ក្រុមហ៊ុន Chevron ក៏បានថ្កោលទោសរបបយោធាមីយ៉ាន់ម៉ាថា មានការរំលោភបំពានសិទ្ធិមនុស្សធ្ងន់ធ្ងរផងដែរ។ នេះបើតាមសារព័ត៌មានអន្តរជាតិធំៗជាច្រើន។
ក្រុមហ៊ុនអាមេរិក Chevron បានបញ្ជាក់កាលពីថ្ងៃទី ១០ ខែកុម្ភៈថា ខ្លួនបានសម្រេចលក់ទ្រព្យសកម្មរបស់ខ្លួនទាំងអស់នៅមីយ៉ាន់ម៉ាទៅឲ្យក្រុមហ៊ុនកាណាដា MTI ប៉ុន្ដែ មិនបានបញ្ជាក់ពីទំហំទឹកប្រាក់ប៉ុន្មាននោះទេ គ្រាន់តែគេដឹងថា ក្រុមហ៊ុននេះ គឺមានផលប្រយោជន៍ប្រមាណជាង៤១% នៅក្នុងគម្រោងប្រេងឥណ្ដូង Yadana នៅមីយ៉ាន់ម៉ា។ គម្រោងឥណ្ដូងប្រេង Yadana គឺមានការទាញយកឧស្ម័នធម្មជាតិ សម្រាប់ការប្រើប្រាស់ក្នុងស្រុក និងនាំចេញទៅកាន់ប្រទេសថៃជាដើម ហើក្រៅពីក្រុមហ៊ុន Chevron គម្រោងនេះ ក៏មានការបណ្ដាក់ទុនរវិនិយោគរួមគ្នាជាមួយក្រុមហ៊ុនបារាំង Total, ក្រុមហ៊ុនបុត្រសម្ព័ន្ធរបស់ក្រុមហ៊ុនថៃ PTT និងក្រុមហ៊ុនប្រេងរដ្ឋមីយ៉ាន់ម៉ា MOGE។
អត្ថបទគួរអាន
ប៉ុន្ដែ កាលពីខែកក្កដាឆ្នាំមុន ក្រុមហ៊ុនផលិតប្រេងដ៏ធំមួយរបស់បារាំង គឺ TotalEnergies ក៏បានលក់ទ្រព្យសកម្មរបស់ខ្លួន និងចាកចេញពីមីយ៉ាន់ម៉ា មុនក្រុមហ៊ុន Chevron។
យ៉ាងណាមិញ ការលក់ទ្រព្យសកម្មរបស់ Chevron ក៏ធ្វើឡើងតាមផែនការយុទ្ធសាស្ត្រអាជីវកម្មរយៈពេល១ឆ្នាំរបស់ខ្លួន ដើម្បីកាត់បន្ថយប្រាក់ចំណូលរបស់រដ្ឋាភិបាលយោធា ដែលប្រមូលបានពីវិស័យនេះ។
សូមបញ្ជាក់ថា របបយោធាមីយ៉ាន់ម៉ា កន្លងមក មានការពឹងផ្អែកខ្លាំងលើឧស្សាហកម្មប្រេងនេះ សម្រាប់ប្រភពចំណូលរូបិយបណ្ណអន្តរជាតិ ដោយគេអាចទាញយកចំណូលរាប់រយលានដុល្លារ ក្នុងមួយឆ្នាំៗពីវិស័យប្រេង។
