មន្ត្រីជាន់ខ្ពស់អាមេរិកមួយរូបសូមមិនបញ្ជេញឈ្មោះបានព្រមានអំពីផលវិបាក រួមទាំងការដាក់ទណ្ឌកម្មផ្សេងៗ ប្រសិនបើរដ្ឋាភិបាលចិនលួចផ្តល់ជាសម្ភារៈយោធាសម្រាប់រុស្សីក្នុងការធ្វើសង្គ្រាមជាមួយអ៊ុយក្រែនមែន ប៉ុន្ដែ មកដល់ពេលនេះ អាមេរិកមិនទាន់រកឃើញទង្វើគាំទ្រផ្នែកយោធា និងសេដ្ឋកិច្ចណាមួយពីសំណាក់រដ្ឋាភិបាលចិន សម្រាប់ទីក្រុងម៉ូស្គូនៅឡើយទេ។
មន្ត្រីជាន់ខ្ពស់រដ្ឋបាលលោកបៃដិនរូបនេះ បានប្រាប់ទីភ្នាក់ងាររ៉យទ័រទៀតថា៖ «ប្រទេសចិន ពិតជាមិនបានផ្តល់សម្ភារៈយោធាទៅឲ្យរុស្សីមែន។ ហើយលោកបន្ថែមថា ការដាក់ក្រុមហ៊ុនមួយចំនួនចូលទៅក្នុងបញ្ចីខ្មៅនៅដើមសប្តាហ៍នេះដោយនាយកដ្ឋានពាណិជ្ជកម្មអាមេរិកនោះ គឺចង់ប្រឆាំងនឹងក្រុមហ៊ុនដែលគាំទ្ររុស្សី ដោយក្រុមហ៊ុនទាំងនោះ មានមួយចំនួនគឺនៅក្នុងទឹកដីនៃប្រទេសចិន។
អត្ថបទគួរអាន
គួររំលឹកថា ចិនបានបដិសេធមិនថ្កោលទោសទង្វើរបស់រុស្ស៊ីក្នុងការឈ្លានពានទៅលើអ៊ុយក្រែននាពេលកន្លងទៅ និងបានរិះគន់ទណ្ឌកម្មលោកខាងលិចទៅលើក្រុងម៉ូស្គូយ៉ាងចាស់ដែផងដែរ។ មិនតែប៉ុណ្ណោះ ទីក្រុងប៉េកាំងក៏អះអាងផងដែរថា ខ្លួនមិនដែលបានផ្តល់ជំនួយយោធាដល់រុស្ស៊ី ឬអ៊ុយក្រែនទេ ហើយចិននឹងចាត់វិធានការចាំបាច់ ដើម្បីការពារសិទ្ធិរបស់ក្រុមហ៊ុនខ្លួន ដែលត្រូវអាមេរិកដាក់ចូលបញ្ចីខ្មៅផងដែរ។
គួរជម្រាបថា ក្រសួងពាណិជ្ជកម្មអាមេរិកនៅដើមសប្តាហ៍នេះ បានបន្ថែមក្រុមហ៊ុនចំនួនប្រាំ ដែលមានមូលដ្ឋាននៅក្នុងប្រទេសចិនចូលទៅក្នុងបញ្ជីខ្មៅពាណិជ្ជកម្មអាមេរិកបន្ថែមទៀត ដោយបានចោទប្រកាន់ថា បានគាំទ្រដល់មូលដ្ឋានឧស្សាហកម្មយោធា និងការពារជាតិរបស់រុស្ស៊ី ខណៈដែលទីក្រុងម៉ូស្គូកំពុងជាប់ដៃធ្វើសង្គ្រាមដ៏ក្តៅគគុកជាមួយអ៊ុយក្រែន៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
