ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១ ខែកក្កដា ឆ្នាំ២០២១ ក្រោមការដឹកនាំដោយឯកឧត្តម សុខ ចិន្តាសោភា បានដឹកនាំគណៈប្រតិភូក្រុមប្រឹក្សាអភិវឌ្ឍន៍កម្ពុជា បំពេញទស្សនកិច្ចការងារដើម្បីពិនិត្យមើលការសាងសង់រោងចក្ររបស់ក្រុមហ៊ុនចិនធំៗចំនួន២ គឺក្រុមហ៊ុន Cart Tire Co., Ltd និងក្រុមហ៊ុន Shane (Cambodia) Furniture Co., Ltd ដែលបាននិងកំពុងវិនិយោគសាងសង់រោងចក្រនៅខេត្តស្វាយរៀង។
ក្រុមហ៊ុន Cart Tire Co., Ltd ជាក្រុមហ៊ុនចិន និងបានវិនិយោគនៅប្រទេសវៀតណាមកាលពីឆ្នាំ២០១១ ហើយឆ្នាំ២០២១នេះ ក្រុមហ៊ុនចិនមួយនេះ បានសម្រេចចិត្តមកបណ្ដាក់ទុនវិនិយោគនៅកម្ពុជា បង្កើតរោងចក្រផលិតសំបកកង់យានយន្ដ ជាមួយទឹកប្រាក់វិនិយោគ ៣៥០លានដុល្លារ លើផ្ទៃដី ៥០ហិកតា។ រោងចក្រនេះ មានទីតាំងស្ថិតក្នុងតំបន់សេដ្ឋកិច្ចពិសេស ឈីលូ ជាន ពុចាយ នៅក្រុងបាវិត ខេត្តស្វាយរៀង ដែលអាចបង្កើតការងារជាង ៤ពាន់កន្លែងដល់កម្មករនិយោជិត។
អត្ថបទគួរអាន
ដោយឡែក ក្រុមហ៊ុនធំមួយទៀតនោះគឺ Shane (Cambodia) Furniture Co., Ltd ជាក្រុមហ៊ុនផលិតគ្រឿងសង្ហារឹមគ្រប់ប្រភេទ។ ក្រុមហ៊ុនចិនមួយនេះ បានបោះទុនវិនិយោគប្រមាណ ៤៧,៧លានដុល្លាអាមេរិក លើទំហំផ្ទៃដី ៣៥ហិកតានៅក្នុងតំបន់សេដ្ឋកិច្ចពិសេស ស៊ីន ក្រុងបាវិត ខេត្តស្វាយរៀង។ ក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា រោងចក្ររបស់ក្រុមហ៊ុននេះ អាចបង្កើតការងារបានចំនួនប្រមាណ២ពាន់កន្លែងផងដែរ។
ឯកឧត្តម សុខ ចិន្ដាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានបានវាយតម្លៃខ្ពស់ចំពោះក្រុមហ៊ុន Cart Tire Co., Ltd ដែលនឹងបញ្ជាទិញកៅស៊ូក្នុងស្រុក១០០% សម្រាប់ផលិតសំបកកង់យានយន្ត ដោយឯកឧត្តមបានបង្ហាញថា នៅឆ្នាំទី១ក្រុមហ៊ុននឹងត្រូវការកៅស៊ូប្រមាណ ៥ម៉ឺនតាន ហើយនៅឆ្នាំទី៥ កើនដល់ ១៥ម៉ឺនតោន ស្មើនឹងប្រមាណ ៤៣%នៃផលិតផលកៅស៊ូក្នុងស្រុកសរុប (ទិន្នន័យឆ្នាំ២០២០)។ ទន្ទឹមនឹងនេះ ឯកឧត្តម សុខ ចិន្ដាសោភា ក៏បានស្នើឱ្យក្រុមហ៊ុន Shane (Cambodia) Furniture Co., Ltd ដែលជាក្រុមហ៊ុនផលិតគ្រឿងសង្ហារឹម ពិចារណាទិញវត្ថធាតុដើមក្នុងស្រុក ដើម្បីអាចឲ្យក្រុមហ៊ុននាំចេញផលិតផល ដោយបង់ពន្ធក្រោមអត្រា ០% ឬអត្រាទាបផងដែរ។
បើតាមការគូសបញ្ជាក់របស់ ឯកឧត្តម សុខ ចិន្ដាសោភា ដើម្បីលើកទឹកចិត្តដល់វិនិយោគិន សេចក្ដីព្រាងច្បាប់ស្ដីពីវិនិយោគថ្មី ដែលនឹងត្រូវដាក់ជូនកិច្ចប្រជុំពេញអង្គគណៈរដ្ឋមន្ត្រីពិនិត្យ និងពិភាក្សានៅថ្ងៃទី ០៩ ខែកក្ក ឆ្នាំ២០២១ ខាងមុខនេះ នឹងផ្ដល់ការលើកទឹកចិត្តដល់វិនិយោគិន តាមរយៈការអនុញ្ញាតឲ្យកាត់កងចំណាយរហូតដល់ ១៥០% ពីមូលដ្ឋានគិតពន្ធ ចំពោះការចំណាយលើមធ្យោបាយដឹកជញ្ជូន ប្រកបដោយផាសុកភាពដល់កម្មករនិយោជិត ការសាងសង់កន្លែងស្នាក់នៅ កន្លែងបរិភោគអាហារ ឬអាហារដ្ឋានដែលមានតម្លៃសមរម្យជាដើម។
ទិន្នន័យ ដែលបង្ហាញដោយទំព័រហ្វេសប៊ុករបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា នៅឆមាសទី១ក្នុងឆ្នាំ២០២១ CDC បានអនុម័តលើគម្រោងអភិវឌ្ឍន៍ប្រមាណ៧០គម្រោង ដែលមានទុនវិនិយោគជាង២ពាន់៤រយលានដុល្លារ។ គម្រោងទាំងនេះបានរួមចំណែកជួយផ្តល់ការងារដល់ពលរដ្ឋជាង៤ម៉ឺន៤ពាន់កន្លែង។
គម្រោងដែលក្រុមប្រឹក្សាអភិវឌ្ឍកម្ពុជា បានអនុម័តនៅឆមាសទី១នេះ ភាគច្រើនជារោងចក្រផលិតសម្ភារវាយនភណ្ឌ កាត់ដេរសម្លៀកបំពាក់ ស្បែកជើង កាបូប គ្រឿងបង្គុំអគ្គិសនី រោងចក្រផលិតកង់ និងគ្រឿងបង្គុំ សណ្ឋាគារ និងរោងចក្រផលិតផលិតផលប្រើប្រាស់ផ្សេងៗទៀត៕អត្ថបទដោយ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
