កំពូលឈ្មួញនាំចេញអង្ករទាំង១០នៅកម្ពុជា ជានរណាខ្លះ?

ជាក់ស្តែង កាលពីឆ្នាំ២០១៦ កម្ពុជាបាននាំចេញអង្ករទៅកាន់ទីផ្សារអន្តរជាតិដែលភាគច្រើនគឺទីផ្សារអឺរ៉ុប អាមេរិក និងចិន មានចំនួនប្រមាណជាងកន្លះលានតោន មិនទាន់គ្រប់ទៅនឹងផែនការរបស់រាជរដ្ឋាភិបាលកម្ពុជាដែលបានដាក់ចេញឲ្យមានការនាំចេញអង្កររហូត ១លានតោននោះនៅឡើយទេ។ ប្រទេសកម្ពុជាស្ថិតនៅក្នុងលំដាប់ថ្នាក់លេខ៧ ជាប្រទេសដែលបាននាំចេញអង្ករច្រើនជាងគេនៅលើពិភពលោក។

ជុំវិញទៅនឹងការនាំចេញអង្ករនេះដែរ មានឈ្មួញនាំចេញអង្ករជាច្រើនកំពុងតែប្រណាំងប្រជែងគ្នាយ៉ាងស្វិតស្វាញដើម្បីដណ្តើមកេរ្តិ៍ឈ្មោះ កិត្តិយស និងទីផ្សារនៅលើឆាកអន្តរជាតិ។ គិតរហូតមកដល់ពេលបច្ចុប្បន្ននេះ កម្ពុជាមានក្រុមហ៊ុននាំចេញអង្ករចំនួន ៧២ក្រុមហ៊ុន ដែលកំពុងតែប្រកួតប្រជែងគ្នានាំចេញ។ នេះបើយោងតាមរបាយការណ៍ពីសហព័ន្ធស្រូវអង្ករកម្ពុជា ដែលបានចេញផ្សាយកាលពីពេលថ្មីៗនេះ។

សារព័ត៌មានអេឡិចត្រូនិក ខេមបូណូមីស សូមលើកយកតែក្រុមហ៊ុនធំៗកំពូលៗទាំង១០តែប៉ុណ្ណោះ មកជម្រាបជូនមិត្តអ្នកអាន។ មុខជំនួញអង្ករនៅកម្ពុជា ភាគច្រើនគ្រប់គ្រងដោយអ្នកមានអំណាចនិងសេដ្ឋីឧកញ៉ា។ ខាងក្រោមនេះជាឈ្មោះឈ្មួញធំៗនិងជាឧកញ៉ាស្រូវអង្ករ ទាំង១០ ដែលបាននាំចេញអង្ករច្រើនជាងគេនៅកម្ពុជាក្នុងឆ្នាំ២០១៧នេះ៖

ទី១ លោកជំទាវ ឧកញ៉ា កែវ ម៉ាលី

ជាមន្រ្តីជាន់ខ្ពស់នៅក្នុងព្រឹទ្ធសភាផង និងជាអ្នកជំនួញដ៏ល្បីនៅក្នុងប្រទេសកម្ពុជាផង។ បច្ចុប្បន្ន លោកជំទាវ ឧកញ៉ា កែវ ម៉ាលី គឺជាសមាជិកព្រឹទ្ធសភានិងជាអគ្គនាយិកា ក្រុមហ៊ុននាំចេញអង្ករទៅកាន់ទីផ្សារក្រៅប្រទេសដ៏លេចធ្លោខ្លាំងជាងគេនៅក្នុងឆ្នាំ២០១៧នេះ។

លោកជំទាវ មានរោងម៉ាស៊ីនកិនស្រូវលំដាប់ស្តង់ដារអន្តរជាតិ និងក្រុមហ៊ុនដែលមានឈ្មោះថា CRYSTAL RICE (Kampuchea) CO., LTD។ ក្រុមហ៊ុននេះបាននាំចេញអង្ករទៅកាន់ទីផ្សារអន្តរជាតិចំនួន ៣ម៉ឺន ៩៦១តោន នៅក្នុងរយៈពេល ៦ខែដំបូងដើមឆ្នាំ២០១៧នេះ។ បន្ទាប់ពីប្រកបមុខជំនួញស្រូវអង្ករលោកជំទាវ ឧកញ៉ា កែវ ម៉ាលី ក៏មានមុខជំនួញមួយចំនួនផ្សេងទៀតផងដែរ។

ទី២ លោកឧកញ៉ា ភូ ពុយ

ឧកញ៉ា ភូ ពុយ ជាឈ្មួញអង្ករដ៏ល្បីល្បាញចាស់វស្សាម្នាក់នៅក្នុងប្រទេសកម្ពុជា។ គាត់ជាអគ្គនាយកក្រុមហ៊ុននាំចេញអង្ករដ៏ធំមួយ ដែលមានឈ្មោះថា ក្រុមហ៊ុន BAITANG (KAMPUCHEA) PLC។

ក្រុមហ៊ុន របស់ឧកញ៉ា ភូ ពុយ បាននាំចេញអង្ករទៅកាន់ទីផ្សារអន្តរជាតិចំនួន ២ម៉ឺន ៧៤១៥តោន នៅក្នុងរយៈពេល ៦ខែដំបូងដើមឆ្នាំ២០១៧នេះ។ ក្រៅពីរកស៊ីស្រូវអង្ករ ឧកញ៉ាដែលរស់នៅក្នុងខេត្តបាត់ដំបងរូបនេះ ក៏មានមុខជំនួញជាច្រើនផងដែរ។

ទី៣ ឯកឧត្តម សុខ ពុទ្ធិវុធ

ឯកឧត្តម សុខ ពុទ្ធិវុធ ជាពាណិជ្ជករវ័យក្មេងដ៏លេចធ្លោជាងគេក្នុងចំណោមឈ្មួញអង្ករធំៗទាំងអស់នៅកម្ពុជា។ លោកគឺជាកូនប្រុសបង្កើតរបស់សម្តេចវិបុលបញ្ញា សុខ អាន និងជាកូនប្រសាររបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាផងដែរ។

បច្ចុប្បន្នលោកជាប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន APSARA RICE (CAMBODIA) CO., LTD និងក្រុមហ៊ុនសោម៉ា គ្រុប។ ក្រុមហ៊ុន APSARA RICE (CAMBODIA) CO., LTD បានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ២ម៉ឺន ៣៧៣៤ តោន។ ក្រៅពីរកស៊ី ខាងស្រូវអង្ករ លោកក៏មានមុខជំនួញជាច្រើនផ្សេងទៀតដែរ។

ទី៤ លោកឧកញ៉ា គឹម សាវុធ

លោកក៏ជាមេឈ្មួញអង្ករជើងខ្លាំងចាស់វស្សាក្រែលដែរ ក្នុងចំណោមមេឈ្មួញអង្ករធំៗទាំងអស់នៅកម្ពុជា។ ឧកញ៉ា គឹម សាវុធ បច្ចុប្បន្នជាអគ្គនាយកក្រុមហ៊ុន KHMER FOOD GROUP CO., LTD។

លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ២ម៉ឺន ១៨៣១តោន។ ក្រៅពីរកស៊ីខាងស្រូវអង្ករ លោកក៏មានមុខជំនួញជាច្រើនផ្សេងទៀតដែរ។

ទី៥ លោក ឧកញ៉ា សុង សារ៉ន

លោកឧកញ៉ា សុង សារ៉ន អគ្គនាយកក្រុមហ៊ុន Amru Rice

ថ្មីៗនេះ លោកឧកញ៉ា សុង សារ៉ន ហាក់បីដូចជាមានឈ្មោះបោះសំឡេងយ៉ាងខ្លាំងនៅក្នុងពិភពជំនួញវិស័យកសិកម្ម ពិសេសមុខជំនួញនាំចេញអង្ករទៅកាន់ទីផ្សារអន្តរជាតិ។ ឧកញ៉ា សុង សារ៉ន រាប់ចាត់ទុកថា ជាពាណិជ្ជករដ៏មានសក្តានុពលវ័យក្មេងមួយរូបផងដែរ នៅក្នុងប្រទេសកម្ពុជា។

ឧកញ៉ា សុង សារ៉ន គឺជាអគ្គនាយកក្រុមហ៊ុន AMRU RICE (CAMBODIA) CO., LTD។ លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ១ម៉ឺន ៩៦៦៣តោន។

ក្រៅពីរបរស្រូវអង្ករ លោកក៏មានមុខជំនួញជាច្រើនផ្សេងទៀតដែរ។ បច្ចុប្បន្ន លោកឧកញ៉ា សុង សារ៉ន មានក្រុមហ៊ុនពាណិជ្ជកម្មចំនួន ៦ កំពុងតែប្រតិបត្តិការនៅកម្ពុជា។

ទី៦ លោកបណ្ឌិត សុក ហាច

អតីតជាអ្នកស្រាវជ្រាវសេដ្ឋកិច្ចដ៏ល្បីល្បាញមួយរូប ចេញពីអង្គការក្រៅរដ្ឋាភិបាលដែលមានឈ្មោះថា វិទ្យាស្ថានសេដ្ឋកិច្ចកម្ពុជា។ លោកបណ្ឌិត សុក ហាច បានបោះបង់វិទ្យាស្ថានសេដ្ឋកិច្ចកម្ពុជាដែលបង្កើតឡើងដោយរូបលោកផ្ទាល់ ទៅចូលប្រឡូកក្នុងវិស័យជំនួញវិញម្តង។ លោកបានចាប់យកមុខជំនួញស្រូវអង្ករជាមួយនឹងដៃគូបារំាង។

តែប៉ុន្មានឆ្នាំសោះ មុខជំនួញស្រូវអង្ករនិងរោងម៉ាស៊ីនកិនស្រូវរបស់លោក សុក ហាច ហាក់បីដូចជាបោះពួយទៅមុខយ៉ាងលឿន ដែលធ្វើឲ្យលោកមានឈ្មោះបោះសំឡេងនៅក្នុងវិស័យនាំចេញស្រូវអង្ករនៅប្រទេសកម្ពុជា។

បច្ចុប្បន្ន លោកបណ្ឌិត សុក ហាច ជាអគ្គនាយកក្រុមហ៊ុន GOLDEN RICE (CAMBODIA) CO., LTD។ លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ១ម៉ឺន ៦៧៧៤តោន។

ទី៧ លោក ឡាយ ឈុនហួរ

លោក ឡាយ ឈុន ហួរ ជាពាណិជ្ជករនាំចេញអង្ករជើងខ្លាំងមួយរូបដែរ ដែលបាននាំចេញអង្ករទៅកាន់ទីផ្សារអន្តរជាតិ។

លោក ឡាយ ឈុនហួរ ជាអគ្គនាយកក្រុមហ៊ុន CITY RICE IMPORT-EXPORT CO., LTD។ លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ១ម៉ឺន ៥០៤៦តោន។

ទី៨ លោក ហុង នីកូលីន

លោក ហុង នីកូលីន ជាឈ្មួញនាំចេញអង្ករដ៏ល្បីមួយរូបដែរដែលបាននាំចេញអង្ករទៅកាន់ទីផ្សារអន្តរជាតិ។

លោក ហុង នីកូលីន ជាអគ្គនាយកក្រុមហ៊ុន NIKOLINE INVESTMENT CO.,LTD ។ លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ១ម៉ឺន ៤៣៧៥តោន។

ទី៩ លោក នង វាសនា

លោក នង វាសនា ជាឈ្មួញនាំចេញអង្ករដ៏ល្បីមួយរូបដែរ ដែលបាននាំចេញអង្ករទៅកាន់ទីផ្សារអន្តរជាតិ។ បច្ចុប្បន្ន លោក នង វាសនា ជាអគ្គនាយកក្រុមហ៊ុន KOL Veasna Investment Co., LTD ។

លោកបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ១ម៉ឺន ១៦៧៥តោន។

ទី១០ ឧកញ៉ា ចាន់ សុខឃាង

លោក ចាន់ សុខឃាង (រូបខាងស្ដាំ) អគ្គនាយកក្រុមហ៊ុន SIGNATURES OF ASIA CO., LTD

ឧកញ៉ា ចាន់ សុខឃាង ជាពាណិជ្ជករនាំចេញអង្ករដ៏ល្បីល្បាញមួយរូបដែរ ដែលបាននាំចេញអង្ករទៅកាន់ទីផ្សារអន្តរជាតិ។ បច្ចុប្បន្ន លោកឧកញ៉ា ចាន់ សុខឃាង ជាអគ្គនាយកក្រុមហ៊ុន SIGNATURES OF ASIA CO., LTD ។

លោកឧកញ៉ាបានធ្វើការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែដំបូងដើមឆ្នាំ២០១៧នេះ មានចំនួនប្រមាណ ៩៩៥៧តោន។

ទោះបីជាមានឈ្មួញធំៗជាច្រើនទៀត បានធ្វើការនាំចេញអង្កររបស់កម្ពុជាទៅកាន់ទីផ្សារអន្តរជាតិបែបនេះក្តី ប៉ុន្តែ បើយើងពិនិត្យទៅមើលតួលេខ ឬ បរិមាណនៃការនាំចេញរបស់ប្រទេសកម្ពុជាហាក់បីដូចជាមានកម្រិតតិចតួចនៅឡើយ បើប្រៀបធៀបទៅនឹងប្រទេសជិតខាងដូចជា ប្រទេសថៃ វៀតណាម ដែលក្នុងមួយឆ្នាំៗ ប្រទេសទាំងពីរនេះបាននាំចេញអង្ករទៅកាន់ទីផ្សារក្រៅប្រទេសរាប់លានតោនឯណោះ។

ដូច្នេះ ទាមទារឲ្យរដ្ឋាភិបាលកម្ពុជាស្វែងរកទីផ្សារ និងពង្រីកការនាំចេញអង្កររបស់ប្រទេសកម្ពុជាឲ្យបានកាន់តែច្រើន ជាមួយនឹងតម្លៃសមរម្យ ដើម្បីជំរុញកំណើនសេដ្ឋកិច្ចប្រជាកសិករខ្មែរប្រមាណ ៥០ភាគរយ ហើយក៏ដើម្បីជំរុញកំណើនសេដ្ឋកិច្ចជាតិផងដែរ៕