លោកឧកញ៉ាបញ្ជាក់យ៉ាងដូច្នេះថា៖ «ហេដ្ឋារចនាសម្ព័ន្ធ យើងបាននិងកំពុងសាងសង់រោងចក្រដែលយើងផលិតឥដ្ឋក្នុងការសាងសង់ក៏យើងបានធ្វើជិតហើយដែរ។ ដូច្នេះ សន្ទុះនៃការអភិវឌ្ឍរបស់យើង គឺមិនមានការរាថយទេ បើទោះបីយើងជួបបញ្ហាតម្លៃដើមថ្លៃក៏ដោយ តែក្រុមហ៊ុននៅតែរក្សាតម្លៃដដែលគឺ ២ម៉ឺន៥ពាន់ ទៅ ៣ម៉ឺនដុល្លារអាមេរិក»។
លោកឧកញ៉ាបានសង្កត់ធ្ងន់ថា កន្លងមក អតិថិជនតែងតែយល់ច្រឡំថា គម្រោងផ្ទះតម្លៃសមរម្យនេះលក់ឲ្យតែមន្ដ្រីរាជការ ប៉ុន្តែ មិនដូច្នេះឡើយ។ គម្រោងនេះមានកូតាសម្រាប់មន្ដ្រីរាជការមែន ប៉ុន្តែ គម្រោងនេះ ក៏បានបើកលក់ដល់ពលរដ្ឋទូទៅដែលមានចំណូលទាបនិងមធ្យមផងដែរ។
តើអ្នកបានអានអត្ថបទនេះ ឬនៅ?
ទាក់ទងនឹងពាក្យចចាមអារ៉ាមថា គម្រោងផ្ទះតម្លៃសមរម្យនេះ គឺជាគម្រោងមិនពិតនោះ លោកឧកញ៉ា សៀ ឫទ្ធី បានអះអាងថា អ្វីដែលក្រុមហ៊ុនរបស់លោកបានប្រកាស គឺបាននិងកំពុងធ្វើការសាងសង់ជាបណ្តើរៗ ស្របតាមផែនការរបស់រដ្ឋាភិបាល។
លោកឧកញ៉ាបញ្ជាក់យ៉ាងដូច្នេះថា៖ «ក្នុងនាមខ្ញុំជាអ្នកអភិវឌ្ឍមួយនៅក្នុងប្រទេសនេះ ដែលមានឈ្មោះបោះសំឡេងក្នុងការអភិវឌ្ឍអគារខ្ពស់ៗ ខ្ញុំមិនលក់ឈ្មោះខ្ញុំជាមួយគម្រោងដែលមានចំណូលទាបនេះទេ។ ដូច្នេះ សូមអតិថិជនមានការជឿជាក់លើគម្រោងរបស់ខ្ញុំ ដែលយើងបានធ្វើ មិនមែនគ្រាន់តែនិយាយចោលនោះទេ»។
ទន្ទឹមគ្នានេះ លោកឧកញ៉ាអំពាវនាវដល់អតិថិជនដែលបានចុះឈ្មោះរួចរាល់ សូមប្រញាប់មកសាកសួរព័ត៌មាន និងជ្រើសរើសទីតាំងដែលខ្លួនចង់បាន៕
