១០ខែឆ្នាំនេះភ្ញៀវទេសចរអន្តរជាតិចូលមកទស្សនាកម្ពុជាធ្លាក់ចុះជាង ៧៦ភាគរយ

ភ្ញៀវទេសចរអន្តរជាតិចូលមកទស្សនានៅក្នុងប្រទេសកម្ពុជារយៈពេល ១០ខែដំបូងដើមឆ្នាំ ២០២០នេះ នៅតែបន្តការធ្លាក់ចុះយ៉ាងខ្លាំង។ របាយការណ៍របស់ក្រសួងទេសចរណ៍បង្ហាញថា ចំនួនភ្ញៀវទេសចរបរទេសដែលធ្វើដំណើរមកកម្ពុជានៅក្នុងរយៈពេល ១០ខែដើមឆ្នាំ២០២០ មានចំនួនសរុបជាង ១ លាន២ សែននាក់ ធ្លាក់ចុះជាង ៧៦ភាគរយបើធៀបនឹងរយៈពេលដូចគ្នាកាលពីឆ្នាំ២០១៩ ដែលមានចំនួនរហូត ៥លាន ២៩ម៉ឺននាក់។

ក្នុងនោះភ្ញៀវទេសចរដែលមកដល់កម្ពុជា តាមរយៈអាកាសយាន្តដ្ឋានអន្តរជាតិ ទាំង៣ មានចំនួនជាង ៧៣ម៉ឺននាក់ ធ្លាក់ចុះជាង ៨០ភាគរយ ភ្ញៀវតាមផ្លូវគោក និងផ្លូវទឹក មានចំនួនជាង ៥៣ ម៉ឺននាក់ ធ្លាក់ចុះជាង ៦៦ភាគរយ។

ដោយឡែកសម្រាប់ក្នុងខែតុលា ចំនួនភ្ញៀវទេសចរ មានចំនួនជាង ២ម៉ឺននាក់ ធ្លាក់ចុះ ជិត ៩៦ភាគរយ បើធៀបនឹងខែតុលា ឆ្នាំ២០១៩។

នៅក្នុងរយៈពេល១០ខែឆ្នាំនេះ ភ្ញៀវទេសចរជនជាតិចិន នូវតែបន្តនាំមុខគេ ជាមួយនឹងចំនួន៣១ម៉ឺន ៤ ពាន់នាក់ ធ្លាក់ចុះជាង ៨៤ភាគរយ ថៃជាង ១៩ ម៉ឺន៤ ពាន់នាក់ ធ្លាក់ចុះជាង ៤១ភាគរយ វៀតណាម ១៨ ម៉ឺន១ ពាន់នាក់ ធ្លាក់ចុះជាង ៧៤ភាគរយ អាមេរិក មានចំនួន ជាង៥ម៉ឺន៥ពាន់នាក់ ធ្លាក់ចុះជាង ៧១ភាគរយ និង ក្រៅពីនោះភ្ញៀវទេសចរមកពីប្រទេសអង់គ្លេស បារាំង និង ជប៉ុន ជាដើមសុទ្ធតែធ្លាក់ចុះដូចៗគ្នា៕