ក្រសួងសុខាភិបាលជប៉ុនបានឱ្យដឹងថា ពលរដ្ឋជប៉ុនទាំងពីរនាក់ដែលបានស្លាប់ក្នុងរយៈពេលប៉ុន្មានថ្ងៃបន្ទាប់ពីការចាក់វ៉ាក់សាំង Moderna លើកទី២។ នៅក្នុងរបាយការណ៍មរណភាពដែលបានរាយការអំពីអាការៈរបស់អ្នកពីរនោះបានបង្ហាញថា ម្នាក់ៗមានគ្រុនក្តៅមួយថ្ងៃបន្ទាប់ពីចាក់លើកទី ២ ហើយក៏បានស្លាប់បន្ទាប់ពីគ្រុនក្តៅបានពីរថ្ងៃ។ សូមបញ្ជាក់ថា ពួកគេបានចាក់វ៉ាក់សាំងលើកទី២នេះ ក្នុងចំណោមទីតាំងចាក់វ៉ាក់សាំងចំនួន៣កន្លែងដែលបានប្រើប្រាស់វ៉ាក់សាំងដែលមានសារធាតុក្នុងដបវ៉ាក់សាំងនេះ។
យ៉ាងណាមិញ មូលហេតុនៃការស្លាប់កំពុងត្រូវបានស៊ើបអង្កេត ខណៈ ក្រុមហ៊ុន Moderna និងក្រុមហ៊ុន ជប៉ុនTakeda បាននិយាយក្នុងសេចក្តីថ្លែងការណ៍ថា នៅពេលនេះ មិនមានភស្តុតាងណាមួយបញ្ជាក់ថាការស្លាប់ទាំងនេះ បណ្តាលមកពីវ៉ាក់សាំងកូវីដ Moderna នៅឡើយទេ ។
ស្របពេលដែរ រដ្ឋាភិបាលជប៉ុន ក៏បាននិយាយផងដែរថា គ្មានបញ្ហាសុវត្ថិភាពឬប្រសិទ្ធភាពណាមួយត្រូវបានកំណត់អត្តសញ្ញាណទេហើយការផ្អាកដំណើរការការចាក់វ៉ាក់សាំងទាំងនេះ គឺជាការប្រុងប្រយ័ត្នជាមុន។ តែយ៉ាងណាមិញ បើតាម អ្នកគ្រប់គ្រងការឆ្លងមេរោគនៅមន្ទីរពេទ្យអន្តរជាតិមួយ ក្នុងទីក្រុងតូក្យូបានលើកឡើងថា វាអាចមានបញ្ហាទាក់ទងគ្នារវាងការចាក់វ៉ាក់សាំង និងការស្លាប់នេះ។
អត្ថបទទាក់ទង
សូមជម្រាបថា ប្រទេសជប៉ុនបានបញ្ឈប់ការប្រើប្រាស់វ៉ាក់សាំង Moderna ចំនួន ១លាន ៦សែនដូសដែលត្រូវបានបញ្ជូនទៅមជ្ឈមណ្ឌលចាក់វ៉ាក់សាំងចំនួន ៨៦៣ នៅទូទាំងប្រទេសជប៉ុន ពោលគឺជាងមួយសប្តាហ៍ប៉ុណ្ណោះ បន្ទាប់ពីទទួលបានរបាយការណ៍ពីការចម្លងមេរោគនៅក្នុងដបវ៉ាក់សាំង។
គួរកត់សម្គាល់ដែរថា គិតត្រឹមថ្ងៃទី ៨ ខែសីហាមានមនុស្សចំនួន ៩៩១ នាក់បានស្លាប់នៅក្នុងប្រទេសជប៉ុនបន្ទាប់ពីចាក់វ៉ាក់សាំងរបស់ក្រុមហ៊ុន Pfizer និង ១១ នាក់បន្ទាប់ពីចាក់វ៉ាក់សាំង Moderna ប៉ុន្តែគ្មានមូលហេតុបញ្ជាក់ច្បាស់លាស់ថា ការស្លាប់នោះ បណ្ដាលមកពីការចាក់វ៉ាក់សាំងឬយ៉ាងណានោះទេ។ នេះបើយោងតាមក្រសួងសុខាភិបាល។
ប្រទេសជប៉ុនសម្រេចបានការចាក់វ៉ាក់សាំងកូវីដ១៩ ចំនួនជាង ១២៤ លានដូសហើយ ដោយមានប្រជាជនប្រមាណ ៤៤% នៃប្រជាជនសរុបបានចាក់វ៉ាក់សាំងគ្រប់២ដូស៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
