មន្ត្រីជាន់ខ្ពស់ក្រសួងផែនការ អះអាងថា ទិន្នន័យជំរឿនសេដ្ឋកិច្ចមានសារៈសំខាន់បំផុត ដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់ក្នុងការរៀបចំគោលនយោបាយអភិវឌ្ឍន៍សេដ្ឋកិច្ច បរិស្ថាន សង្គម វប្បធម៌ និងសុខុមាលភាពរបស់ប្រជាជនកម្ពុជា និងផ្តល់សូចនាករសម្រាប់ចំណុចដៅនៃគោលដៅអភិវឌ្ឍន៍ប្រកបដោយចីរភាពឆ្នាំ២០១៦-២០៣០។
លោក ផន ចិន្តា អគ្គលេខាធិការនៃវិទ្យាស្ថានជាតិស្ថិតិ បានប្រាប់សារព័ត៌ខេមបូណូមីសថា ការធ្វើជំរឿនសេដ្ឋកិច្ច ជាការងារដ៏ធំ និងមានសារៈសំខាន់ដូចជា អាចធ្វើបច្ចុប្បន្នភាពចំនួនអង្គភាពទាំងខ្នាតតូច មធ្យម និង ខ្នាតធំ នៅទូទាំងប្រទេសកម្ពុជា និង អាចធ្វើការវាស់វែងអំពីគណនីភាពជាដើម។ លោក ផន ចិន្តា បានបញ្ជាក់បន្ថែមថា ក្រសួងផែនការបានចុះប្រមូលព័តមានពីអង្គភាពសេដ្ឋកិច្ចទូទាំងប្រទេសគឺចាប់តាំងពីថ្ងៃទី ០១ ខែមីនាមកម្ល៉េះ ហើយគិតមកទល់ពេលនេះ ប្រមូលទិន្នន័យបានប្រហែល ៦០% និងកំពុងបន្តការប្រមូលដើម្បីឲ្យចប់តាមការកំណត់ដែលបានគ្រោងទុក។
អត្ថបទគួរអាន
ជំរឿនសេដ្ឋកិច្ចនេះ ធ្វើឡើងរយៈពេល ១០ឆ្នាំម្តង ហើយជំរឿនសេដ្ឋកិច្ចនៅព្រះរាជាណាចក្រកម្ពុជាឆ្នាំ២០២២ នឹងត្រូវធ្វើឡើងចាប់ពីថ្ងៃទី០១ ដល់ថ្ងៃទី៣១ ខែមីនា ឆ្នាំ២០២២ នៅទូទាំងប្រទេសដោយត្រូវប្រើប្រាស់មន្ត្រីសម្ភាសន៍សរុបចំនួនប្រមាណ៥ពាន់នាក់។
ឯកឧត្តមទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការបានបញ្ជាក់ថា ផ្អែកលើរបាយការណ៍លទ្ធផលបឋមស្តីពីការស្រង់បញ្ជីអង្គភាពសេដ្ឋកិច្ច នៅតាមរាជធានីខេត្តទាំង២៥ បានឱ្យដឹងថា មានចំនួនអង្គភាពសេដ្ឋកិច្ចសរុបជាង ៧សែន៤ម៉ឺន ទីតាំងមូលដ្ឋាន នៅឆ្នាំ២០២១ ក្នុងទូទាំងប្រទេស។ ចំនួនអង្គភាពសេដ្ឋកិច្ច បានកើនទ្បើងប្រមាណ ៤៧% បើធៀបនឹងឆ្នាំ២០១១ (ជំរឿនសហគ្រាសឆ្នាំ២០១១) ហើយបានកើនទ្បើងប្រមាណ ៤៥% បើធៀបនឹងឆ្នាំ២០១៤ (ទិន្នន័យអង្កេតចន្លោះជំរឿនសហគ្រាសឆ្នាំ២០១៤)។
ជាមួយគ្នានេះ ទិន្នន័យទាំងអស់ដែលបានមកពីជំរឿនសេដ្ឋកិច្ច គឺជាទិន្នន័យពិតប្រាកដ ដែលបានមកពីគ្រប់អង្គភាពសេដ្ឋកិច្ច សហគ្រាស សិប្បកម្ម អាជីវកម្ម លក់ដុំ លក់រាយ និងសេវាកម្មផ្សេងៗ។ ហើយលទ្ធផលទិន្នន័យដែលបានមកពីការធ្វើជំរឿនសេដ្ឋកិច្ច នឹងត្រូវបានប្រើប្រាស់ដ៏ទូលំទូលាយនៅក្នុងវិស័យសាធារណៈនិងវិស័យឯកជនផងដែរ៕អត្ថបទ សោម ស្រីពេជ្រ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
