សមយុទ្ធនៅប៉ាស៊ីហ្វិកប្រចាំឆ្នាំដែលគេឱ្យឈ្មោះថា រីមផេក (RIMPAC) ដឹកនាំដោយកងទ័ពជើងទឹកអាមេរិកនៅឆ្នាំនេះ បានចាប់ផ្តើមធ្វើឡើងនៅឯកោះហាវ៉ៃ ដោយមានប្រទេសដៃគូចំនួន ២៦ចូលរួម។ សមយុទ្ធនេះនឹងធ្វើឡើងរយៈពេល ៣៧ថ្ងៃចាប់ពីថ្ងៃពុធទី២៩មិថុនារហូតដល់ថ្ងៃទី០៤ខែសីហា ដែលមានទាហានចូលរួមសរុបប្រហែល ២ម៉ឺន៥ពាន់នាក់។
សមយុទ្ធនេះ ជាឱកាសសម្រាប់សហរដ្ឋអាមេរិកដើម្បីបង្ហាញពីកិច្ចសហប្រតិបត្តិការពហុភាគីប្រឆាំងនឹងការគំរាមកំហែងពីប្រទេសចិន ប៉ុន្តែស្របពេលដែលស្ថានការណ៍នៅច្រកសមុទ្រតៃវ៉ាន់កំពុងនៅក្តៅងំនៅឡើយ អាមេរិកមិនបានបញ្ចូលកោះតៃវ៉ាន់ក្នុងសមយុទ្ធនោះឡើយ។ ការណ៍នេះ ទំនងជាដោយសារតែគេចង់បញ្ចៀសការប្រឈមមុខដាក់គ្នាកាន់តែខ្លាំងជាមួយទីក្រុងប៉េកាំង។ យ៉ាងណាមិញ សមាជិកសភាអាមេរិកធ្លាប់បានផ្តល់អនុសាសន៍ថា រដ្ឋបាលរបស់ប្រធានាធិបតីចូ បៃឌិន គួរតែបញ្ចូលកោះតៃវ៉ាន់ក្នុងសមយុទ្ធដែរ។
ក្រៅពីនោះនៅមានហេតុផលមួយចំនួនទៀត ដោយសារតែរដ្ឋាភិបាលក្រុងវ៉ាស៊ីនតោន មិនចង់ឱ្យប្រទេសនៅតំបន់អាស៊ីអាគ្នេយ៍មួយចំនួន ដែលចូលរួមក្នុងសមយុទ្ធនេះ មានភាពទើសទាល់ ជាមួយចិន នៅពេលដែលពួកគេត្រូវធ្វើសមយុទ្ធជាមួយនឹងកោះតៃវ៉ាន់ដែរ។
អត្ថបទគួរអាន
គួរជម្រាបថា សមយុទ្ធ RIMPAC នឹងនាំមកនូវការហ្វឹកហាត់ប្រឆាំងនឹង នាវាមុជទឹក ការប្រើប្រាស់កាំភ្លើងការពារដែនអាកាស និងមីស៊ីល គួបផ្សំនឹងសកម្មភាពបច្ចេកទេសលើផ្ទៃសមុទ្រផ្សេងៗទៀត។ សមយុទ្ធលើកនេះ មានប្រើប្រាស់នាវាចំនួន ៣៨គ្រឿង និងយន្តហោះចម្បាំងជាង១៧០គ្រឿង។
ក្នុងចំណោមបញ្ជីឈ្មោះប្រទេសចូលរួមទាំង២៦ ក្នុងរួមមានប្រទេសមួយចំនួនដែលខ្វះមិនបានដូចជា ជប៉ុន អូស្ត្រាលី ចក្រភពអង់គ្លេស ឥណ្ឌា ហ្វីលីពីន ថៃ និងប្រទេសកោះតុងហ្គា។ នេះបើយោងតាមការបញ្ជាក់កងទ័ពជើងទឹកសហរដ្ឋអាមេរិក។
សូមជម្រាបថា សមយុទ្ធ រីមផេក (RIMPAC) ត្រូវធ្វើឡើងរៀងរាល់ពីរឆ្នាំម្តងជាមួយនឹងប្រទេសនៅតំបន់ប៉ាស៊ីហ្វិកជាច្រើន ដោយឡែក តែនៅឆ្នាំ២០២០ ដោយសារតែជំងឺរាតត្បាតកូវីដ១៩ កាលនោះមានការប្រមូលផ្តុំគ្នាត្រឹមតែ ១០ប្រទេស និងទាហានចំនួន ៥ពាន់៣រយនាក់ប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
