គេនៅចាំបានថា ប្រទេសថៃបានចាប់ផ្ដើមបើកទទួលទេសចរបរទេសដែលបានចាក់វ៉ាក់សាំងរួច នៅលើកដំបូងកាលពីខែវិច្ឆិកាឆ្នាំ២០២១ ដោយកាលនោះ ថៃទទួលយកទេសចរបរទេសមកពី ៦៣ ប្រទេសប៉ុណ្ណោះ។ លុះក្រោយមក នៅខែធ្នូឆ្នាំ២០២១ គម្រោងនេះក៏ត្រូវបានផ្អាកទៅវិញ ដោយសារតែវត្តមានអូមីក្រុងបានចូលលុកលុយខ្លាំងនៅក្នុងប្រទេសថៃ ពិសេសបានរកឃើញជាបន្ដបន្ទាប់នូវករណីវិជ្ជមានលើភ្ញៀវទេសចរបរទេស។
នៅអំឡុងពេលដែលប្រទេសថៃ បានបើកអនុញ្ញាតឲ្យភ្ញៀវទេសចរបរទេសចូលក្នុងប្រទេសថៃ ដោយមានលើកលែងការធ្វើចត្តាឡីស័ក គេសង្កេតឃើញថា ចំនួនភ្ញៀវទេសចរបរទេសបានហក់ឡើងគួរឲ្យកត់សម្គាល់។ តួយ៉ាង នៅក្នុងខែវិច្ឆិកា ឆ្នាំ២០២១ ភ្ញៀវទេសចរបរទេសចូលទៅកម្សាន្ដនៅប្រទេសថៃ ចំនួនជាង ៩ម៉ឺននាក់ ច្រើនជាងខែតុលាដល់ទៅ៤,៥ដង និងច្រើនជាងខែវិច្ឆិកាកាលពីឆ្នាំ២០២០ដលទ់ទៅជិត ៣០ ដង។ ទន្ទឹមនឹងនោះ រដ្ឋាភិបាលថៃសង្ឃឹមថា ការធ្វើដំណើរដោយគ្មានការតម្រូវឲ្យធ្វើចត្តាឡីស័ក នឹងជួយឱ្យប្រទេសខ្លួនសម្រេចបាននូវកំណើនសេដ្ឋកិច្ច ក្នុងរង្វង់ ៣,៥% ទៅ ៤,៥%នៅឆ្នាំ ២០២២នេះ ។
អត្ថបទគួរអាន
ទោះបីជាយ៉ាងនេះក្តី តួលេខទេសចរទំនងជាមិនត្រលប់ទៅដូចនឹងកម្រិតមុនកូវីដនោះទេ រហូតដល់ប្រទេសចិនបន្ធូរបន្ថយគោលនយោបាយគ្មានកូវីដ ខណៈបច្ចុប្បន្ន ប្រទេសដែលជាប្រភពទេសចរដ៏សំខាន់របស់ពិភពលោកមួយនេះ នៅតែបន្ដរឹតត្បិតការធ្វើដំណើរអន្តរជាតិនៅឡើយ។
សូមបញ្ជាក់ថា ប្រទេសថៃបានស្វាគមន៍ភ្ញៀវទេសចរចំនួនជិត ៤០លាននាក់ក្នុងឆ្នាំ ២០១៩ ដែលក្នុងនោះប្រហែល ២៨% មកពីប្រទេសចិន។ ចាប់តាំងពីខែសីហាឆ្នាំមុនមក ប្រទេសចិនបានដាក់ការត្រួតពិនិត្យព្រំដែនយ៉ាងតឹងរ៉ឹង ដើម្បីទប់ស្កាត់ជំងឺកូវីដ១៩ ហើយបើតាមការអះអាងរបស់មន្ត្រីជាន់ខ្ពស់ចិនកាលពីពេលកន្លងទៅ ការធ្វើដំណើរអន្តរជាតិរបស់ចិនអាចនឹងចាប់ផ្ដើមស្ទុះងើបឡើងវិញបាន គឺអាចនឹងនៅឆ្នាំ២០២៣ខាងមុខនេះ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
