ការចាក់វ៉ាក់សាំងកូវីដ១៩ (អាស្ត្រាហ្សេនីកា) ដូសជំរុញ ឬដូសទី៣ ជូនដល់ក្រុមគ្រូពេទ្យជួរមុខ ទាំងរដ្ឋ និងឯកជន មន្ត្រីរាជការនៅខេត្តជាប់ព្រំដែនថៃទាំង៧ រួមមាន បាត់ដំបង បន្ទាយមានជ័យ ប៉ៃលិន កោះកុង ឧត្តរមានជ័យ ពោធិ៍សាត់ និង ព្រះវិហារ និង មន្ត្រីរាជការជាប់កិច្ចសន្យា កងទ័ព គ្រួសារកងទ័ព នគរបាល និង អតីតតយុទ្ធជន បានចាប់ផ្ដើមដំណើរការហើយ។
យ៉ាងណាមិញ គិតមកត្រឹមថ្ងៃទី០៩ ខែសីហា ឆ្នាំ២០២១ ចំនួនអ្នកបានមកចាក់វ៉ាក់សាំងដូសជំរុញ ឬដូសទី៣ មានចំនួនប្រមានជិត ៤ម៉ឺននាក់ហើយ ខណៈកំណើនអត្រាចាក់វ៉ាក់សាំងកូវីដ-១៩ទូទៅ នៅទូទាំងប្រទេសសម្រេចបានជិត ៨០% ធៀបជាមួយចំនួនប្រជាជនគោលដៅដែលត្រូវចាក់ ១០លាននាក់។ ដោយឡែក ការចាក់វ៉ាក់សាំងលើកុមារ-យុវវ័យអាយុពី១២ ដល់ក្រោម១៨ឆ្នាំ សម្រេចបាន ១៦% ធៀបជាមួយនឹងគោលដៅប្រមាណជិត២លាននាក់។
អត្ថបទទាក់ទង
សូមបញ្ជាក់ផងដែរថា អ្នកដែលអាចចាក់វ៉ាក់សាំងដូសជំរុញ ឬ ដូសទី៣ ដោយប្រើប្រាស់វ៉ាក់សាំងអាស្ត្រាហ្សានីកា ត្រូវតែជាអ្នកដែលបានចាក់វ៉ាក់សាំងស៊ីណូហ្វាម ឬ ស៊ីណូវ៉ាក់ រួចរាល់ទាំងពីរដូស ហើយត្រូវមានគម្លាតពី ៦ខែទៅ ៨ខែ បន្ទាប់ពីដូសទី១។ ដោយឡែក សម្រាប់អ្នកដែលបានចាក់វ៉ាក់សាំងប្រភេទ AstraZeneca ចំនួន២ដូសរួចហើយ ត្រូវបានប្រមុខរាជរដ្ឋាភិបាលកម្ពុជាសុំការយោគយល់ ដោយសារតែមិនផ្ដល់ជូនវ៉ាក់សាំង AstraZeneca ដូសទី៣ជូនបានទៀតទេ ព្រោះតែពុំបានសិក្សាពីគម្លាត និង ពុំមានវ៉ាក់សាំងនេះគ្រប់គ្រាន់។
ជាមួយគ្នានេះដែរ ក្រសួងសុខាភិបាលបានគូសបញ្ជាក់ថា ទោះបីជាបុគ្គលម្នាក់ៗបានទទួលវ៉ាក់សាំងរួចរាល់ ឬ ចាក់វ៉ាក់សាំងដូសជំរុញហើយក្ដី ក៏ត្រូវបន្តអនុវត្តនូវវិធានការ ៣ការពារ ៣កុំ ដើម្បីការពារ និងទប់ស្តាត់ការឆ្លងរីករាលដាលជាទ្រង់ទ្រាយធំក្នុងសហគមន៍៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
