ចិនរិះគន់ខ្លាំងៗចំពោះដំណើរទស្សនកិច្ចគណៈប្រតិភូអាមេរិកនៅកោះតៃវ៉ាន់ ចំពេលសង្គ្រាមតានតឹងនៅអ៊ុយក្រែន

រដ្ឋាភិបាលក្រុងប៉េកាំង​ក៏បានចេញ​​មករិះគន់ជាខ្លាំងទៅលើដំណើរទស្សនកិច្ច​របស់គណៈប្រតិភូអាមេរិកនេះ ដោយបាន​លើកឡើងថា ចិន​នឹង​ការពារអធិបតេយ្យភាព និងបូរណភាពទឹកដីរបស់ខ្លួន គឺមិនអាច​ផ្លាស់ប្ដូរបានឡើយ ហើយចិន​បាន​ចាត់ទុក​ដំណើរទស្សនកិច្ច​របស់​គណៈប្រតិភូអាមេរិក​ នឹងត្រូវបរាជ័យជាក់ជាមិនខានឡើយ។ នេះបើតាមការចុះផ្សាយសារព័ត៌មាន Reuters។

ទើបតែបានបើកនាវាចម្បាំងចូលដែនសមុទ្រតៃវ៉ាន់ និងត្រូវបានចិនព្រមានខ្លាំងៗមិនទាន់បានប៉ុន្មានថ្ងៃផង ឥឡូវនេះ អាមេរិកបានបញ្ជូនគណៈប្រតិភូរបស់ខ្លួនឲ្យមកទស្សនកិច្ចកិច្ចនៅកោះតវ៉ាន់កាលពីថ្ងៃអង្គារសប្ដាហ៍នេះ។

ដំណើរទស្សនកិច្ចនេះ ដឹកនាំដោយអតីតប្រធានអគ្គសេនាធិការចម្រុះ លោក Mike Mullen ហើយចំពោះការធ្វើដំណើរទស្សនៈកិច្ចលើកនេះ កើតឡើងចំពេលដែលកោះតៃវ៉ាន់បានបង្កើនកម្រិតប្រកាសអាសន្នរបស់ខ្លួន ដោយមានការប្រុងប្រយ័ត្នជាខ្ពស់ចំពោះប្រទេសចិន ដែលក្រុងតៃប៉ិបារម្ភថា ក្រុងប៉េកាំងអាចឆ្លៀតឱកាសទាញយកផលប្រយោជន៍ ដើម្បីវាយប្រហារកោះតៃវ៉ាន់ ស្របពេលដែលប្រទេសលោកខាងលិចកំពុងផ្ដោតការចាប់អារម្មណ៍ និងជាប់ដៃទៅលើបញ្ហារុស្ស៊ីឈ្លានពានអ៊ុយក្រែន។

ដំណើរទស្សនៈកិច្ចរបស់លោក Mullen និង គណៈប្រតិភូជាច្រើនរូបទៀតរបស់អាមេរិក ទៅកាន់កោះតៃវ៉ាន់ គឺមានគោលបំណងបង្ហាញពីការគាំទ្រដ៏រឹងមាំរបស់សហរដ្ឋអាមេរិកសម្រាប់តៃវ៉ាន់។ ក្នុងនោះផងដែរ គណៈប្រតិភូអាមេរិកនឹងជួបជាមួយមេដឹកនាំកំពូលរបស់តៃវ៉ាន់លោកស្រី Tsai Ing-wen ផងដែរ។

មន្ត្រីជាន់ខ្ពស់តៃវ៉ាន់ លោក Su Tseng-chang បានប្រាប់អ្នកយកព័ត៌មានកាលពីថ្ងៃអង្គារថា ដំណើរទស្សនកិច្ចនេះបង្ហាញពីសារៈសំខាន់នៃទំនាក់ទំនងតៃវ៉ាន់-សហរដ្ឋអាមេរិក និងជំហររបស់តៃវ៉ាន់ ក៏ដូចជាការគាំទ្រដ៏រឹងមាំរបស់សហរដ្ឋអាមេរិកសម្រាប់កោះនេះផងដែរ។

បញ្ហាកោះតៃវ៉ាន់នេះ គឺជាបញ្ហារសើប និងស្មុគស្មាញបំផុត នៅក្នុងទំនាក់ទំនងរវាងចិន និងសហរដ្ឋអាមេរិក។ អ្នកនាំពាក្យក្រសួងការបរទេសចិន លោក Wang Wenbin បានមានប្រសាសន៍ថា ឆន្ទៈរបស់ប្រជាជនចិនក្នុងការការពារអធិបតេយ្យភាព និងបូរណភាពទឹកដីរបស់ប្រទេស គឺមិនអាចផ្លាស់ប្តូរបានឡើយ ហើយ អ្នកណាដែលសហរដ្ឋអាមេរិកបញ្ជូនមកដើម្បីបង្ហាញការគាំទ្រចំពោះតៃវ៉ាន់ គឺនឹងទទួលបានលទ្ធផលបរាជ័យ។

សូមបញ្ជាក់ថា ដំណើរទស្សនកិច្ចរបស់គណៈប្រតិភូអាមេរិកទៅកាន់កោះតៃវ៉ាន់ គឺធ្វើឡើងក្រោយតែប៉ុន្មានថ្ងៃប៉ុណ្ណោះ ដែលនាវាអាមេរិកបានបើកចូលទៅកាន់ដែនសមុទ្រកោះតៃវ៉ាន់។ អាមេរិក បានចាត់ទុកការធ្វើបើកនាវារបស់ខ្លួនចូលច្រកសមុទ្រកោះតៃវ៉ាន់ គឺជាទម្លាប់នៃសកម្មភាពរបស់ខ្លួន និងធ្វើឡើងស្របតាមច្បាប់អន្តរជាតិ។ ប៉ុន្ដែ សម្រាប់ចិនវិញ បានចាត់ទុកសកម្មភាពរបស់នាវាចម្បាំងអាមេរិកនេះថា ជាការបង្កហេតុ៕

អត្ថបទ វ៉ាន់ ស្រីរ័ត្ន