ថៃគ្រោងនឹងផ្អាកវិធានការលើកលែងចត្តាឡីស័កសម្រាប់ទេសចរអន្តរជាតិ ក្រោយអូមីក្រុងចូលលុកលុយកាន់តែច្រើន

ក្រសួងសុខាភិបាលថៃ នឹងណែនាំឲ្យមានការផ្អាកនូវការបើកទទួលភ្ញៀវទេសចរចាក់វ៉ាក់សាំងរួចអាចចូលប្រទេសខ្លួនដោយមិនចាំបាច់ធ្វើចត្តាឡីស័ក ក្រោយមានក្ដីបារម្ភកាន់តែខ្លាំងពីការឆ្លងរីករាលដាលនៃមេរោគបំប្លែងថ្មីអូមីក្រុង ដ្បិតថា នៅថ្ងៃទី២០ ខែធ្នូនេះ ប្រទេសថៃទើបតែរកឃើញនូវករណីឆ្លងមេរោគបំប្លែងថ្មី អូមីក្រុង ចូលក្នុងសហគមន៍ជាលើកដំបូង ខណៈដែលករណីអូមីក្រុងនាំចូល ក៏មានជាង៦០ករណីផងដែរមកទល់ពេលនេះ។ នេះបើតាមការរាយការណ៍ដោយសារព័ត៌មានបាងកកប៉ុស្ដិ៍។

អ្នកដំណើរកំពុងឆែកលិខិតឯកសារកូវីដ១៩នៅព្រលានយន្តហោះថៃ

រដ្ឋមន្ត្រីក្រសួងសុខាភិបាលថៃ លោក អានូទីន បាននិយាយនៅថ្ងៃចន្ទសប្ដាហ៍នេះថា លោកនឹងដាក់សំណើទៅកាន់មជ្ឈមណ្ឌលគ្រប់គ្រងស្ថានការកូវីដ១៩ ដើម្បីឲ្យផ្អាកការអនុញ្ញាតឲ្យទេសចរអន្តរជាតិបានចាក់វ៉ាក់សាំងរួចចូលមកក្នុងប្រទេសថៃដោយមិនចាំបាច់ធ្វើចត្តាឡីស័ក ពោលគឺថៃ នឹងតម្រូវឲ្យភ្ញៀវទេសចរអន្តរជាតិត្រូវអនុវត្តការធ្វើចត្តាឡីស័កឡើងវិញទៅតាមកម្មវិធីដែលរដ្ឋាភិបាលធ្លាប់បានដាក់ចេញនាពេលកន្លងមក។

មន្ត្រីសុខាភិបាលថៃ អះអាងថា កម្មវិធីបើកឲ្យទេសចរអន្តរជាតិចូលមកក្នុងប្រទេសថៃដោយមិនចាំបាច់ធ្វើចត្តាឡីស័កនាពេលកន្លងមកនេះ ហាក់មានភាពចន្លោះប្រហោង ដោយបណ្ដាលឲ្យមានករណីឆ្លងមេរោគបំប្លែងថ្មីអូមីក្រុងចូលក្នុងប្រទេសថៃ។

យ៉ាងណាមិញ នៅថ្ងៃទី ២០ ខែធ្នូនេះ ប្រទេសថៃ ក៏បានរកឃើញករណីឆ្លងមេរោគបំប្លែងថ្មី អូមីក្រុង ដែលជាករណីឆ្លងចូលសហគមន៍ជាលើកដំបូងផងដែរ ដែលករណីនេះ បានរកឃើញលើស្ត្រីជនជាតិថៃម្នាក់ដែលមានវ័យ ៤៩ឆ្នាំ ដែលបានឆ្លងពីប្ដីរបស់គាត់ ដែលជាអាកាសនិក និងបានធ្វើដំណើរមកពី ប្រទេសនីហ្សរីយ៉ា។ បច្ចុប្បន្ន មានអ្នកពាក់ព័ន្ធមួយចំនួនទៀតជាមួយស្ដ្រីវិជ្ជាមានអូមីក្រុងរូបនេះ ក៏ត្រូវបានតាមដាន និងធ្វើតេស្ដផងដែរ ប៉ុន្ដែមានលទ្ធផលអវិជ្ជមាន។ នៅមុនពេលរកឃើញករណីឆ្លងអូមីក្រុងក្នុងសហគមន៍ ប្រទេសថៃក៏បានរកឃើញករណីវិជ្ជមានអូមីក្រុង ជាបន្ដបន្ទាប់ផងដែរ ដែលករណីនាំចូល។

គិតមកទល់ពេលនេះ ប្រទេសថៃបានរកឃើញករណីវិជ្ជមានអូមីក្រុងសរុប ៦៣ករណីហើយ និងមាន២០ករណីកំពុងស្ថិតក្នុងការសង្ស័យ។

បើគិតតាំងពីថ្ងៃទី ១១ ដល់ថ្ងៃទី ១៩ ខែធ្នូ ករណីអូមីក្រុង ត្រូវបានរកឃើញក្នុងអត្រា ជាង៣% នៃករណីឆ្លងកូវីដ១៩នៅទូទាំងប្រទេសថៃ ប៉ុន្ដែក្នុងនោះ ក្រុងបាងកក គឺមានការរកឃើញអូមីក្រុងជាង ១៨% នៃករណីឆ្លងកូវីដ១៩សរុបនៅទូទាំងប្រទេសថៃ៕