ប្រភពព័ត៌មានទាំងពីរខាងលើ បានបញ្ជាក់ថា ឧបនាយករដ្ឋមន្រ្តីចិន លោក លូ ហេ ជាមួយនឹង លោក រ៉ូបឺត ឡៃធីសឺ តំណាងចរចាពាណិជ្ជកម្មអាមេរិក និងលោក ស្ទីវីន ញ៉ូឈិន លេខាធិការរតនាគារអាមេរិក បានធ្វើការចរចាពាណិជ្ជកម្មតាមប្រព័ន្ធទូរស័ព្ទ ដែលជជែកគ្នាអំពីបញ្ហាស្នូលសំខាន់ៗរបស់ភាគីទាំងពីរ ក្នុងការចាប់ផ្តើមដំណាក់កាលដំបូង នៃកិច្ចព្រមព្រៀងពាណិជ្ជកម្ម។
លើសពីនេះទៅទៀត តំណាងចរចាពាណិជ្ជកម្ម ចិន និងអាមេរិក ក៏បានសន្យាថានឹង បន្តទំនាក់ទំនងស្និទ្ធស្នាលជាមួយគ្នា ជាបន្តទៅទៀត។
កិច្ចព្រមព្រៀងពាណិជ្ជកម្មរវាង អាមេរិក និងចិន គ្រោងនឹងសម្រេចតាំងពីខែឧសភា ឆ្នាំ២០១៩នេះ មកម្ល៉េះ តែត្រូវរុញច្រានចោលដោយ អ្នកចរចាអាមេរិក ក្រោមហេតុផលថា ចិន មិនបានគាំទ្រដល់ សេចក្តីព្រាងកិច្ចព្រមព្រៀង ដែលបានចរចាគ្នារួចនោះទេ។
អត្ថបទទាក់ទង!
លោក ធីម ស្ទេតហ្វ៊ត ប្រធានសភាពាណិជ្ជកម្មអាមេរិក ប្រចាំនៅប្រទេសចិន បានគូសបញ្ជាក់ថា ប្រជាពលរដ្ឋនៃប្រទេសទាំងពីរ សុទ្ធតែចង់ឲ្យ ទំនាក់ទំនងរវាងអាមេរិក-ចិន កាន់តែទូលំទូលាយ និងស៊ីជម្រៅ តាមតែអាចទៅបាន ព្រោះថា ភាពមិនច្បាស់លាស់នៅក្នុងសេដ្ឋកិច្ច ជាហេតុប៉ះពាល់យ៉ាងខ្លាំង ដល់ការសម្រេចចិត្តធ្វើជំនួញ និងពង្រីកការវិនិយោគជាដើម។
លោក ធីម ក៏បង្ហាញក្តីសង្ឃឹមដែរថា មហាអំណាចសេដ្ឋកិច្ចទាំងពីរ នឹងអាចរកឃើញផ្លូវថ្មី សម្រាប់ដោះស្រាយបញ្ហា ដោយមានទំនួលខុសត្រូវ និងចាស់ទុំជាងមុន។
សូមរម្លឹកបន្តិចថា កាលពីពេលថ្មីៗនេះ នាយកគ្រប់គ្រងមូលនិធិរូបិយវត្ថុអន្តរជាតិ IMF បានបញ្ជាក់ដែរថា សង្គ្រាមពាណិជ្ជកម្មអាមេរិក និងចិន អាចនឹងធ្វើឲ្យខាតបង់ដល់សេដ្ឋកិច្ចសកលប្រមាណ ៧០០ពាន់លានដុល្លារអាមេរិក ឬស្មើនឹងប្រមាណ ០.៨ភាគរយនៃ GDP របស់ពិភពលោក នៅឆ្នាំ ២០២០ខាងមុខ ដោយសារតែ អត្រាកំណើនសេដ្ឋកិច្ចសកល ធ្លាក់ចុះដល់កម្រិតទាបបំផុតមិនធ្លាប់មាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
