រដ្ឋាភិបាលអាមរិក បាននិងកំពុងតាមដានយ៉ាងយកចិត្តទុកដាក់បំផុត ទាក់ទងទៅនឹងតម្លៃប្រេង និងប្រេងសាំង ដែលកំពុងឡើងថ្លៃខ្ពស់នាពេលបច្ចុប្បន្ននេះ ហើយអាមេរិកនឹងប្រើប្រាស់គ្រប់មធ្យោបាយ ដើម្បីដោះស្រាយការអនុវត្តប្រឆាំងការប្រកួតប្រជែងនៅក្នុងទីផ្សារថាមពលនៅក្នុងសហរដ្ឋអាមេរិកផ្ទាល់ និងទីផ្សារថាមពលសកលលោកទាំងមូលផងដែរ ដើម្បីធានាបាននូវទីផ្សារថាមពលដែលអាចទុកចិត្តបាន និងមានចីរភាព។នេះតាមការលើកឡើងរបស់មន្ត្រីជាន់ខ្ពស់សេតវិមានអាមេរិក នៅក្នុងសារព័ត៌មានរ៉យទ័រ។
គួរជម្រាបថា តម្លៃប្រេងឆៅនៅទីផ្សារអង់គ្លេស បច្ចុប្បន្ននេះ បានហក់ឡើងខ្ពស់ក្នុងរង្វង់ជិត៨៤ដុល្លារអាមេរិកក្នុងមួយធុងបារែល ដែលជាតម្លៃមួយខ្ពស់បំផុតមិនធ្លាប់មានគិតតាំងពីឆ្នាំ២០១៨មក ខណៈដែលតម្លៃប្រេងឆៅនៅអាមេរិកវិញ ក៏មានក្នុងរង្វង់ជាង ៨០ដុល្លារអាមេរិកក្នុងមួយបារ៉ែលផងដែរ ដែលជាតម្លៃមួយខ្ពស់បំផុតគិតតាំងពីឆ្នាំ២០១៤។
តម្លៃប្រេងឆៅពិភពលោកហក់ឡើងថ្លៃខ្ពស់នេះ ដោយសារតែស្ថានភាពនៃការស្ទុះងើបនៃសេដ្ឋកិច្ចពិភពលោក ដែលធ្វើឲ្យមានតម្រូវការប្រើប្រាស់ប្រេងកើនឡើង ខណៈដែលតម្លៃហ្គាស និង ធ្យូងថ្មសម្រាប់ការផលិតអគ្គិសនីក៏មានការកើនឡើងខ្ពស់ផងដែរ។
អត្ថបទគួរអាន
ទន្ទឹមនឹងតម្លៃប្រេងហក់ឡើងថ្លៃខ្ពស់នេះ អង្គការប្រទេសអ្នកផលិតប្រេង OPEC+ ក៏បានរក្សាការកម្រិតលើការផ្គត់ផ្គង់ប្រេងតាំងពីការចាប់ផ្ដើមផ្ទុះរាតត្បាតនៃកូវីដ១៩មក។ កាលពីពេលកន្លងទៅនេះ អង្គការ OPEC+ បានកាត់បន្ថយការផ្គត់ផ្គង់ប្រេងប្រចាំថ្ងៃជាង១០លានបារ៉ែល ដោយសារតែសកម្មភាពតម្រូវការប្រើប្រាស់ចុះខ្សោយ ។ ប៉ុន្ដែ នៅក្នុងខែកក្កដាកន្លងទៅនេះ អង្គការប្រទេសអ្នកផលិតប្រេងនេះ បានយល់ព្រមបង្កើនការផលិត ៤០ម៉ឺនបារ៉ែលក្នុងមួយថ្ងៃមកវិញ ដើម្បីបំពេញមកវិញ នូវចំនួនប្រេង ដែលខ្លួនបានកាត់បន្ថយ។ការធ្វើបែបនេះ ក្នុងគោលបំណងបង្កើនការផ្គង់ប្រេងលើទីផ្សារ។ ប៉ុន្ដែ មកទល់ពេលនេះ តម្លៃប្រេងឆៅនៅតែបន្ដកើនខ្ពស់ដដែល ហើយកំពុងបង្កក្ដីបារម្ភកាន់តែខ្លាំងឡើងៗ ចំពោះការស្ទុះងើបឡើងវិញនៃសេដ្ឋកិច្ចពិភពលោក ចំពេលដែល បញ្ហាកង្វះខាតថាមពលអគ្គិសនី និងឈានទៅរកវិបត្តិខ្វះថាមពលសកលក៏ជាចំណោទបញ្ហាកាន់តែលំបាកសម្រាប់សេដ្ឋកិច្ចពិភពលោកផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
