ការសាងសង់រោងចក្រនេះ គឺជាផ្នែកមួយនៃផែនការរបស់ក្រុមហ៊ុន GM ក្នុងការផលិតរថយន្តអគ្គិសនីឱ្យបាន ១លានគ្រឿង និងស្របតាមគោលដៅរបស់រដ្ឋបាលលោក ចូ បៃឌិន ក្នុងការផលិតរថយន្តប្រភេទនេះ ឱ្យបាន ៥០% នៅប៉ុន្មានឆ្នាំខាងមុខ។ នេះបើតាមការចុះផ្សាយរបស់សារព័ត៌មាន Reuter។
ប្រាក់កម្ចី ២ពាន់៥រយលានដុល្លារសម្រាប់ក្រុមហ៊ុន Ultium នេះ គឺនឹងជួយឱ្យក្រុមហ៊ុនអាចសម្រេចគម្រោងសាងសង់រោងចក្រអាគុយរថយន្តអគ្គិសនីថ្មីចំនួន៣ នៅរដ្ឋ Michigan, Ohio និង Tennessee ដោយអាចបង្កើតការងារ ៦ពាន់កន្លែង សម្រាប់ការសាងសង់ និងការងារប្រតិបត្តិការជាង ៥ពាន់កន្លែង នៅរោងចក្រទាំង៣នេះ។
ការផ្តល់កម្ចីនេះ គឺយកចេញពីកម្មវិធី កម្ចីផលិតបច្ចេកវិទ្យាឈានមុខសម្រាប់រថយន្ត របស់រដ្ឋាភិបាលអាមេរិក ហៅកាត់ថា ATVM។
អត្ថបទគួរអាន
លោក Jennifer Granholm រដ្ឋមន្រ្តីក្រសួងថាមពលអាមេរិក បានប្រកាសពីការសម្រេចផ្តល់កម្ចីនេះ ក្នុងអំឡុងពេលទស្សនកិច្ចនៅរដ្ឋ Michigan។ ជាមួយគ្នានោះ លោកនឹងជួបពិភាក្សាជាមួយមន្រ្តីពាក់ព័ន្ធមួយចំនួនអំពីយុទ្ធសាស្រ្តជ្រើសរើស និងរក្សាបុគ្គលិកជំនាញ និងគំនិតផ្តួចផ្តើមកម្លាំងពលកម្មអាគុយរបស់រដ្ឋបាល លោក ចូ បៃឌិនផងដែរ។
សូមជម្រាបថា ក្រុមហ៊ុនបណ្ដាក់ទុនរួមគ្នានេះ ក៏កំពុងពិចារណាជ្រើសរើសទីតាំងក្នុងរដ្ឋ Indiana សម្រាប់សាងសង់រោងចក្រអាគុយទី៤ទៀតផងដែរ ខណៈរោងចក្រមួយតម្លៃ ២ពាន់៦រយលានដុល្លារ នៅក្នុងរដ្ឋ Michigan គ្រោងនឹងបើកដំណើរការនៅក្នុងឆ្នាំ២០២៤។
ថ្មីៗនេះក្រុមហ៊ុន Ultium បានឱ្យដឹងថា ខ្លួននឹងជំរុញការវិនិយោគបន្ថែម ២៧៥លានដុល្លារទៀត នៅរោងចក្រក្នុងរដ្ឋ Tennessee ដែលមានតម្លៃ ២ពាន់៣រយលានដុល្លារ។
គួរដឹងថា ប្រធានាធិបតីលោក ចូ បៃឌិន បានដាក់គោលដៅថា ៥០% នៃការផលិតរថយន្តរបស់អាមេរិក នៅត្រឹមឆ្នាំ២០៣០ គឺត្រូវតែជារថយន្តអគ្គិសនី ឬជារថយន្ដកូនកាត់ Plug-in Hybrid។ ទន្ទឹមនឹងនេះដែរ ក្រុមហ៊ុន GM ក៏មានផែនការផលិតរថយន្តអគ្គិសនីប្រមាណ ១លានគ្រឿងនៅអាមេរិកខាងជើង ត្រឹមឆ្នាំ២០២៥ និងបញ្ឈប់ការលក់រថយន្តសាំងនៅត្រឹមឆ្នាំ ២០៣៥៕
