ការស្នើសុំនេះធ្វើឡើងក្រោយក្រសួងសេដ្ឋកិច្ច និងហិរញ្ញវត្ថុសង្កេតឃើញអាជីវកម្មមួយចំនួននៅតែមិនទាន់អាចដំណើរការបានរលូនឡើងវិញនៅឡើយ ទោះបីបច្ចុប្បន្នការឆ្លងរាតត្បាតនៃជំងឺកូវីដ-១៩ នៅកម្ពុជាមានភាពស្រាកស្រាន្តជាងមុនក្ដី។
ឯកឧត្តម នុប សុធនវិចិត្រ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានបញ្ជាក់ប្រាប់ខេមបូណូមីសថា ក្រសួងសេដ្ឋកិច្ច បានលើកសំណើទៅសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជារួចហើយ ដើម្បីសុំពន្យារពេលការអនុវត្តពន្ធលើចំណេញមូលធន២ឆ្នាំបន្ថែមទៀត គឺពន្យារដល់ឆ្នាំ២០២៤។ គោលបំណងនៃការស្នើសុំនេះ គឺដើម្បីជំរុញការវិនិយោគ កែលម្អបរិយាកាសធុរកិច្ច និងជួយសម្រួលជីវភាពប្រជាពលរដ្ឋ។ បន្ថែមពីនេះ គឺដើម្បីចូលរួមអនុវត្តក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ ដែលរដ្ឋាភិបាលទើបដាក់ចេញកាលពីអំឡុងខែធ្នូ ឆ្នាំ២០២១។
អ្វីទៅជាពន្ធលើចំណេញមូលធន? ពន្ធលើចំណេញមូលធននេះ គឺជាការយកពន្ធទៅលើប្រាក់ចំណេញពីការលក់ ឬផ្ទេរមូលធន ដូចជាអចលនទ្រព្យ ភតិសន្យា ទ្រព្យវិនិយោគ កេរ្ដិ៍ឈ្មោះអាជីវកម្ម កម្មសិទ្ធិបញ្ញា និងរូបិយវត្ថុបរទេសជាដើម ដោយអត្រាពន្ធលើចំណេញមូលធន ត្រូវបានកំណត់តាមអត្រាថេរ២០%នៃប្រាក់ចំណេញ។
អត្ថបទគួរអាន
ជុំវិញនឹងការយកពន្ធចំណេញមូលធននេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្ញាក់ងារអចលនវត្ថុកម្ពុជាយល់ឃើញថា រាជរដ្ឋាភិបាលមិនគួរអនុវត្តការយកពន្ធលើប្រាក់ចំណេញមូលធនភ្លាមៗនោះទេ ដ្បិតវាហាក់លឿនពេកសម្រាប់វិស័យអចលនទ្រព្យកម្ពុជាដែលបានរងផលប៉ះពាល់ធ្ងន់ធ្ងរដោយសារវិបត្តិកូវីដ-១៩ ពីរឆ្នាំកន្លងមកនេះ។ សម្រាប់លោក សុខនីម រាជរដ្ឋាភិបាលគួរពន្យារពេលអនុវត្ត២ទៅ៣ឆ្នាំទៀត ដើម្បីទុកពេលឲ្យប្រជាពលរដ្ឋ និងអ្នកវិនិយោគមានលទ្ធភាពក្នុងការស្តារជីវភាព និងលទ្ធភាពឡើងវិញ។
អ្នកជំនាញរូបនេះ ជឿជាក់ថា ប្រសិនបើរាជរដ្ឋាភិបាលចាប់អនុវត្តយកពន្ធលើប្រាក់ចំណេញមូលធនពីឆ្នាំ២០២២ តទៅ វាមិនត្រឹមតែធ្វើឲ្យប៉ះពាល់ដល់លទ្ធភាពក្នុងការស្តារវិស័យអចលនទ្រព្យ ប៉ុណ្ណោះទេ ថែមទាំងអាចធ្វើឲ្យកម្ពុជាបាត់បង់ភាពប្រកួតប្រជែងជាមួយបណ្តាប្រទេសក្នុងតំបន់ ក្នុងការស្រូមទាញការវិនិយោគក្នុងវិស័យនេះផងដែរ។ ទោះយ៉ាងណាលោក ច្រឹក សុខនីម អះអាងថា ការយកពន្ធលើប្រាក់ចំណេញមូលធននេះត្រូវបានគេអនុវត្តនៅតាមប្រទេសក្នុងតំបន់អាស៊ាន អាស៊ី និងពិភពលោករួចមកហើយ។
ឯកឧត្តម នុប សុធនវិចិត្រ អនុរដ្ឋលេខាធិការក្រសួងសេដ្ឋកិច្ច បានគូសបញ្ជាក់បន្ថែមថា ទោះបីបច្ចុប្បន្នស្ថានភាពជំងឺកូវីដ-១៩ មានភាពស្រាកស្រាន្តក្តី តែវិស័យមួយចំនួននៅមិនទាន់អាចវិលត្រឡប់ទៅធ្វើធុរកិច្ចជាធម្មតាវិញបាននោះទេ ដែលទាមទារការគាំទ្រមួយរយៈបន្ថែមទៀត។ ឯកឧត្តមបន្តថា ដើម្បីជួយសម្រួលដល់ការងើបឡើងវិញរបស់វិស័យទាំងនេះ រាជរដ្ឋាភិបាល នឹងបន្តរៀបចំនូវវិធានការពាក់ព័ន្ធចាំបាច់នានា ក្នុងការជួយសម្រួលបន្ទុកសារពើពន្ធ និងបន្តលើកកម្ពស់គុណភាពនៃការផ្តល់សេវារបស់អគ្គនាយកដ្ឋានពន្ធដារបន្ថែមទៀត។
សូមបញ្ជាក់ថា ក្នុងរយៈពេល២ឆ្នាំកន្លងមកនេះ រាជរដ្ឋាភិបាលបានដាក់ចេញនូវវិធានការជាច្រើន ដើម្បីជួយសម្រាលបន្ទុកសារពើពន្ធរបស់វិស័យឯកជន ជាពិសេសវិស័យដែលរងផលប៉ះពាល់ខ្លាំងពីវិបត្តិជំងឺកូវីដ-១៩ ដើម្បីរក្សាលំនឹងអាជីវកម្ម។ ទន្ទឹមនេះ ទោះបីជាមានវិបត្តិនៃជំងឺកូវីដ-១៩ អគ្គនាយកដ្ឋានពន្ធដារក៏មិនបានដកថយពីកិច្ចការងារកែទម្រង់ ដើម្បីលើកកម្ពស់អនុលោមភាពការផ្តល់សេវាសាធារណៈ និងការប្រមូលចំណូលជារួមឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
