ធនាគារកណ្ដាលអាមេរិកកាលពីថ្ងៃអាទិត្យ ទី១៩មីនា បាននិយាយថា ខ្លួនបានចូលរួមជាមួយធនាគារកណ្ដាលកាណាដា អង់គ្លេស ជប៉ុន អឺរ៉ុប និងស្វីសផងដែរ សម្រាប់សកម្មភាពសម្របសម្រួលមួយ ដើម្បីបង្កើនការផ្តល់សាច់ប្រាក់ងាយស្រួល ឬទុនបង្វិល តាមរយៈការរៀបចំប្រព័ន្ធប្តូរប្រាក់ដុល្លារអាមេរិកឲ្យមានរបៀបរៀបរយ។
អាជ្ញាធររូបិយវត្ថុបាននិយាយថា ការធ្វើបែបនេះនឹង«ដើរតួនាទីជាលំហូរសាច់ប្រាក់ដ៏សំខាន់មួយ ដើម្បីបន្ធូរបន្ថយភាពតានតឹងនៅក្នុងទីផ្សារផ្តល់មូលនិធិសកល ដោយហេតុនេះ វានឹងជួយកាត់បន្ថយផលប៉ះពាល់នៃភាពតានតឹង ទៅលើការផ្គត់ផ្គង់ឥណទានដល់គ្រួសារ និងអាជីវកម្ម។
អត្ថបទគួរអាន
វិធានការនេះបានធ្វើឡើងនៅថ្ងៃតែមួយស្របពេលដែលធនាគារដ៏ធំរបស់ស្វីស គឺ UBS បានប្រកាសថា ខ្លួននឹងទិញយកធនាគារ Credit Suisse ដើម្បីជួយដោះស្រាយការព្រួយបារម្ភអំពីប្រព័ន្ធហិរញ្ញវត្ថុសកល ហើយអាជ្ញាធរស្វីសបានរៀបចំកិច្ចព្រមព្រៀងនេះ ដើម្បីការពារការដួលរលំ នៃធនាគារ Credit Suisse ខណៈដែលមានការព្រួយបារម្ភចេះតែកើនឡើងពីភាពចលាចលផ្នែកហិរញ្ញវត្ថុនៅក្នុងតំបន់ ក៏ដូចជាពិភពលោក។
វិធានការនេះ បានកើតឡើងតែប៉ុន្មានថ្ងៃប៉ុណ្ណោះនៅមុនពេលកិច្ចប្រជុំរយៈពេល២ថ្ងៃរបស់ធនាគារ កណ្ដាលអាមេរិក បន្ទាប់ពីនោះមក ធនាគារកណ្ដាលនេះនឹងប្រកាសពីចេតនារបស់ខ្លួនពីការដំឡើងអត្រាការប្រាក់ ជាថ្មីទៀត។ ទីផ្សារមួយចំនួនកាលពីល្ងាចថ្ងៃអាទិត្យបានបង្ហាញឲ្យឃើញថា មានឱកាសប្រហែល ៧៤% ដែលធនាគារកណ្ដាលអាមេរិក នឹងធ្វើការដំឡើងអត្រាការប្រាក់គោល ០,២៥%ថែមទៀត នៅថ្ងៃពុធសប្ដាហ៍នេះ។ នេះបើយោងតាមសន្ទស្សន៍តម្លៃ FedWatch របស់ក្រុមហ៊ុន CME Group ។
លោក Krishna Guha ប្រធានគោលនយោបាយសកល និងយុទ្ធសាស្ត្រធនាគារកណ្តាលនៅក្រុមហ៊ុន Evercore ISI បាននិយាយថា កិច្ចព្រមព្រៀងធនាគារ UBS និងធនាគារ Credit Suisse ព្រមទាំងវិធានការប្ដូរប្រាក់នេះ ប្រហែលជាបង្កើនឱកាសនៃការដំឡើងអត្រាការប្រាក់ថែមទៀត៕
អត្ថបទ ៖ សុខ ជា
