ប្រទេសកូរ៉េខាងត្បូងបាននិយាយថ្មីៗនេះថា ប្រទេសកូរ៉េខាងជើងបានបាញ់មីស៊ីលផ្លោងចេញពីនាវាមុជទឹកកាលពីថ្ងៃសៅរ៍កន្លងទៅនេះ ជាការបាញ់បង្ហោះមីស៊ីលផ្លោងចុងក្រោយបង្អស់ដែលត្រូវបានហាមឃាត់ដោយក្រុមប្រឹក្សាសន្តិសុខអង្គការសហប្រជាជាតិ។
កូរ៉េខាងត្បូងបានបន្ថែមថា ទង្វើរបស់កូរ៉េខាងជើងនេះ បានកើតឡើងមុនពេលការចូលកាន់តំណែងរបស់ប្រធានាធិបតីថ្មីរបស់កូរ៉េខាងត្បូង ដែលបានប្តេជ្ញាចិត្តប្រកាន់ជំហររឹងប៉ឹងប្រឆាំងនឹងទីក្រុងព្យុងយ៉ាង ហើយការបាញ់មីស៊ីលចុងក្រោយរបស់កូរ៉េខាងជើងនេះទៀតសោត ក៏ធ្វើឡើងនៅមុនដំណើរទស្សនកិច្ចរបស់ប្រធានាធិបតីសហរដ្ឋអាមេរិក មកកាន់កូរ៉េខាងត្បូងផងដែរ។
ចំណែកប្រទេសជប៉ុនក៏បាននិយាយដែរថា មីស៊ីលដែលកូរ៉េខាងជើងសាកល្បងនោះ គឺជាមីស៊ីលផ្លោងរយៈចម្ងាយខ្លី ហើយរដ្ឋមន្ត្រីក្រសួងការពារជាតិជប៉ុនលោក Nobuo Kishi បាននិយាយថា ការអភិវឌ្ឍន៍ថ្មីៗនេះរបស់កូរ៉េខាងជើងនៅក្នុងបច្ចេកវិទ្យាទាក់ទងនឹងមីស៊ីលនុយក្លេអ៊ែរ និងការបាញ់ជារឿយៗនូវមីស៊ីលផ្លោងនេះ បានគំរាមកំហែងដល់តំបន់ និងសហគមន៍អន្តរជាតិ។
សហរដ្ឋអាមេរិកក៏បានវាយតម្លៃដែរថា កូរ៉េខាងជើងអាចនឹងត្រៀមខ្លួនធ្វើការសាកល្បងនុយក្លេអ៊ែរម្ដងទៀតនៅដើមខែនេះ។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិគឺលោកស្រី Linda Thomas-Greenfield បាននិយាយថា សហរដ្ឋអាមេរិកបានវាយតម្លៃថា កូរ៉េខាងជើងកំពុងរៀបចំកន្លែងសាកល្បងមីស៊ីលគឺកន្លែងពុងហ្គេ រី (Punggye-ri) របស់ខ្លួន ហើយអាចត្រៀមខ្លួនជាស្រេចក្នុងការធ្វើតេស្ដនៅទីនោះនៅដើមខែនេះ ដែលនឹងក្លាយជាការសាកល្បងលើកទី៥របស់ខ្លួន។
មន្ត្រីនាំពាក្យរងនៃក្រសួងការបរទេសអាមេរិកគឺអ្នកស្រី Jalina Porter បាននិយាយពីថ្ងៃសុក្រថា ការវាយតម្លៃនេះ គឺស្របទៅនឹងសេចក្តីថ្លែងការណ៍សាធារណៈថ្មីៗនេះរបស់មេដឹកនាំកូរ៉េខាងជើង។ សហរដ្ឋអាមេរិកបានចែករំលែកព័ត៌មាននេះជាមួយសម្ព័ន្ធមិត្ត និងដៃគូរបស់ពួកគេ ហើយនឹងបន្តការសម្របសម្រួលយ៉ាងជិតស្និទ្ធជាមួយពួកគេផងដែរ។
អត្ថបទគួរអាន
លោកស្រី Linda Thomas-Greenfield បាននិយាយថា សហរដ្ឋអាមេរិកចង់ឱ្យក្រុមប្រឹក្សាសន្តិសុខអង្គការសហប្រជាជាតិបោះឆ្នោតនៅក្នុងខែឧសភានេះ ដើម្បីដាក់ទណ្ឌកម្មបន្ថែមទៅលើកូរ៉េខាងជើង ប៉ុន្តែមហាអំណាចមានសិទ្ធិវ៉េតូ គឺប្រទេសចិន និងរុស្ស៊ីបានបង្ហាញសញ្ញាថា ពួកគេនឹងជំទាស់ទៅនឹងសកម្មភាពបន្ថែមទៀត។
ប្រទេសកូរ៉េខាងជើងបានទទួលទណ្ឌកម្មរបស់អង្គការសហប្រជាជាតិចាប់តាំងពីឆ្នាំ២០០៦មកម្ល៉េះ ដែលក្រុមប្រឹក្សាសន្តិសុខអង្គការសហប្រជាជាតិបានដាក់ជាបន្ដបន្ទាប់នៅក្នុងរយៈពេលជាច្រើនឆ្នាំមកនេះក្នុងគោលបំណងកាត់ផ្តាច់មូលនិធិ សម្រាប់ជួយដល់កម្មវិធីផលិតអាវុធនុយក្លេអ៊ែរ និងមីស៊ីលផ្លោងរបស់ទីក្រុងព្យុងយ៉ាង។
ប៉ុន្តែប្រទេសកុម្មុយនិស្តមួយនេះ បានធ្វើការដោយជោគជ័យ ដើម្បីគេចវេសពីទណ្ឌកម្មរបស់អង្គការសហប្រជាជាតិមួយចំនួន ហើយមេដឹកនាំកូរ៉េខាងជើងលោក Kim Jong Un កាលពីខែមុនបានសន្យាថានឹងពន្លឿនការអភិវឌ្ឍឃ្លាំងអាវុធនុយក្លេអ៊ែររបស់ប្រទេសកូរ៉េខាងជើងថែមទៀត។ នេះបើយោងតាមអ្នកឃ្លាំមើលទណ្ឌកម្មឯករាជ្យរបស់អង្គការសហប្រជាជាតិ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
