ទោះបីជា អាមេរិក និងអង់គ្លេសបានព្រមព្រៀងគ្នាក៏ពិតមែន តែមិនទាន់មានកាលបរិច្ឆេទ ឬពេលវេលាជាក់លាក់ណាមួយត្រូវបានផ្តល់ឱ្យសម្រាប់កិច្ចពិភាក្សានេះទេ ប៉ុន្តែការពិភាក្សានេះ ត្រូវបានគេមើលឃើញថា អាចនឹងដោះស្រាយនូវបញ្ហាតម្រូវការដែកថែប និងអាលុយមីញ៉ូមសកល រួមទាំងភាពប្រទាំងប្រទើសគ្នា អំពីការអនុវត្តពន្ធរបស់សហរដ្ឋអាមេរិក លើលោហៈធាតុពីចក្រភពអង់គ្លេសផងដែរ។
អាមេរិក និងអង់គ្លេសបានប្ដេជ្ញាធ្វើការឆ្ពោះទៅរកការបញ្ចប់វិវាទឲ្យបានឆាប់រហ័ស ដែលធានាបាននូវលទ្ធផលជោគជ័យ នៃឧស្សាហកម្មដែកថែប និង អាលុយមីញ៉ូមនៅក្នុងទីផ្សាររបស់ប្រទេសទាំងពីរ។
ទន្ទឹមនេះ កិច្ចពិភាក្សានេះក៏នឹងផ្ដោតលើបញ្ហាសងសឹកគ្នាលើផ្នែកពន្ធ ដែលចក្រអង់គ្លេសបានដាក់ពន្ធ ២៥% ទៅលើផលិតផលអាមេរិកមួយចំនួន រួមមាន ស្រាវីស្គី ម៉ូតូ ខោខូវប៊យពណ៌ខៀវ និង ថ្នាំជក់ផងដែរ។ សូមជម្រាបថា ការនាំចេញស្រាវីស្គីប្រចាំឆ្នាំរបស់សហរដ្ឋអាមេរិកទៅកាន់ចក្រភពអង់គ្លេសបានធ្លាក់ចុះជាងពាក់កណ្តាលចាប់តាំងពីឆ្នាំ២០១៨ ក្រោយពីរងការយកពន្ធច្រើនពីអង់គ្លេសនេះ។អត្ថបទគួរអាន
ដោយឡែក អង់គ្លេសឯណោះវិញ មានបំណងចង់ចរចាលើការនាំចេញដែកថែប និងអាលុយមីញ៉ូមទៅកាន់ទីផ្សាររបស់អាមេរិកដោយឥតបង់ពន្ធ ដែលស្រដៀងនឹងអ្វីដែលរដ្ឋាភិបាលក្រុងវ៉ាស៊ីនតោនបានផ្តល់ឲ្យសហភាពអឺរ៉ុបនៅថ្ងៃទី ១ ខែមករា កន្លងទៅនេះដែរ។ តែយ៉ាងណាមិញ ក្រុមហ៊ុនផលិតដែកថែបរបស់អាមេរិកបានព្រមានប្រឆាំងនឹងការចរចារបស់អង់គ្លេសនេះ រួមទាំងប្រឆាំងនឹងការចរចាស្រដៀងគ្នាជាមួយប្រទេសជប៉ុនផងដែរ។
សូមរំឮកថា កាលពីខែ មីនា ឆ្នាំ ២០១៨ អតីត ប្រធានាធិបតីអាមេរិក លោក ដូ ណាល់ត្រាំ បានប្រកាសដំឡើងពន្ធលើលោហៈធាតុរបស់អង់គ្លេសមួយចំនួន ក្នុងនោះរួមមានពន្ធលើដែកថែប ២៥% និង អាលុយមីញ៉ូម ១០% ដែលនាំចូលទៅកាន់អាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
