ក្រុមហ៊ុនផលិតឱសថអាមេរិក Merck រំពឹងរកចំណូលបាន ៧ ពាន់លានដុល្លារ ពីការលក់ថ្នាំគ្រាប់ព្យាបាលកូវីដ-១៩ រហូតដល់ឆ្នាំ២០២២

កាលពីខែមិថុនា ក្រុមហ៊ុនផលិតឱសថរបស់អាមេរិកដែលមានឈ្មោះថា Merck បានយល់ព្រមលក់ថ្នាំគ្រាប់ព្យាបាលកូវីដចំនួន ១លាន ៧ សែនកញ្ចប់ ដល់រដ្ឋាភិបាលសហរដ្ឋអាមេរិកក្នុងតម្លៃប្រហែល ១ពាន់២០០លានដុល្លារ ខណៈប្រទេសផ្សេងទៀតក៏បានប្រញាប់ប្រញាល់ចុះហត្ថលេខាលើកិច្ចសន្យាទិញថ្នាំគ្រាប់ព្យាបាលកូវីដនេះដែរ ចាប់តាំងពី ក្រុមហ៊ុនប្រកាសដាក់ពាក្យស្នើសុំការអនុញ្ញាតប្រើប្រាស់ជាបន្ទាន់ទៅកាន់រដ្ឋបាលចំណីអាហារ និងឱសថសហរដ្ឋអាមេរិក (FDA)រួចមក។

សូមជម្រាបថា ក្រុមហ៊ុនផលិតឱសថរបស់សហរដ្ឋអាមេរិកមួយនេះ ក៏បានចុះហត្ថលេខាលើកិច្ចព្រមព្រៀងជាមួយអ្នកផលិតថ្នាំទូទៅដើម្បីផលិតថ្នាំប្រភេទនេះ សម្រាប់ប្រទេសដែលមានចំណូលទាប និង មធ្យមផងដែរ។

ក្នុងឆ្នាំនេះក្រុមហ៊ុនផលិតឱសថ Merck គ្រោងនឹងផលិតថ្នាំគ្រាប់ព្យាបាលកូវីដចំនួន ១០ លានកញ្ចប់ ហើយនឹងផលិតបន្ថែមចំនួន ២០ លានកញ្ចប់ទៀតនៅឆ្នាំ ២០២២។ គោលដៅផលិតនេះ មិនរាប់បញ្ចូលជាមួយកិច្ចព្រមព្រៀង ដែលក្រុមហ៊ុននឹងផ្តល់អាជ្ញាបណ្ណផលិតសម្រាប់ប្រទេសដទៃនោះទេ។

ចាប់តាំងពីមានការបញ្ជា និង កក់ទិញថ្នាំគ្រាប់កូវីដនេះមក គេសង្កេតឃើញថា តម្លៃភាគហ៊ុនរបស់ក្រុមហ៊ុន Merck បានកើនឡើងជាង ៤% ដែលកើនដល់ជាង ៨៥ ដុល្លារក្នុងមួយភាគហ៊ុន។

សូមជម្រាបថា ថ្នាំគ្រាប់ដែលមានសមត្ថភាពប្រឆាំងមេរោគកូវីដ១៩ ត្រូវបានក្រុមហ៊ុន Merck ធ្វើការសាកល្បងជោគជ័យ ដោយបង្ហាញថា វាអាចកាត់បន្ថយការធ្លាក់ខ្លួនឈឺ និងស្លាប់ ដោយសារកូវីដ ១៩ ដល់ ៥០ ភាគរយ។

យ៉ាងណាក៏ដោយ ទីប្រឹក្សារដ្ឋបាលចំណីអាហារ និងឱសថរបស់សហរដ្ឋអាមេរិក (FDA) នឹងជួបប្រជុំគ្នានៅខែវិច្ឆិកា ដើម្បីបោះឆ្នោតសម្រេចថា តើថ្នាំគ្រាប់ព្យាបាលកូវីដនេះ គួរតែត្រូវបានអនុញ្ញាតឲ្យប្រើប្រាស់បន្ទាន់ ឬយ៉ាងណា? ដូច្នេះបើសិនជាត្រូវបានសម្រេចដោយ FDA នោះ ថ្នាំនេះនឹងក្លាយជាថ្នាំគ្រាប់ព្យាបាលកូវីដ-១៩ ដំបូងគេ ដែលត្រូវបានអនុញ្ញាតឲ្យប្រើប្រាស់បន្ទាន់នៅសហរដ្ឋអាមេរិក៕

អត្ថបទ៖ ស៊ើង និមល់