ឧបនាយករដ្ឋមន្ត្រីថៃ លោក សមឃីត ជូទូស្រ៊ី ពីតាក់ បានស្នើដល់អង្គការពាណិជ្ជកម្មក្រៅប្រទេសជប៉ុន ហៅកាត់ថា Jetro ឲ្យជួយផ្ដល់ការគាំទ្រផ្នែកបច្ចេកទេស និងសម្របសម្រួល ជាមួយនឹងក្រុមហ៊ុនធំៗរបស់ជប៉ុន ដើម្បីផ្ដល់នូវបច្ចេកទេស និងគ្រឿងចក្រ ដែលពាក់ព័ន្ធ នឹងការធ្វើកសិកម្ម ទៅដល់វិស័យកសិកម្មរបស់ប្រទេសថៃ។
លោក សមឃីត និយាយថា បច្ចេកវិទ្យា និងគ្រឿងចក្រ ដូចជា ម៉ាស៊ីនហោះដោយគ្មានមនុស្សបើក ឬហៅថា Drone, គ្រឿងចក្រសម្រាប់ការប្រមូលផល និងត្រាក់ទ័រដែលមានបច្ចេកទេសទំនើបឆ្លាតវៃ គឺអាចជួយឲ្យវិស័យកសិកម្មថៃ អាចកាត់បន្ថយការចំណាយថ្លៃដើម និងបង្កើនផលិតផលកាន់តែប្រសើរឡើង។
អត្ថបទទាក់ទង!
ជាមួយគ្នានេះដែរ លោក អ៊ុតតាម៉ា សុវណ្ណា យ៉ាណា រដ្ឋមន្ត្រីក្រសួងហិរញ្ញវត្ថុថៃ បានលើកឡើងដែរថា ធនាគារកសិកម្ម និងសហករណ៍ថៃ BAAC នឹងពង្រីកប្រាក់កម្ចី ២០ពាន់លានបាត ឬស្មើនឹងជាង ៦៤០ លានដុល្លារអាមេរិក ជាមួយនឹងអត្រាការប្រាក់ទាប នៅឆ្នាំនេះ ដើម្បីគាំទ្រដល់កសិករឆ្លាតវៃ, អាជីវកម្មសហគមន៍ និងសហករណ៍កសិកម្ម ក្នុងដំណើរការអភិវឌ្ឍអាជីវកម្ម និងបង្កើនសមត្ថភាពផលិតកម្មរបស់ពួកគេ។
ប្រាក់កម្ចីដែលនឹងផ្ដល់ជូននេះ គឺសម្រាប់កសិករយកទៅប្រើប្រាស់លើការទិញ គ្រឿងចក្រ សម្រាប់ប្រើប្រាស់ជំនួសឲ្យកម្លាំងពលកម្មមនុស្ស។
ការអភិវឌ្ឍសហគមន៍ ត្រូវបានរំពឹងថា នឹងជួយជំរុញដល់សេដ្ឋកិច្ចក្នុងស្រុករបស់ថៃនៅឆ្នាំនេះ ដើម្បីទូទាត់នឹងការធ្លាក់ចុះនៃសេដ្ឋកិច្ចពិភពលោក និងផលប៉ះពាល់នៃវីរុសកូរ៉ូណា ឬ Covid 19 មកលើវិស័យទេសចរណ៍របស់ថៃ។
បើតាមការបញ្ជាក់របស់ថ្នាក់ដឹកនាំធនាគារ BAAC របស់រដ្ឋថៃ បានឲ្យដឹងថា ក្រោមគម្រោងកម្ចីនេះ កសិករអាចទទួលបានប្រាក់កម្ចី ក្នុងអត្រាការប្រាក់ទាប ដើម្បីយកទៅប្រើប្រាស់ទិញគ្រឿងចក្រ និងគ្រឿងបរិក្ខា និងការចំណាយលើការជួសជុលគ្រឿងចក្រទាំងនោះជាដើម។ ការដាក់ពាក្យស្នើសុំកម្ចីនេះ នឹងត្រូវផុតកំណត់រហូតដល់ថ្ងៃទី ៣១ ខែ មីនា ឆ្នាំ២០២៣ខាងមុខ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
