រដ្ឋាភិបាលវៀតណាមបានរៀបចំសេចក្ដីព្រាងច្បាប់មួយ ក្នុងការកាត់បន្ថយពន្ធអាករលើតម្លៃបន្ថែម VAT សម្រាប់មុខទំនិញ និងសេវាកម្មជាច្រើនប្រភេទ ដោយសេចក្ដីព្រាងច្បាប់នេះ ត្រូវបានរដ្ឋសភាអនុម័តរួចហើយ ហើយវានឹងជួយបង្កើនការចំណាយបន្ថែមទៀត ក្នុងទិសដៅជំរុញដល់ការលូតលាស់នៃកំណើនសេដ្ឋកិច្ច។
ក្រសួងហិរញ្ញវត្ថុវៀតណាម បានអះអាងថា ការកាត់បន្ថយអាករលើតម្លៃបន្ថែម (VAT) ពី ១០% មកនៅត្រឹម ៨% ចាប់ពីខែកុម្ភៈតទៅនេះ នឹងធ្វើឲ្យរដ្ឋាភិបាលខាតបង់ចំណូលប្រមាណជាង ២ពាន់លានដុល្លារអាមេរិក។
ទោះយ៉ាងណា ការកាត់បន្ថយអាករលើតម្លៃបន្ថែមនៅវៀតណាម មិនមែនអនុវត្តលើគ្រប់មុខទំនិញ និងសេវាកម្មនោះទេ។ តួយ៉ាង សកម្មភាពពាណិជ្ជកម្មទាក់ទងនឹងសេវាទូរគមនាគម, បច្ចេកវិទ្យាព័ត៌មាន និងហិរញ្ញវត្ថុ គឺនៅតែបន្ដអនុវត្ត VAT ១០%ដដែល រួមទាំងសេវាធនាគារ, មូលបត្រ, ធានារ៉ាប់រង អចលនទ្រព្យ និងសេវាមួយចំនួនទៀតក៏មិនមានការកាត់បន្ថយ VAT ដែរ។អត្ថបទគួរអាន
សូមរំឭកថា នៅឆ្នាំ២០២១កន្លងទៅនេះ ការចំណាយរបស់រដ្ឋាភិបាលវៀតណាម ទៅលើការជួយសង្គ្រោះអាជីវកម្ម និងបុគ្គលដែលរងផលប៉ះពាល់ដោយសារកូវីដ១៩ សរុបមានដល់ទៅជាង ១០ពាន់លានដុល្លារ ឬស្មើនឹងទំហំជិត៣%នៃ GDP របស់ប្រទេសនេះ ខណៈដែលសេដ្ឋកិច្ចវៀតណាមនៅឆ្នាំ២០២១សម្រេចបានកំណើនប្រមាណ ២,៦% និងរំពឹងថាបន្ដកើនដល់ ៥,៥% នៅឆ្នាំ២០២២នេះ។
នៅដើមឆ្នាំ២០២២នេះដែរ សភាវៀតណាម ក៏ទើបតែបានអនុម័តកញ្ចប់ថវិកាជំរុញសេដ្ឋកិច្ចប្រមានជាង ១៥ពាន់លានដុល្លារ ដើម្បីស្ដារសេដ្ឋកិច្ច ដែលរងផលប៉ះពាល់ដោយសារកូវីដ១៩ និងការបិទខ្ទប់ ដោយកញ្ចប់ថវិកាទាំងនេះ នឹងបន្ដប្រើប្រាស់សម្រាប់ជួយដល់អាជីវកម្ម និងកម្មករនិយោជិតដែលរងគ្រោះដោយសារកូវីដ១៩ និងការបង្កើនការចំណាយទៅលើហេដ្ឋារចនាសម្ព័ន្ធជាដើម៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
