ការកើនឡើងនៃការកក់បន្ទប់ផ្ទះសំណាក់ សណ្ឋាគារនេះ សរបញ្ជាក់ឲ្យឃើញថា ស្ថានភាពទេសចរណ៍ផ្ទៃក្នុងរបស់កម្ពុជាកាន់តែមានសន្ទុះកើនឡើងកាន់តែខ្លាំង ខណៈដែលរាជរដ្ឋាភិបាលក៏បានប្រកាសបើកប្រទេសទទួលទេសចរចាក់វ៉ាក់សាំងរួចពីក្រៅពីប្រទេសអាចធ្វើដំណើរចូលមកកម្ពុជាដោយមិនចាំបាច់ធ្វើចត្តាឡីស័កនោះឡើយ។
ដ្បិតថា រាជរដ្ឋាភិបាលបានសម្រេចផ្អាកការប្រារព្ធ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ នាឆ្នាំ២០២១នេះ ដោយសារការរាតត្បាតជំងឺកូវីដ-១៩ក៏ដោយចុះ ប៉ុន្ដែ ប្រមុខរាជរដ្ឋាភិបាលកម្ពុជា បានសម្រេចឱ្យបុគ្គលិក មន្ត្រីរាជការ និងកម្មករ ទាំងអស់អាចឈប់សម្រាករយៈពេល៣ថ្ងៃ និងបន្តលើកទឹកចិត្តដល់ប្រជាពលរដ្ឋកម្ពុជា ឱ្យដើរកម្សាន្តនៅតាមរមណីដ្ឋានទេសចរណ៍នានា ទូទាំងប្រទេស ដើម្បីចូលរួមស្ដារវិស័យទេសចរណ៍ និងជំរុញសេដ្ឋកិច្ចកម្ពុជា ឱ្យងើបឡើងវិញ។ ឆ្នាំ២០២១នេះ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ នឹងត្រូវប្រារព្ធធ្វើឡើងចាប់ពីថ្ងៃទី១៨ ខែវិច្ឆិកា ដល់ថ្ងៃទី២០ ខែវិច្ឆិកា។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានគូសបញ្ជាក់ថា ក្រោយមានការប្រកាសរបស់រាជរដ្ឋាភិបាល ឱ្យមានការបើកប្រទេសឡើងវិញលើគ្រប់វិស័យ ពិសេសមានការលើកទឹកចិត្តឱ្យពលរដ្ឋដើរកម្សាន្ត អំឡុងពិធីបុណ្យអុំទូក ការកក់ផ្ទះសំណាក់ និងសណ្ឋាគារ នៅក្នុងខេត្តសៀមរាប មានសកម្មភាពយ៉ាងផុសផុល ដោយប្រធានមន្ទីររូបនេះ បានអះអាងថា រហូតមកដល់ពេលនេះ ផ្ទះសំណាក់ និងសណ្ឋាគារ ភាគច្រើនសុទ្ធតែមានការកក់ពីភ្ញៀវ។ លោក ង៉ូវ សេងកាក់ មានក្ដីរំពឹងខ្ពស់ថា ព្រះរាជពិធីបុណ្យអុំទូកនាឆ្នាំនេះ ខេត្តសៀមរាប នឹងមានភ្ញៀវទេសចរច្រើនមកកម្សាន្ត ព្រោះលោកយល់ថា សន្ទុះនៃការដើរកម្សាន្តរបស់ពលរដ្ឋកើនឡើងជាងឆ្នាំមុន។
អត្ថបទគួរអាន
ជាមួយគ្នានេះដែរ លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានអះអាងថា គិតមកដល់ពេលនេះ ផ្ទះសំណាក់ និងសណ្ឋាគារ ស្ទើរទាំងអស់ក្នុងខេត្តព្រះសីហនុ ត្រូវបានភ្ញៀវទេសចរកក់ទុកមុន សម្រាប់ថ្ងៃឈប់សម្រាកនាពិធីបុណ្យអុំទូកខាងមុខ។ បើតាមប្រធានមន្ទីរទេសចរណ៍ខេត្តរូបនេះ បច្ចុប្បន្ន ខេត្តព្រះសីហនុ មានអាជីវកម្មទេសចរណ៍ប្រមាណ ២៤០ទីតាំង ដែលភាគច្រើនជាអាជីវកម្ម សណ្ឋាគារ និងផ្ទះសំណាក់ ក្នុងនោះ សណ្ឋាគារ និងផ្ទះសំណាក់ ស្ទើរ១០០ភាគរយទៅហើយ ដែលត្រូវបានភ្ញៀវកក់នាពិធីបុណ្យអុំទូក។
ចំណែកខេត្តកែប ឯណោះវិញ ក៏មិនខុសគ្នាប៉ុន្មានពីខេត្តព្រះសីហនុ ដែរ នារយៈពេលចុងក្រោយនេះ សកម្មភាពភ្ញៀវទេសចរកាន់តែច្រើន បានដើរកម្សាន្តនៅខេត្តជាប់សមុទ្រមួយនេះ បន្ទាប់ពីស្ថានភាពជំងឺកូវីដ-១៩ បានធូរស្រាល។ លោក សោម ចិន្ថា ប្រធានមន្ទីរទេសចរណ៍ខេត្តកែប ខេត្តបានរៀបចំ និងកែលម្អសោភណ្ឌភាពមួយចំនួនរួចរាល់ដើម្បីត្រៀមទទួលទេសចរនាពេលខាងមុខ ដោយខេត្តមានក្ដីរំពឹងខ្ពស់ថា នាឱកាសពិធីបុណ្យអុំទូក អកអំបុក និងសំពះព្រះខែ នារយៈពេលដ៏ខ្លីខាងមុខ នឹងមានភ្ញៀវទេសចរកាន់តែច្រើនទៅកម្សាន្តនៅខេត្តកែប។
សូមបញ្ជាក់ថា ដោយសារការរាតត្បាតនៃវីរុសកូវីដ-១៩ កាលពីឆ្នាំ២០២០ រាជរដ្ឋាភិបាលកម្ពុជា បានសម្រេចផ្អាកការរៀបចំពិធីបុណ្យអុំទូក អកអំបុក និងសំពះព្រះខែ ម្ដងរួចមកហើយ។ ដោយឡែក នៅឆ្នាំ២០២១នេះ ដ្បិតថា ស្ថានភាពជំងឺកូវីដ-១៩ ចាប់ផ្ដើមប្រសើរឡើងវិញ តែដើម្បីទប់ស្កាត់ការឆ្លងរាលដាលជំងឺកូវីដ-១៩ ជាថ្មីម្ដងទៀត ប្រមុខរាជរដ្ឋាភិបាលកម្ពុជា បានសម្រេចផ្អាកពិធីបុណ្យអុំទូក ជាលើកទី២។ ប៉ុន្ដែ ការឈប់សម្រាកនៅតែផ្ដល់ជូន បុគ្គលិក មន្ត្រីរាជការ និងកម្មករ រយៈពេល ៣ថ្ងៃដដែល ដើម្បីដើរកម្សាន្តនៅតាមតំបន់ទេសចរណ៍នានា ទួទាំងប្រទេស ដោយត្រូវគោរពតាមវិធានសុខាភិបាលឱ្យបានខ្ជាប់ខ្ជួន៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
