្ឋានពាណិជ្ជកម្មនៅក្នុងស្រុក បាននិយាយថា តម្រូវការអង្កររបស់ពិភពលោកពីប្រទេសថៃ នៅតែរឹងមាំ ហើយតម្លៃក៏នៅតែអាចរក្សាបានខ្ពស់។
បច្ចុប្បន្ន ថៃជាប្រទេសនាំចេញអង្ករធំជាងគេទីពីររបស់ពិភពលោកបន្ទាប់ពីប្រទេសឥណ្ឌា។ ទីផ្សារសំខាន់ៗសម្រាប់អង្ករថៃរួមមានអ៊ីរ៉ាក់ ឥណ្ឌូនេស៊ី អាមេរិក អាហ្រ្វិកខាងត្បូង សេណេហ្គាល់ បង់ក្លាដែស ចិន ជប៉ុន កាមេរូន និងម៉ូសំប៊ិក៕
