ការបើកដំណើរការកំពង់ផែសមុទ្រខ្មៅឡើងវិញនេះ បានធ្វើឱ្យ អ្នកតាមដានព្រឹត្តិការណ៍សង្គ្រាមនៅអ៊ុយក្រែនរំពឹងថា បញ្ហាស្បៀងអាហារសកលអាចនឹងត្រូវរសាយ បន្ទាប់ពីមានការដឹកជញ្ជូនស្បៀងចេញពីប្រទេសអ៊ុយក្រែនបានឡើងវិញ។
ទោះយ៉ាងណា ទាំងភាគីរុស្ស៊ី និងអ៊ុយក្រែនដែលសុទ្ធសឹងជាអ្នកនាំចេញស្បៀងធំៗទាំងពីរ មិនបានបញ្ជាក់ជាផ្លូវការអំពីអ្វីដែល ភាគីទួរគីបានលើកឡើងខាងលើនោះទេ។ ប៉ុន្តែកាលពីយប់ថ្ងៃព្រហស្បតិ៍ក្នុងសារវីដេអូ ប្រធានាធិបតីអ៊ុយក្រែនលោកហ្សេលេនស្គីបានបង្ហើបថា កំពង់ផែសមុទ្រខ្មៅរបស់លោកទំនងអាចបើកឡើងវិញបាន។
មែនទែនទៅ ការបិទខ្ទប់កំពង់ផែសមុទ្រខ្មៅរបស់អ៊ុយក្រែនពីសំណាក់ប្រទេសរុស្ស៊ី បានកាត់បន្ថយខ្សែចង្វាក់ផ្គត់ផ្គង់ស្បៀងអាហារគ្រាប់ធញ្ញជាតិសំខាន់ៗទៅកាន់ទីផ្សារជុំវិញពិភពលោក និងបានរុញច្រានតម្លៃគ្រាប់ធញ្ញជាតិកើនឡើងខុសសព្វមួយដង រាប់ចាប់តាំងពីបុរសខ្លាំងលោកពូទីន បានបញ្ជាឱ្យកងទ័ពចូលលុកលុយក្នុងប្រទេសអ៊ុយក្រែនកាលពីថ្ងៃទី២៤ខែកុម្ភៈមក។
អត្ថបទគួរអាន
ជុំវិញបញ្ហាវិបត្តិស្បៀងអាហារសកលនេះដែរ វិមានក្រឹមឡាំងបានទាត់ចោលការស្តីបន្ទោសថា មកពីសង្គ្រាមរបស់ខ្លួនទើបធ្វើឱ្យរាំងស្ទះដល់ដំណើរការនាំចេញស្បៀងអាហារ។ ម៉ូស្គូបានទម្លាក់កំហុសនេះ លើទណ្ឌកម្មរបស់លោកខាងលិច និងបានចោទប្រកាន់ទីក្រុងកៀវថា បានដាក់មីននៅតាមកំពង់ផែ ទើបរុស្ស៊ីមិនអាចបើកឱ្យនាំចេញស្បៀងបាន។
ភាគីរុស្ស៊ីកាលពីថ្ងៃព្រហស្បតិ៍ក៏បានព្រមានដែរថា ការបន្តដាក់ទណ្ឌកម្មចុងក្រោយរបស់សហភាពអឺរ៉ុប ពោលគឺទណ្ឌកម្មជុំទី៧ មកលើរុស្ស៊ី នឹងជះផលវិបាកដ៏អាក្រក់សម្រាប់សន្តិសុខ និងផ្នែកណាមួយនៃសេដ្ឋកិច្ចពិភពលោកតែម្តង។
សូមជម្រាបថា អង្គការសហប្រជាជាតិ និងប្រទេសអ្នកសម្របសម្រួល ទួរគី បានធ្វើការជាមួយគ្នាអស់រយៈពេលជាងពីរខែមកហើយ ដើម្បីសម្រេចឱ្យបាននូវកិច្ចព្រមព្រៀងដែលប្រធាន UN ហៅថា ជាកិច្ចព្រមព្រៀងជាកញ្ចប់ ក្នុងបើកផ្លូវឱ្យមានការនាំចេញគ្រាប់ធញ្ញជាតិតាមសមុទ្រខ្មៅរបស់អ៊ុយក្រែនឡើងវិញ និងសម្របសម្រួលការដឹកជញ្ជូនគ្រាប់ធញ្ញជាតិ និងជីរបស់រុស្ស៊ីផងដែរ៕
