ការកើនឡើងនេះ ត្រូវបានជំរុញដោយការនាំចេញទំនិញទៅកាន់សហរដ្ឋអាមេរិកនៅតែមានកម្រិតខ្ពស់ ហើយការចំណាយលើការប្រើប្រាស់ក្នុងស្រុកកំពុងងើបឡើងវិញជាបណ្ដើរៗ បន្ទាប់ពីមានការធូរស្រាលនៃមេរោគកូវីដ ១៩។ នេះបើតាមការចុះផ្សាយសារព័ត៌មានជប៉ុន Nikkei។
មែនទែនទៅ GDP របស់វៀតណាមធ្លាប់បានធ្លាក់ចុះ ៦% នៅក្នុងត្រីមាសខែ កក្កដា ដល់ ខែ កញ្ញា ឆ្នាំ ២០២១ ដោយសារការវិធានការរឹតបន្តឹងកូវីដ ១៩ យ៉ាងតឹងរ៉ឹងនៅក្នុងតំបន់។
យ៉ាងណាមិញ សេដ្ឋកិច្ចក្នុងស្រុកបានងើបឡើងវិញបន្តិចម្ដងៗ បន្ទាប់ពីមានភាពធូរស្រាលនៃការឆ្លងរីករាលដាលនៃមេរោគទាំងនៅក្នុងតំបន់ និង ក្រៅតំបន់ ដែលបានជំរុញឱ្យមានតម្រូវការប្រើប្រាស់ និង ការនាំចេញបានកើនឡើងយ៉ាងឆាប់រហ័ស ខណៈនៅក្នុងត្រីមាសទី ២ ចន្លោះខែ មេសា ដល់ខែ មិថុនាឆ្នាំ២០២២ កំណើន GDP នៅក្នុងប្រទេសក្បែខាងកម្ពុជាមួយនេះបានកើនឡើងដល់ ៧,៧% បើធៀបនៅក្នុងត្រីមាសទី១ក្នុងឆ្នាំ ២០២២ នេះបានកើនឡើង ៥% ប៉ុណ្ណោះ។
យោងតាមទិន្នន័យពីសមាគមវាយនភណ្ឌនិងសម្លៀកបំពាក់វៀតណាមបានឲ្យដឹងថាតម្លៃនាំចេញវាយនភណ្ឌ និងសម្លៀកបំពាក់របស់ប្រទេសវៀតណាម មានកម្រិតខ្ពស់គួរឲ្យកត់សម្គាល់ក្នុងរយៈពេល ៦ ខែចុងក្រោយនេះ។
អត្ថបទគួរអាន
តម្លៃពលកម្មទាបរបស់វៀតណាមបានជំរុញឱ្យប្រទេសនេះក្លាយជាជម្រើសទីមួយសម្រាប់យុទ្ធសាស្ត្រវិនិយោគ និង ជាទីតាំងនៃការបង្កើតខ្សែចង្វាក់ផ្គត់ផ្គង់នៃយុទ្ធសាស្ត្រ ចិនបូកមួយ។ នៅពេលដែលការប្រកួតប្រជែងរវាងសហរដ្ឋអាមេរិក និងចិនកាន់តែខ្លាំងក្លា ក្រុមហ៊ុនផលិតជាច្រើននៅតែបន្តសាងសង់ និង ពង្រីករោងចក្រនៅក្នុងប្រទេសវៀតណាម។
តំណាងរោងចក្រកាត់ដេរនៅវៀតណាម ដែលមានការវិនិយោគពីបរទេសបាននិយាយថា ការបិទខ្ទប់រយៈពេល ២ ខែ នៅក្នុងទីក្រុងសៀងហៃបានជំរុញឱ្យរោងចក្ររបស់ពួកគេបង្កើនផលិតកម្មនៅក្នុងប្រទេសវៀតណាមជាបណ្តោះអាសន្ន ដើម្បីបម្រើដល់តម្រូវការសកល។
ទន្ទឹមនឹងនេះ ក្រុមសេដ្ឋវិទូមួយចំនួន បាននិយាយថា ការងើបឡើងវិញនៃសេដ្ឋកិច្ចពិភពលោកគឺជាផ្នែកដ៏ធំមួយដែលបានជួយដល់កំណើនសេដ្ឋកិច្ចនៃការនាំចេញរបស់វៀតណាមផងដែរ។
សូមបញ្ជាក់ថា តើគោលដៅរបស់រដ្ឋាភិបាលវៀតណាម នៅ២ឆ្នាំ២០២២នេះ វៀតណាមរំពឹងនឹងសម្រេចបានកំណើនសេដ្ឋកិច្ចចន្លោះពី៦% ទៅ៦,៥% ខណៈដែលសេដ្ឋកិច្ចប្រទេសនេះ បច្ចុប្បន្នកំពុងប្រឈមនឹងឧបសគ្គជាច្រើន រួមទាំងបញ្ហាកូវីដ១៩ បញ្ហាសង្គ្រាមនៅអ៊ុយក្រែន តម្លៃប្រេងឥន្ធនៈកើនឡើង និងអតិផរណាជាដើម៕
